Исмат Хушев: Ички Ишлар вазири нега ишдан олинди?

---

 
 Исмат Хушев: Ички Ишлар вазири нега ишдан олинди?

Сирли “Олтин кўзалар” қачондир чил чил бўлади…

Журналист шарҳи

 

1.

Бугун расмий ўзбек матуботида ички ишлар вазири Баҳодир Матлюбовнинг ишдан олингани ҳақида  хабарлар пайдо бўлди.

Бундан тахминан бир йиллар муқаддам 60 ёшга тўлиши муносабати билан у кишига Ўзбекистон Президенти Фармонига мувофиқ  давлат мукофоти (орден) топширилган эди.

Республикадаги  жиноий (криминал) вазият ёмонлиги ва туғишган укаси – Тошкент шаҳридаги Яккасарой район ички ишлар бўлими бошлиғи Жамшид Матлюбов хонадонида ўлим топган хонанда Дилнура Қодиржонова руҳи ҳаққи ҳурмати биз бу фожеага ака сифатида бевосита масъул бўлган вазирнинг истеъфосини талаб қилиб шеър битган эдик.

Лекин ўз ўрнига номуносиб укасига кўнгилчан вазирнинг ишдан олиниши бугунга қадар чўзилиб келди…

 

2.

Менинг назаримда, генерал полковник Матлюбов   –  қариндош уруғлари – яқин кишиларининг қуюшқонга сиғмайдиган ножўя ҳатта ҳаракатлари қурбонига айланди.

Ўзбекистон Олий раҳбариятида, афсуски,  бундай тоифадаги мулозимлар  оз мунча эмас.

Сиёсий майдонга чиққан катта раҳбар нафақат ўзининг қадамини ўйлаб босиши, балки ўз оиласига мансуб бўлган ҳар бир қариндош уруғи ва яқинларининг ҳатти ҳаракати учун ҳам шахсан жавобгар эканлигини бир дақиқа ҳам унутишга ҳаққи йўқ.

Акс ҳолда уларнинг қандай қадам ташлаётгани – шу жумладан минаётган автомобили, яшаётган ва қураётган уй жойлари, ҳатто юриш туришидаги одамлар  билан муомиласидаги қиёфаси ҳам халқнинг доимий назарида бўлади.

 

3.

Бу масалада ўтмишда ўзбек мулозимларига катта ибрат мактаби бўлган Файзулла Хўжаев, Усмон Юсупов, Шароф Рашидов, Нормуҳаммад Худойбердиев  ва бошқа бир қанча катта-кичик масштабдаги раҳбарларнинг оиласи ҳақида кўчага бирорта гап сўз чиқмаганига тарих шоҳид.

Афсуски, кечаги ва бугунги тарихимизда оилавий ҳаёти билан кўпчиликка ўрнак бўлолмаган талай раҳбарларни кўрамиз.

Бир пайтлар давлат ва  ҳукуматнинг энг олий чўққиларида турган Собир Камолов, Нуриддин Муҳиддинов, Иномжон Усмонхўжаев, Рафиқ Нишоновларнинг оилавий ҳаёти хусусида бошланган турли туман шов шувлар ҳануз тингани йўқ, халқ орасида вақт бевақт акс садо бериб турибди.

Лекин ажабки, бугунги ҳаётимиз олдида уларнинг ҳатти ҳаракатлари  ва оилавий ҳангомалари ип эшолмай қолди…

 

4.

Ўн уч йил мустақил Ўзбекистоннинг мустақил вилоятини мустақил  бошқарган Самойиддин Хусенов Бухоро халқини қай даража “қайта тарбиялаш” га урингани ҳолда ўзининг икки ўғлига Бухоро амирлиги эшикларини очиб бериб қўйганлигини қандай изоҳлаш мумкин?

Бутун вилоятнинг нефт – газ таъминоти узоқ вақт Бухоронинг янги амири – оиласининг қўлида эканлигини ҳуқуқ органларидаги “зийрак кўз”лар наҳотки кўрмаган ва билмаган бўлсалар?

Афсуски, мустақил Ўзбекистонда қуюшқондан аллақачон чиқиб кетган ва дунё олигархлари билан бемалол беллашаётган қатор раҳбарлар борки, улар ҳали ҳануз юзидан ниқобини туширгани йўқ…

Бу сирли “олтин кўзалар” эртами кечми албатта чил чил бўлади.

(Биз бу мавзуга яқинда батафсил қайтамиз)

 

5.

Мана шу нуқтаи назардан Баҳодир Матлюбовнинг тақдири бугунги мустақил Ўзбекистон раҳбар кадрлари учун қайсидир маънода аччиқ сабоқ бўлмоғи керак.

Бироқ Баҳодир аканинг шахси ҳақида халқ ўртасида ижобий фикр мавжуд эди. Ундан ҳамма мансабларни ва унвонларни юлқиб олиш мумкин. Бироқ Баҳодир Матлюбовнинг характери ва тарбиясидаги чуқур зиёлиликдан кўз юмиб бўлмайди.

Хушбичим қоматли ва ғоятда истаралик бундай кўнгилчан ички ишлар вазирининг ўзбек халқи пешонасига яна қачон битишини ёлғиз худо билади…

 

6.

Бизнинг фикримизча, Ислом Каримовнинг куч ишлатар тизимлари бўйича қабул қилган бугунги қарори  кейинчалик Бош прокурор, Олий Суд раиси ва ҳаттоки Миллий Хавфсизлик Хизмати раҳбарларига ҳам тааллуқли бўлиши мумкин.

Мамлакатда бошланаётган сайлов олди вазият Президентдан ҳали кўп қурбонлар талаб қилади…

Бу қурбонларнинг дастлабкиси сифатида бугун ишдан олинган ички ишлар вазирига нисбатан бизнинг кўнглимизда ғаразимиз йўқ эди.

Фақат бир талай масалаларда эътирозимиз бор эди, холос.

Шулардан бири – бетакрор ва гўзал санъаткор Дилнура Қодиржонованинг бевақт ва кутилмаган ўлими эди…

 

7.

Олтмишга тўлибсиз, жаноб генерал,
Юлдузли кунлар ҳам якундур энди.
Мансаб тақдири ҳам бугун-эрта ҳал,
Истеъфо они ҳам яқиндур энди…

Кексалик, нафақа, фахрийлар сафи,
Қабул қилармикан буни тафаккур.
Сизга ҳам Зокиржон Алматов каби,
Давлатдан – “Нишон”у, халқдан – “Ташаккур”…

Энди яшаш керак ҳамма қатори,
Таъзим ва хушомад, йўриқчиларсиз.
Ҳали бу кунларнинг тутар хумори,
Котиба, ҳайдовчи, қўриқчиларсиз…

Энди ортда қолар шаҳаншоҳ дамлар,
Шунга еткизганга ҳам шукур энди.
Фақат бош кўтариб эски аламлар,
Қилмаса бас Сизни беҳузур энди…

Исмат Хушев,

 

 R.S.

Маълумки, янги тайинланган вазир Адҳамжон Аҳмадбоев асли Миллий Хавфсизлик Хизмати мулозими.

У бундан роппа роса етти йил муқаддам Баҳодир Матлюбов билан бирга вазирликка даъвогарлик қилган эди.

Лекин “Энди бўлди бўлди” деган шов шув тарқалганидан кейин негадир Баҳодир Матлюбов номзоди ўтиб, Адҳамжон Аҳмадбоев унга биринчи ўринбосар бўлади…

Ва ниҳоят бугун  Аҳмадбоев ўз орзусига етди.

Янги вазир ҳали кўпчилик учун “сирли сандиқ” – унинг ичида асли нима борлиги ҳақида фол очиш қийин.

Бироқ, бизни шу нарса ҳушёр торттирадики,  куч ишлатар органларидаги асосий уч фигура  – Ўзбекистон Бош прокурори Рашитжон Қодиров, Ички Ишлар вазири Адҳамжон Аҳмадбоев, Миллий Хавфсизлик Хизмати раиси Рустам Иноятов бир мактаб – МХХ кадрларидир – бир “коллегия” аъзоларидир.

Бу уч идоранинг боши бирикиб – бир чўққига ҳамла қилганда, Ўзбекистонда унга бас келадиган бошқа куч йўқ.

Тарихда бу кучлар бир ёқадан бош чиқариб, биргаликда ҳаракат қилганда халқнинг оёғи бир этикка суқулиб, бу кенг дунё унинг кўзига доимо тор бўлган.

Узоққа бормайлик, Сталин даврида бу вазифаларнинг ҳаммасини  ёлғиз Лаврентий Берия қўлга олган эди, натижаси ўзингизга маълум…

Кўп ҳолларда биринчи раҳбар қайси соҳадан бўлса, унинг изидан шу соҳанинг янги кадрлари оқиб келишига йўл очилади. Бу эса жуда хатарлидир.

Хуллас, ички ишлар вазирлигида катта ўзгаришларга йўл очилди.

Бу вазирликнинг кўп йиллик ўзига хос мустаҳкам пойдевори секин аста нураши мумкин…

 Суратда: Собиқ Ички Ишлар вазири Баҳодир Матлюбов…

 

МАҚОЛАНИ ДЎСТЛАР БИЛАН БАҲАМЛАШИНГ