Британия: Бугун Маргарет Тэтчер тупроққа қўйилади

Дунё, Сиёсат, Ўтганлар ёди | 17/04/2013 07:54- 11271 марта ўқилди

Собиқ Британия Бош вазирининг дафн маросими британ вақти билан соат 11:00 да бошланади.

Маросимнинг тинч ўтиши учун кучли хавфсизлик чоралари кўрилган ва 4.000 дан ортиқ полиция ходимлари жалб этилган.

Яна ушбу мавзуга оид

Тэтчер хонимнинг жасади Вестминстердан Лондон маркази оша олиб ўтилади ва Авлиё Павел ибодатхонасига келтирилади.

Собиқ британ Бош вазирининг дафн маросимида дунёнинг 170 давлатидан икки мингдан давлат раҳбарлари, Бош вазирлар ва ташқи ишлар вазирларининг иштирок этиши кутилмоқда.

Уларнинг орасида Буюк Британия қироличаси Елизаветта Иккинчи ҳам бор.

Лондон пойтахт полицияси маросим чоғида намойишлар уюштирилиши эҳтимолини ҳам назардан соқит этмаётир.

Тэтчер хоним Британияга 1979 йилдан 1990 йилгача Бош вазирлик қилган.

У Британия тарихидаги ҳозирча ягона аёл Бош вазир саналади.

Маргарет Тэтчер 8 апрел куни 87 ёшида миясига қон қуйилиши натижасида ҳаётдан кўз юмганди.

бу ерга босингТэтчер хоним сиёсий меросига бир назар…

‘Одмироқ дафн маросими’

Маргарет Тэтчер собиқ Бош вазир эканига қарамай, унинг шарафига давлат миқёсида дафн маросими уюштирилмайди.

Унинг ҳарбийча иззат-ҳурмат билан тупроққа қўйилиши кутилмоқда. Бунинг нуфузи эса, бироз пастроқ саналади.

Британия тарихида Тэтчер хонимгача бирор бир Бош вазирнинг ўлими бу каби баҳсу мунозаралар ва қарама-қарши фикрларга сабаб бўлмаган.

Британ аҳолиси орасида у юритган сиёсатдан ҳануз аламзада бўлган инсонлар озмунча эмас.

Шу сабабдан ҳам, Тэтчер хонимнинг дафн маросими чоғида Британиянинг исталган бурчагида намойишлар уюштирилиши мумкинлиги айтилмоқда.

Би-би-си мухбирига кўра, душанба куни Американинг Бостон шаҳрида амалга оширилган қўшалоқ портлаш бугунги дафн маросими учун режаланган хавфсизлик чораларига жиддий таъсир қилмаган.

Аммо полиция кучлари ва аҳолининг янада ҳушёрроқ бўлиши кутилмоқда.

Полиция ходимлари учун ҳозирча асосий бошоғриқ эҳтимолий норозилик чиқишларига қандай муносабат кўрсатиш бўлаётир.

Аён бўлишича, полицияга, “таҳдид қилган, ҳақоратли сўз қўллаган ёки ўзини номақбул тутган” ҳар қандай кишини ҳибсга олиш ҳуқуқи берилган.

Тэтчер хонимнинг британ байроғига ўралган тобути сешанба куни тунда Вестминстер саройи ибодатхонасига қўйилган ва оила аъзолари, парламент аъзолари ҳамда ҳукумат вакиллари иштирокида қисқа дафн маросими ўтказилган.

Авлиё Павел ибодатхонасидаги асосий маросим ортидан эса, Маргарет Тэтчернинг жасади кремация этилади.

Дафн маросими чоғида Биг Бен соатларининг сукут сақлаши айтилмоқда.