11 март куни Пешин намози пайти Тошкентдаги Шайх Зайниддин масжидида бутун Ислом оламида нуфузли уламо Шайх Муҳаммад Содиқ Муҳаммад Юсуфнинг жаноза маросими бўлди.

Шайх ҳазратлари 10 март куни тушдан кейин ҳаётдан кўз юмган.

Ҳазратнинг ўлими ҳақидаги хабар яшин тезлигида Интернет ижтимоий тармоқлари орқали тарқалди.

Кечга яқин Шайх Муҳаммад Содиқ Муҳаммад Юсуфнинг Тошкентдаги хонадони ташқарисида юзлаб кишилар тўпланди.

10 март тунида Шайх асос солган islom.uz веб-cайти хакерлар ҳужумига учраган.

islom.uz сайти фаолияти ишдан чиққан.

63 ёшда вафот этган шайхнинг жаноза маросими Тошкентдаги Шайх Зайниддин масжидида бўлиб ўтиши хабари ортидан пойтахтнинг Кўкча мавзесига элтувчи йўлларда автомобил қатновлари тўхтатилди.

Шаҳар кўчаларига қўшимча милиция кучлари жойлаштирилган.

Минглаб одамлар эрталабдан масжидга йўл олдилар.

Интернет ижтимоий тармоқларида маросимдан бир неча соат олдин масжид ичкарисида бўш жой қолмагани ҳақидаги хабарлар тарқалди, фотосуратлар эълон қилинди.

Ўзбекистон Дин ишлари қўмитаси Шайх Муҳаммад Содиқ Муҳаммад Юсуф ўлими муносабати билан таъзия изҳор қилди.

Ушбу таъзияда Шайх ҳазратларининг юрак хуружидан вафот этгани хабар қилинди.

Шайх ҳазратларининг ўлими дунёдаги кўплаб мусулмонларни қайғуга солди.

Шайх Муҳаммад Содиқ Муҳаммад Юсуф дунёдаги нуфузли Ислом ташкилотлари аъзоси эди, Диний қўмита бу ташкилотлардан айримларини эслатган.

Жумладан, улар, Макка шаҳридаги Ислом олами уюшмаси, Дунё тасаввуф уюшмаси, Дунё мусулмонлар уламолари кенгаши, Исломобод шаҳридаги Бутундунё ислом уюшмаси, Дунё масжидлари уюшмаси ва Иорданиядаги Оли Байт ташкилотига қарашли Исломий фикрлар академияси.

Михаил Горбачёв бошқаруви даврида Муҳаммад Содиқ Муҳаммад Юсуф махсус элчи сифатида Афғонистонда асирга олинган совет аскарларини озод қилиш бўйича музокараларни бошқарган.

2004 йилда Бесландаги мактабда жангарилар одамларни гаровга олганда, Шайх ҳазратлари Россия Президенти Владимир Путинга маслаҳатчи бўлгани маълум.

Айни пайтда дунёнинг турли бурчакларидан Шайх Муҳаммад Содиқ Муҳаммад Юсуф вафоти муносабати билан таъзиялар изҳор қилинмоқда.

Чеченистон раҳбари Рамзан Қодиров бутун республика ҳудудида Шайх ҳазратлари руҳига тиловатлар қилиниши ҳақида, пойтахт Грознийдаги кўчалардан бири бундан кейин Шайх Муҳаммад Содиқ Муҳаммад Юсуф номи аталишини эълон қилди.

Би-би-си Ўзбек хизмати билан Whatsapp орқали боғланишни истасангиз, телефонимиз: +44 78-58-86-00-02

ББС

Шайх Муҳаммад Содиқ Муҳаммад Юсуфнинг вафоти боис ижтимоий тармоқ фойдаланувчилари ҳам оғир қайғуга чўмганларини изҳор этмоқдалар. Ислом олами улкан алломадан жудо бўлди, деб ёзади шайхнинг мухлислари.

Кўкча масжидида ҳозир бўлганларга кўра, Шайхнинг ўғли Исмоил Мухаммад Юсуф отасининг жанозасини ўқиган. Шайх ҳазратлари Кўкчадаги Шайх Зайниддин қабристонига дафн этилган.

Муҳаммад Содиқ Муҳаммад Юсуфнинг жанозасига тахминан 200 минггача одам йиғилгани, видолашиш учун йиғилган одамлар оқими бир неча кмни ташкил қилгани айтилмоқда.

Аброр Имомхўжаев Твиттерда ёзади:

Умрим бино бўлиб кўрмаган воқеаларни бугун 1 соат ичида кўрдим. Кўкча қабристони томонга элитувчи барча йўллар бекилгани сабабли кўпчилик машинасини 4-5 километр узоқликда қолдириб пиёда масжид томон юрди. Йўлда машиналар рақамига эътибор бердим. Деярли барча вилоятлар ва яқин қўшни давлатлардан ташқари Россияга тегишли рақамларни ҳам кўрдим. Пешин намозига ярим соат қолганда масжид ва қабристоннинг барча эшиклари ёпилди. Кўча одамлар билан лиқ тўлди. Кимдир жойнамозда, кимдир дастрўмолда намоз ўқиди. Рўпарамдаги талаба сумкасини ичидан қора целлофан олиб, ўшанинг устида ўқиди. Бугун жаноза маросимининг суратлари ижтимоий тармоқларда кўплаб чоп этилса керак. Чунки йиғилганларнинг барчаси эгилиб намоз ўқиганда ҳам, юзлаб қўллар тепага кўтарилган ҳолатда суратга оларди. Бунча одамни кўрмаганман. Унинг чеккаси йўқ эди. Шу куни 5 кишининг жанозаси ўқилди. Улар орасида таниқли актёр Тўхтамурод Азизовнинг қизи ҳам бор экан. Аллоҳ уларнинг барчаларини раҳматига олишини сўраб қоламиз… Жаноза намозини Ҳазратнинг ўғиллари ўқиди…

Муҳаммад Содиқ Муҳаммад Юсуфнинг шогирдларидан “Ислом. уз” сайтининг муҳаррири Адҳам Отажонов ёзади: Ҳасан Басрий роҳимаҳуллоҳ: “Салафлар: Олимнинг ўлими Исломдаги кемтик бўлиб, уни замонлар ўтиши тўлдира олмайди, дер эдилар”- деганлар. Шайх ҳазратлари ўзлари таржима қилган ушбу ояти карималар ила истиржоъ айтамиз: «Ва сабрлиларга хушхабар бер. Улар ўзларига мусибат етганда: «Албатта, биз Аллоҳникимиз ва албатта, биз Унга қайтувчимиз», деганлардир».

“Кеча Марказий Осиё ва бошқа давлатлар мусулмонлари, хусусан, Ўзбекистон мусулмонлари оғир кунни бошдан ўтказдилар. Ҳаётларини Ислом таЪлимотларини ёйишга сарфлаган, кўплаб китоблар муаллифи шайх Муҳаммад Содиқ Муҳаммад Юсуф вафот етганлари хабари кўплаб мусулмонларни чуқур қайғуга солди. Мадина Ислом университети саҳифаси у кишининг яқинлари, шогирдлари ва барча мусулмонларга таЪзия изҳор етар екан, Аллоҳдан у зотни раҳмати ила чулғаб, Жаннат билан сийлашини сўраб қолади”, дейилади Мадина Ислом Университети сайтидаги хабарда.

Россия федерацияси Мусулмонлар идораси ва Россия муфтийлар кенгаши раиси, шайх Равил Ғайнуддин шайх Муҳаммад Содиқ Муҳаммад Юсуф вафоти муносабати билан барча мусулмонларга ва олимнинг яқинларига ҳамдардлик изҳор этган.

“Устоз Муҳаммад Содиқ ўзидан минглаб шогирдлар, илмий китоблар қолдирди. У умрини Исломнинг ҳақиқий йўлини ўрганиш ва тушунтиришга бағишлади. Унинг шогирдлари орасида Ўзбекистоннинг ислом ўқув юртларида ўқиган, ҳозирда Россияда забардаст бўлган 10 дан ортиқ олим мавжуд. Шайх Муҳаммад Содиқ Муҳаммад Юсуф доимо халқ билан бирга эди”, дейилади Россия мусулмонлари идораси сайтида чоп этилган таъзияномада.

Чеченистон раҳбари Рамзан Қодиров ҳам ҳамдардлик изҳор этаркан, марҳумнинг чечен халқининг ҳақиқий дўсти бўлганлигини таъкидлаб, у зотнинг хотираси учун пойтахт Грозний шаҳридаги кўчалардан бирига Шайх Муҳаммад Содиқ Муҳаммад Юсуф номи берилишини маълум қилган.

Собиқ Иттифоқда Михаил Горбачёв бошқаруви даврида Муҳаммад Содиқ Муҳаммад Юсуф махсус элчи сифатида Афғонистонда асирга олинган совет аскарларини озод қилиш бўйича музокараларни бошқарган.

2004 йилда Бесландаги мактабда жангарилар одамларни гаровга олганда, Шайх ҳазратлари Россия Президенти Владимир Путинга маслаҳатчи бўлгани маълум.

Айни пайтда дунёнинг турли бурчакларидан Шайх Муҳаммад Содиқ Муҳаммад Юсуф вафоти муносабати билан таъзиялар изҳор қилинмоқда.

10 март тунида Шайх ўлимидан бироз ўтиб, у асос солган islom.uz веб-cайти хакерлар ҳужумига учраган.

islom.uz сайти фаолияти ишдан чиққан.

Омонилла Каримов исмли фойдаланувчи: Qadrlari ana endi bilinadi. Yanada koproq. Ustoz ulgan bulsalarda qilib ketgan ishlari yashaydi. Abu muslim aka websaitni tezda tiklashiz kerak, деб ёзади.

Abdurahmon Moydinov: Устоз нурли зот эдилар, хаёлимда тирикдек.

Irfon Shodil: Дуо қиламиз ва Аллоҳдан сабр сўраймиз. Ислом оламидаги энг оғир йўқотиш бўлди. Шайхимизни Аллоҳ раҳматига олсин, жойлари жаннатдан бўлсин!!!

Doston Anvarovich Ibragimov: Bunday Zotlar yuz yilda bir marta tug’iladi. Islom quyoshi so’ndi..:(( Alloh barchamizga sabr bersin!

Азамат Коржовов: Аллоҳ раҳматига олсин! Неча миллион одамнинг халоллик сари бурилишга сабабчи булганини биз – бандалар санаёлмаймиз, ёлгиз Аллоҳ

билгувчидир. Хизматлари улуғ шайх хазратларининг жойи жаннатда бўлсин!

Бек Кадыров: Олимнинг ўлиши оламнинг улишидир. Инна лиллаҳи ва инна илайҳи рожиун.

Abu Hayrulloh: Жуда кўп саволларим бор эди у зотга, афсус… Аллоҳим роҳматингга муҳтожмиз.

Herolion: Жой,тобут талашиб тўполон қилганларни тушунишга ҳаракат қиламан, ихлос.. лекин видеога олишга ҳаракат қилганларни тушунишни истамасам керак. @Aslanov: Яхшироқ чиқиши учун дарахтни тепасига осилволиб, видео/расмга олганлар бўлдими-ей… Товба қилдим. @AmirShax: Албатта, Ҳазратнинг ҳақларига ҳамма дуога қўл очган вақтда атрофдагиларни видео олиб турганлар бўлди-ю.

Баҳодир Элибоев, Ижтимоий тармоқларда Шайхнинг о’лимлари ҳақида ўқиб кайфият тушиб кетди. Ойимга “Шайх вафот етибдилар” десам, олдинига ишонмадилар. Кейин еса “Ўзбекистон яхши бир одамидан ажралибди-да. Жойлари жаннатда бўлсин!” дедилар.

Онамга Шайхнинг китобларидан олиб келиб турардим. Баъзан ўзимга ҳам ўқиб берардилар “эшит, нима деяптилар” деб…

У кишидан бизга китоблари мерос қолди. Гарчи янаям кўпроқ китоблар қолдиришлари мумкин еди. Умр битган екан. Жойлари жаннатда бўлсин!!!

Адҳам Отажонов шундай сатрларни битган Фейсбукда:

Кўзларимизни ёшлаб, Кўнгилларимиз ғашлаб, Биз ғарибларни ташлаб, Устозим кетиб қолди!

Мардона эди сўзсиз, Илмда дарё, тенгсиз, Бўзлатиб бизни, эссиз, Устозим кетиб қолди!

Номи Муҳаммад Содиқ Минг фазилатга лойиқ, Бир яратганди, Холиқ! Устозим кетиб қолди!

Аброр энди бардам бўл, Шогирдмисан, махкам бўл! Етимларга малҳам бўл! Устозинг кетиб қолди!

Би-би-си Ўзбек хизмати билан Whatsapp орқали боғланишни истасангиз, телефонимиз: +44 78-58-86-00-02

ББС