Пушкинода тартибсизликлар: Москвадаги футбол ишқибози ўлимида ўзбек гумон қилинмоқда
Москванинг «Спартак» футбол клуби ўлдирилган ишқибози Леонид Сафьянниковни хотирлаш учун тўпланганлар Москва вилояти Пушкино шаҳрида тўс-тўполон келтириб чиқаришди, дея хабар бермоқда «Говорит Москва» радиостанцияси.
Twitter фойдаланувчиларининг ёзишича, Сафьянников ўлдирилган Пушкинодаги темирйўл вокзали яқинида 300га яқин одам тўпланган. Айни вақтда, «РИА Новости» ахборот агентлигининг Москва вилояти милициясига асосланиб хабар беришича, тўпланганлар сони 500 нафар атрофида бўлган.
Оломон аввалига шаҳар маркази бўйлаб юриш қилган, сўнг Серебрянка кичик тумани ичкариси томон кириб боришни бошлаган. Айни вақтда, намойишчилар ортидан милиция махсус бўлинмалари ҳаракат қилиб борган. «РИА Новости»хабарига кўра, вайронагарчиликлар рўй берганидан сўнг, 43 киши ҳибсга олинган.
Бошқа маълумотларга кўра, намойишчилар Пушкино маъмурияти биноси олдида митинг ўтказишмоқда. Аввалроқ, намойишчилар шаҳардаги «Альянс-отель»га йўл олгани, бироқ милиция махсус бўлинмалари бу меҳмонхонани ўраб олгани ҳақида хабар берилган эди. Ҳалок бўлган ишқибозтарафдорларининг фикрича, бу меҳмонхонада меҳнат муҳожирлари истиқомат қилади.
22 ёшли Леонид Сафьянников 13 май куни у ва яна икки киши ўртасида келиб чиққан низо натижасида ҳалок бўлган; Россия ОАВ хабарларига кўра, икки кишидан бири 25 ёшли ўзбекистонлик Жаҳонгир Аҳмедов бўлган.
Хабар беришларича, аввалига Сафьянниковни дўппослашган, сўнг автомобиль авариясини саҳналаштиришган. Кейинроқ Аҳмедов таксичилардан бири билан Сафьянниковни шифохонага олиб борган ва ёш йигит шифохонада вафот этган. Низода қатнашган иккинчи эркак жиноий ишда гувоҳ сифатида қатнашмоқда. Гувоҳларнинг сўзларига кўра, у муштлашувда қатнашмаган.
Яна хабар қилишларича, муштлашувнинг эртасига Аҳмедов Ўзбекистонга учиб кетган. Бироқ, Москва вилояти милицияси бошлиғи ўринбосари Олег Толдоновнинг сўзларига кўра, гумонланувчи пайшанба куни Ўзбекистонда қўлга олинган ва уни Ўзбекистондан Москвага жўнатишлари кутилмоқда.
МАҚОЛАНИ ДЎСТЛАР БИЛАН БАҲАМЛАШИНГ