Абдулла Орипов: Дўстларим бирма-бир кета бошлади…
АБДУЛЛА ОРИПОВ,
Ўзбекистон Қаҳрамони, Халқ шоири
ЎЙИН
Сочимни тарамай тарагунимча
Бошимни улар тарк эта бошлади.
Теграмга қарамай қарагунимча
Дўстларим бирма-бир кета бошлади.
Бунчалар чопағон бўлмаса умр,
Бу отни тўхтатиб қололмагайсан.
Гоҳида берилган саломга бир қур
Улгуриб алик ҳам ололмагайсан.
Фурсатинг етмайди, атрофга қараб
Телпакни қозиққа ҳатто илишга.
Вақтинг топилгайдир лекин, во ажаб,
Кимнингдир дилини вайрон қилишга.
Кимгадир кел дединг эртага шу пайт,
Яхшилик қилишга демак кўнглинг тўқ.
Эртан сенинг учун мавжудмикан, айт,
Мавжуд бўлганда ҳам, балки ўзинг йўқ.
Умидни Аллоҳга айлаб ҳавола
Балки термулгайсан кўкка бедармон.
Мисоли ўйинни бузди бир бола,
У бошқа ўйинга энди андармон.
«Дунё ўзбеклари» учун махсус
МАҚОЛАНИ ДЎСТЛАР БИЛАН БАҲАМЛАШИНГ