САМАРҚАНД ҚИШЛОҒИДАГИ КОНЦЛАГЕРЬ ЁХУД УЧЛАР ИТТИФОҚИНИНГ ИНҚИРОЗИ

---

 

Ушбу мақола Ф.Раджабова ва Г.Дўстмуродоваларнинг “Эъзгулик” жамияти раиси Васила Иноятовага ёзган шикоятларига илова этилган Самарқанд вилоят прокуратураси томонидан 30.01.2009 йилда қўзғатилган № 31/20014-сонли жиноят иши бўйича суд ҳукми ва суд баённомасидан олинган ҳужжатлар асосида тайёрланди.

(Суратда: Бош прокурорнинг собиқ мулозими Алишер Озодович Шарофуддинов)

2009 йил 30 январь куни Самарқанд шаҳар, Боғдод кўчаси, 1-уйда содир этилган мудҳиш қотиллик бўйича суд ҳукми билан умрбод озодликдан маҳрум этилган Арсен Аганов , ака-ука Эргашевлар аслида мутлақа айбсиз эканлиги тўғрисидаги инкор этиб бўлмас важлар, алибилар Ўзбекистон Ёзувчилар уюшмаси аъзоси Хамроқул Асқарнинг Ўзбекистон Республикаси Президенти Ислом Каримовга ёзган очиқ хатида чуқур ва атрофлича таҳлил этилган.

Айни пайтда биз ҳам мазкур ишга оид ҳужжатлар асосида тадқиқот олиб бораётганимиз боис, очиқ хатда қайд этилган тергов даврида таъзийқ ва қийноқлар билан мажбурий кўргазмалар олиш давом этаётгани, судлар прокурор тасдиқлаган айблов хулосалари асосида ҳукм чиқараётгани, тергов ва суд пайтида адвокатларнинг ҳуқуқлари чекланаётгани билан боғлиқ муаммолар айни кунларда ҳам долзарблиги боис ўз мулоҳазаларимизни билдиришни лозим топдик.

Суратда: Ўзбекистон Олий суди раиси Бўритош Мустафоев

Бутун Республикада катта шов-шув бўлган Боғдод кўчасида содир бўлган қотиллик бўйича Самарқанд вилоят прокуратураси томонидан қўзғатилган № 31/20014-сонли жиноят иши бўйича тузилган тергов гуруҳи фаолияти Бош прокурор ўринбосари А.О.Шарафутдиновнинг шахсан назоратида бўлган ва у Самарқанд вилоят прокуроридан ҳар куни маълумот олиб, зарур кўрсатмалар бериб турган. Мазкур жиноят иши ҳужжатлари билан билан танишган одамда беихтиёр, собиқ ички ишлар ходими А.О.Шарафутдинов Бош прокурор ўринбосари бўлганидан сўнг ҳам қарға қарғанинг кўзини чўқимайди., деган ақидага амал қилиб, милиция ходимларининг ноқонуний қилмишларини хаспўшлаб,  раҳнамолик қилиб келган., деган асосли мулоҳаза пайдо бўлади. Мутал Андижоний тахаллуси билан интернет тармоғи сайтларида эълон этилган “37- йил аломатлари” сарлавҳали олдинги мақоламда қайд этганимдек, мазкур ишга оид ҳужжатлар таҳлили бевосита Алишер Шарафутдинов Бош прокурор ўринбосари лавозимини забт этгач, сезиларли тарзда суд – прокуратура – милиция иттифоқи янада мустаҳкамланганлигини яққол тасдиқлайди. Сталин қатоғонидан фарқли ўлароқ, бу Иттифоқга МХХ маҳкамаси қўшилмади!

2010 йил 16 сентябрда Ўз.ТВнинг 1-канали “Бир жиноят изидан” номли кўрсатув орқали: – Бош прокуратура ва Самарқанд шаҳар ИИБ ходимлари томонидан қотиллар қўлга олиниб, ўта мудҳиш жиноят фош этилди., деб ЖПКнинг 23-моддасига хилоф тарзда ҳали суд ҳукми қонуний кучга кирмасидан туриб,  бутун Республикада шов-шув кўтариб, ҳатто давлат раҳбарига рапорт берилган бўлсада, аслида Боғдод кўчаси, 1-уйда содир этилган қотиллик бўйича ЖИБ Навоий вилоят судининг 12.07.2010 йилдаги ҳукми билан умрбод озодликдан маҳрум этилган А.Аганов ва ака-ука Эргашевларнинг айби на тергов, на суд жараёнида мутлақа исботланмаган!

А.О.Шарафутдинов қайта асос солган учлар иттифоқининг кучи ҳатто қонундан ҳам қудратли эканлиги шунда кўринадики, қотиллик содир бўлган  Боғдод кўчасидаги 1-уйнинг  17-хонадондан: – Ички ишлар ходими Жўраев Фарҳод Ашуровичнинг № 7415 рақамли хизмат гувоҳномаси топилган?! ИИВ ходими учун хизмат гувоҳномасини йўқотиш – ўқотар қуролни йўқотиш билан тенг!  Воқеа жойини кўздан кечиришда қатнашган экспертлар Ф.Жўраевнинг гувоҳномасини суратга олиб, аъшёвий далил сифатида расмийлаштирган бўлсаларда,  тергов гуруҳи раҳбари Азим Саттаров ушбу ҳолат бўйича бирон марта суриштирув ўтказмаган?!  Суд пайтида сўралганида А.Саттаров: – хизмат гувоҳномаси марҳумларнинг отаси Фозил Шариповнинг ҳамкасбига тегишли бўлгани учун, жабрланувчиларнинг илтимосига асосан уни жиноят иши материалларидан чиқариб ташладим., ҳозирги пайтда Ф.Жўраев ИИВ соҳасида ишламайди., деб жавоб берган?! Бирон бир сабаб, ёки манфаати бўлмаган терговчи жабрланувчининг илтимоси билан далилий аъшёдан воз кечиши мумкинми?! Муҳим далилий аъшёни яшириш жиноят бўлса, нега терговчи А.Саттаров ҳануз озодликда юрипти?!. Фозил Шарипов хотини билан Америкада ишлаётган,  2006 йилдан буён уйига келмаган бўлса, Ф.Жўраев хизмат гувоҳномасини бу ерда қачон қолдирган?! А.Саттаров айтганидек, Ф.Жўраев ишдан кетмаган, аксинча мансаби кўтарилиб, айни пайтда Ички ишлар вазирлигида маъсул лавозимни эгаллаб турипти?! Ушбу муҳим маълумотдан А.Шарафутдинов, Ички ишлар вазири Б.А.Матлюбов бехабар., дейсизми?! Аксинча, бу зотлар жуда яхши бохабар, чунки адвокат А.Шахназарян криминалистика бўлимининг муҳри босилган ушбу гувоҳноманинг рангли фотосини тергов давридаёқ Бош прокурор, Ички ишлар вазири ва бошқа маҳкамаларга юборган бўлсада, ҳанузгача Ф.Жўраевга оид текширув ўтказилгани йўқ?! Суд пайтида ҳам бу савол очиқ қолган! Агар, Ф.Жўраевнинг қотилликга дахли бўлмаса, учлар Иттифоқи нега ушбу далилий аъшёга оид маълумотни махфий тутмоқда?!

Ушбу ҳол табиий равишда,  қотиллик ким томонидан ва қандай содир этилгани маълум бўлгани ҳолда, тергов гуруҳига қотилни бошқа жойдан., излаш ҳақида махфий топшириқ ва чекланмаган ваколат берилган., деган асосли шубҳа уйғотади. Тергов гуруҳи томонидан жиноятни фош этиш ниқобида содир этилган соғлом ақл қолипига сиғмайдиган ваҳшийликлар эса ушбу шабҳани тасдиқлайди…

Қотиллик содир бўлган хонадондан топилган далилий аъшёни яшириб, қотилликга мутлақа алоқаси бўлмаган юзлаб фуқоролар гумон остига олинишининг ўзи нафақат қонун, оддий ҳаёт мантиғига хилоф?!  Қотилликда айбланган Арсен Аганов 30 январь куни Тойлоқ туманида бўлганлигини кўрган гувоҳлар тасдиқлаган. Ака-ука Эргашевлар ўша куни ўз уйларида марҳум боболарининг 20 кунлик маъракасида қатнашгани тўғрисида 37 нафар маросим қатнашчилари имзолаган далолатномани Булунғур туман “Улуғбек” маҳалласи раиси тасдиқлаб вилоят прокурори ва терговчига топширган бўлсада, ушбу алибилар инобатга олинмаган?! Лекин, Ф.Жўраев менинг ҳамкасбим уни текширманглар деган., жабрланувчи Ф.Шариповнинг илтимоси инобатга олинган?! Бунинг устига, қотиллик содир бўлган хонадондаги 16 турдаги қимматбаҳо тилло тақинчоқлар,  ноутбок, 507 АҚШ доллари., ўз жойида тургани ҳолда дастлаб қасддан содир этилган деб очилган жиноят ишини А.Шарафутдинов сафарбар этган янги тергов гуруҳи раҳбари, Бош прокуратура терговчиси С.Бердиалиев: – қотиллик босқинчилик мақсадида содир этилган., деб қайта малакаланган?!

Шахсан А.Шарафутдиновнинг топшириғи билан иш олиб борган С.Бердиалиевга Ў.Норшодиев мактабида таҳсил олган жангарилар тажрибаси қўл келган. Ў.Норшодиев ишни шундай режа асосида ташкил этганки, терговга жалб этилганлар пешма-пеш самарқандликлар “концлагерь” деб ном қўйган Самарқанд туман ИИБ ВСҲга ўтказилиб, қийноқшунос Ҳусейн Муродов ва Алишер Эгамбердиевлар томонидан “ишлов” берилгач, бу шўрликлар терговчи нима деса шундай ёзиб бериб, ҳатто қотилликка ҳам иқрор бўлганлар.

Самарқанд шаҳридаги Олимпия захиралари касб-ҳунар коллежи мураббийси Рауф Эшқулов ва унинг ҳамкасби Рустам Синдаров: – М.Исломова ва унинг укаси Ўлмасбекни биз ўлдирганмиз., деб 2009 йил 13 сентябрда иқрорлик аризаси ёзганлар. Р.Эшқулов ва Р.Синдоровлар терговчи айтган барча гапларни сўзма сўз ёзиб, имзолаб, воқеа жойи схемасини аниқ чизиб., ҳатто улар қотилликни қандай содир этганликлари бўйича воқеа жойида видеофильм ҳам олинган…

Мазкур қотиллик бўйича гумонланган Ойбек Шодмонов, Элбек Ҳақбердиев, Жаҳонгир Ҳамроқулов, Арсен Аганов, ака-ука Исомиддин, Низомиддин, Сирожиддин Эргашевлар ҳам Самарқанд Сельский концлагерига ўтказилгач, уларга противагаз кийгазиб калтаклаб,  электрошок орқали қийноққа солганлар. Ушбу қийноққа солинганларнинг А.Агановдан бошқа ҳаммаси қотилликни содир этганман., деган мазмунда иқрорлик кўргазмаси берганлар?! ЖИБ Навоий вилоят судининг 2010 йил 19 майдаги баённомасида Низомиддин Эргашевнинг: – ИИБ ходимлари уларнинг кўз ўнгида: – агар, иқрор бўлмасаларинг оналарингни олиб келамиз., деб отасини калтаклаганлари, отасининг кўз олдида уларни электрошок билан қийнаганлари., тўғрисидаги баёноти қайд этилган! Адвокат К.Ҳусенов тергов пайтида Низомиддиннинг оёқ бармоғининг тирноқлари қўпориб олинганлигини., кўрсатиб экспертизадан ўтказишни талаб қилсада, адвокатнинг қонуний талабини, судья Н.Ҳотамов Навоий вилоят прокурори ёрдамчиси Ш.Ғаффоровнинг эътирози асосида рад этган?! Низомиддиннинг отаси Ўроқбой Эргашев судда: – мени 2010 йил 07-19 январь кунлари Сельский туман ВСҲда уриб дўппослаганларида Фозил Шарипов ҳам иштирок этди., деб баёнот берган?! ВСҲда расман қайд этилмасдан, 12 кун қийноққа солинган Ў.Эргашевни калтаклашда марҳума М.Исломованинг ўгай отаси, собиқ ички ишлар ходими Ф.Шариповнинг иштирокини қандай изоҳлаш мумкин?! Бу одам жабрланувчими ё ҳақийқий қотил фош этилмаслигидан манфаатдорми?! Иш шу даражага борган экан ушбу жабрланувчи отаю, онанинг ўзлари аслида кимлиги., ушбу қотиллик билан уларнинг ўтмиши орасида боғлиқ жиҳатлар ҳам аниқланиши лозим. Манзура Каримова нима учун олдинги эридан бўлган қизига иккита туғилганлик тўғрисида гувоҳнома олган?! Ушбу гувоҳномаларга кўра бири 1998 йилда, иккинчиси 1990 йилда Исломова Мадина Аъзамовна деган иккита шахс мавжуд бўлиб унга Самарқанд шаҳар ИИБ томонидан берилган иккита паспорт, қандай мақсадда олинган?! Терговчи, А.Саттаров яна ўша қарға., удумига риоя қилиб М.Каримованинг биринчи эри ҳам ички ишлар ходими бўлганлиги туфайли содир бўлган қотилликка алоқадор эмас., дейишга изн бермайдиган ушбу ўта муҳим муҳим маълумотларни атай четга суриб қўйган…

Шўрлик Ў.Эргашевни  12 кун қийноққа солиб зарур кўргазмалар олишга эришган терговчи А.Саттаров, яъна таъзийқ остида шўрлик отадан: – Афсус, мен болаларимга нотўғри тарбия берган эканман., деб мажбуран гапиртириб видео тасвирга ҳам олган?! Кейинчалик унинг тергов ҳибсхонасида айтган бу сўзларини телевидения мухбирлари “Бир жиноят изидан” деган кўрсатувга анонс қилишиб ойнаи жаҳон орқали олти маротаба намойиш этишгач., юраги дош бераолмаган Ў.Эргашев суддан сўнг кўп ўтмай вафот этган!

Қотиллик бўйича жиноий шерикликда айбланган Н.Юсуфова тергов даврида мазмунан бир-бирига қарши 5 хил кўргазма берган?! Унинг: – 30 январь куни Пастдарғом туманида уйимда бўлганман, менга сув ва овқат бермасдан қийнашгач, ИББ ходими Алишернинг таъзийқи остида, ҳар гал у айтганидек кўргазма берганман., деб суд залида айтган сўзлари ҳам суд баённомасида қайд этилган! Бор ҳақиқатни судда айтиб оқланиш мумкин бўлган замонлар ўтиб кетди, ҳозирги судьялар фақат айблов хулосасидаги кўргазмалар асосида ҳукм чиқаришини шўрлик Н.Юсуфова қаердан билсин?!

Р.Эшқулов ва Р.Синдоровларга нисбатан айблов сирли тарзда С.Бердиалив томонидан бекор этилгач,  Ў.Норшодиевнинг тезкор жангарилари Ҳ.Муродов, А.Эгамбердиевлар алоҳида топшириқ бўйича, 2009 йил 22 декабрь куни А.Агановни вилоят прокуратурасига алдаб чақириб, худди эски қадрдонлардек: –  бир чой олиб берай ҳам демайсан., дейишгач, А.Аганов уйидан бир шиша ароқ ва 100 000 сўм пул олиб чиқиб уларни кафеда меҳмон қилган. Улар А.Агановни кўча бошида тушириб кетган заҳоти, бир номаълум шахс келиб уюштирган жанжал туфайли, уни самарқанд шаҳар 5-ИИБга олиб бориб тинтув ўтказганларида, унинг сигарети қутисидан 0,05 грамм наркотик чиққан?! Ушбу фитна иш  бўйича Ў.Норшодиевнинг “штатсиз” жосуси И.Саиджонов –  жабрланувчи, муқаддам олти марта судланган Т.С.Шалкаров, уч марта судланган  – М.Аюбовлар холис сифатида жалб этилиб тез расмийлаштирилган 18 варақдан иборат ҳужжатларни Самарқанд шаҳар 5-ИИБ бошлиғи подполковник Х.Носиров 2009 йил 23 декабрь кунги № 1589 – сонли чиқиш хати билан Самарқанд шаҳар ИИБ ТБ бошлиғи подполковник Ў.Норшодиев дарҳол тасдиқлаб шаҳар прокурори А.А.Зокировга юборган. А.Зокиров ўша куниёқ қарорни тасдиқлагач., ЖИБ Самарқанд шаҳар судининг судьяси О.Пардаев ҳам худди шу 23 декабрь куни: – А.Агановни Ўз.Р.ЖКнинг 25 ва 273-моддаси 5- қисми билан айбдор деб топиш ва Каттақўрғон шаҳар тергов ҳибсхонасида сақлаш тўғрида., ажрим чиқаран. Лекин, А.Аганов Каттақўрғонга эмас, Сельский концлагерига юборилган?! Бу ерда уни А.Эгамбердиев, Ҳ.Муродов бошчилигидаги жами етти нафар тезкор жангарилар қип яланғоч ечинтириб, кишанлаб, противогаз кийгазиб роса калтаклашган…

Кейинчалик, 2010 йил 13 март куни Самарқанд вилоят ИИБ терговчиси Д.К.Нарзиев адвокат А.А.Шахназарян олдида тергов қилганида А.Аганов тергов баённомаси охирига ўз қўли билан: –  Менга қўйилган айбловни мутлақа тан олмайман! Мени 23 декабрь куни Селбсий ВСҲда калтаклашгач., қанча вақт ҳушсиз ётганимни билмайман. Ҳушимга келганимда яна ўшалар скамейкага боғлаб калтаклашди., сўнг столга ётқизган ҳолда  бири кўкрагимга сим тиқиб электр билан, иккинчиси дубинка билан оёғимга уриб: – қотиллигинг исбот бўлмаса, барибир наркотик билан қамаласан., деб қийнашди. Шунда мени қотилликда айблаш учун ўша куни тушликка борганимизда наркотикни сигарет қутисига Алишер солиб қўйганлигини  тушундим., деб ёзиб имзо қўйган.

С.Бердиалив на фақат Ў.Норшодиевнинг шотирларидан фойдаланган, ҳатто унинг хизмат хонасида ҳам билган номаъқулчиликни қилаверган. Нафақадаги кекса ёл Моҳира Аббасованинг Ўзбекистон Республикаси Президенти И.Каримовга ёзган шикоятига кўра уни: – 2009 йил 20 декабрь куни Самарқанд шаҳар ИИБга олиб боришгач, уни 2-қаватдаги кабинетга сочидан судраб олиб киришиб қип яланғоч ечинтириб., противогаз кийдириб дубинка билан урганлар. Терговчи С.Бердиалиев бошига баклашка билан ургач ҳушдан кетган. Ҳушига келгач, кўз ўнгида А.Агановни ваҳшиёна калтаклашган! Ўша куни уни кутиб ўтирган  9 ойлик ҳомиладор қизи Насибага терговчи Азим Саттаров: – туққанингдан сўнг боланг болалар уйига топширилади, шикоят ёзсанг онангга ёмон бўлади., деб огоҳлантириб кечаси соат 23:00 ларда жавоб берган?! Шундан сўнг онасидан хавотир олиб борган М.Аббасованинг ўғли Дилшодни ҳам олиб қолишиб, онаси билан бирга Самарқанд туман ИИБ ВСҲга ўтказишган. М.Аббосованинг ортидан келган ҳомиладор қизи, келини норасида невараларига  терговчи С.Бердиалиев: – бу аёл катта пул эвазига А.Агановнинг қотиллигини яшираяпти., деб таъзийқ ўтказиб уларни кечаси 24.00 гача ушлаб ўтирган! Шу тариқа 59 ёшли  кекса аёл, гувоҳ М.Аббасова Сельский концлагерида 17 кун ноқонуний сақланган ва қийноқлар остида мажбурий кўргазмалар олинган…

 

Мазкур қотилликда гумонланган Д.М.Бойқобилов, П.Мўминовларга нисбатан Самарқанд шаҳар ИИБ ходимларининг ташаббуси билан Ўз.Р. ЖКнинг 97-моддаси, 2-қисми билан № 31/27363-сонли жиноят иши қўзғатилиб, вояга етмаган бу ўспиринлар ҳам қийноқлар остида: –  2009 йил 30 январь куни 1988 йилда туғилган М.Исломова ва унинг 9 яшарлик укаси Ўлмасбекни бизлар ўлдирганмиз., деб ўзлари содир этмаган қотилликни бўйинларига олишга мажбур бўлганлар?! Бу ўспиринларнинг ота-оналари Ўз.Р.Ички ишлар вазирига ёзган шикоятни ИИВ ТБ бошлиғи ўринбосари А.А.Исломов 10.02.2011 йилда Бош прокуратурага юборгач, Ў.Норшодиевнинг ташаббуси билан қўзғатилган 31/27363-сонли сохта жиноят иши бекор бўлсада, бу ўспиринларни ҳам руҳий, ҳам жисмоний майиб қилган ваҳшийлардан бирортаси жазолангани йўқ!

 

Ушбу жиноят иши бўйича шу қадар бегуноҳ инсонлар қийноққа солинганки, суд Самарқандда бўлса кутилмаган хавф туғилишидан хавотирга тушган А.Шарафутдинов учликнинг ажралмас қисмида мустаҳкам ўтирган Б.Мустафоев ёрдамида бу муаммони жуда осон ҳал қилган. Яъни, суд маҳкамаси ЖИБ Навоий вилоятига кўчирилган! Судья Н.Ҳотамов М.Аббосовадан ноинсоний усуллар билан олинган сохта гувоҳлик кўргазмаси бўйича терговчи С.Бердиалиев тайёрлаган айблов хулосаси асосида А.Агановни 20 минг АҚШ доларини қўлга киритиш мақсадида қотиллик содир этган  жиноий гуруҳ раҳбари., деб эътироф этиб уни ва ака-ука Эргашевларни умрбод озодликдан маҳрум этиш ҳақида ҳукм чиқарган…

 

Ҳатто, ашаддий диктатор И.Сталин ҳам давлат манфаатларини устун билиб асирга тушган ўғлини немис генералига алмашишни рад этганди.  Озод Шарафутдинов: – Ўзбекистон кўп миллатли республика., ўзбек тилини давлат тилига давлат мақоми бериш улуғ рус халқига хурматсизлик., деб  Ўткир Ҳошимов, Бахтиёр Назаров билан  роса баҳслашганини 1989 йилда телевидениеда берилган кўрсатувда кўпчилик кўрган. Муҳтарам танқидчи домламиз мустақилликдан сўнг матбуот орқали тантилик қилиб: – ўз эътиқодимни ўзгартирдим., деб ошкора баёнот бергач., Президент атрофидаги садоқатли шогирдлари кўиагида Ўзбекистон Қаҳрамони бўлди! Шундан сўнг, Қахрамон ўғлининг ҳам омади чопиб Бош прокурор ўринбосари лавозимига кўтарилгач, ногоҳон келган шону–шуҳратдан гангиб отасидан ҳам кўра эътиқодсизроқ эканлигини исботлади…

 

Жиноий қилмишлари фош этилсада,  ҳануз маҳкамага тортилмаганлиги А.Шарафутдинов ҳануз учлар Иттфоқи ҳимоясида эканлигини билдиради. Қудратдан кетсада, шахсан А.Шарафутдинов тасдиқлаган  сохта айбловлар билан ҳукм этилган юзлаб фуқороларнинг ишини қайта кўришни Олий суд ҳеч бир қонуний асоссиз пайсалга солиб келмоқда. Ўзбекистон Президенти И.Каримовга мурожаатларида А.Агановнинг адвокатлари Олий суд назорат тартибидаги шикоятлари бўйича ЖИБ Навоий вилоят архивида сақланаётган жиноят ишини бирон марта чақириб олмасдан туриб., уч йилдан буён юзаки жавоб бераётганлигидан шикоят қилганлар. Олий суд раиси Б.Мустафоев эса уларни қабул қилишдан бош тортган…

 

Самарқандлик танишларимизнинг сўзларига кўра, милиция подполковниги Ўткир Норшодиев қарийб анча йиллар Самарқанд шаҳар ИИБ тергов бўлими бошлиғи, сўнгра ИИБ бошлиғи ўринбосари сифатида фаолият кўрсатиб, терговни фавқулодда тез якунлаб жиноятни фош этиш бўйича фашистларнинг машҳур гестапосига ўхшаш “ўзига хос мактаб” яратган, Ички ишлар вазири назаридаги нуфузли ходимлардан бири бўлган…

 

Яқинда, Самарқанд шаҳар ИИБ бошлиғи ўринбосари Ў.Норшодиев ва бошқа бир неча тергов бўйича маъсул ходимлар МХХ ходимлари томонидан қўлга олиниб., унга нисбатан жиноий иш қўзғатилгач, бу хушхабарни эшитган самарқандликлар: –  ҳар тугул ҳақиқат бор экан деб., МХХ ходимларини дуо қилишмоқда…  

 

Балким, Ў.Норшодиев қилмишига яраша жазосини олар, лекин мутлақа айбсиз А.Аганов, ака-ука Эргашевларга туҳмат уюштирган, ҳатто онаси қатори кекса аёл Моҳира Аббасова, вояга етмаган Д.М.Бойқобилов, П.Мўминов, Сиёвуш Ҳамроқулов каби бегуноҳ ўспиринларни  дўзах азобига солган, Н.Эргашев Ҳусейн Муродов, Алишер Эгамбердиев., каби Ўткир Норшодиевнинг: – озодликда юрган  жиноий шериклари қачон жазоланади., деган хавотир самарқандликларга ҳануз тинчлик бермайди!

 

Чунки, ҳали қувонишга эрта. Чунки, ҳали сохта айбловни тасдиқлаган Алишер Шарафутдинов, терговчи Азим Саттаров, Содиқ Бердиалиевлар кўмагида қутулиб қолган ҳақийқий қотиллар озодликда!

 

Чунки, ҳалигача қотиллик содир бўлган Боғдод кўчасидаги хонадондан хизмат гувоҳномаси топилган Фарҳод Жўраевнинг ушбу жиноятга алоқадорлиги ҳанузгача сир тутилмоқда?!

Яъни, учлик ҳали кучлик…

Муталлиб Шарипов

“Эъзулик” жамияти аъзоси

07.07.2013 йил.

+99890 985-22-59

 

 

МАҚОЛАНИ ДЎСТЛАР БИЛАН БАҲАМЛАШИНГ