Муҳаммад Исмоил: Севги эмас экан кўзингиздаги…
Истеъдодли ўзбек шоири Муҳаммад Исмоил ва Озода Нурсаидова…
ХАВОТИР
Кетаяпман яна саргардон
Дилни тўкди ғуссаларингиз.
Сизга нима бўлди онажон
Бунча чўкди жуссаларингиз.
Қартайибсиз. Кўзим ўяр ғам.
Жазолама кўкда қодир Зот.
Худо бергин онамга малҳам
Яна бир йил бахш этгин ҳаёт.
Ҳар дам учун шукрона айтай
Ҳар дам учун бўлай қарздор.
Ҳар дам учун бошим кўтармай
Сажда қилай токи онам бор.
Унга ўн йил умр бер, Тангрим
Унга юз йил ҳаёт бер, Худо.
Мукка тушиб минг йил сўрардим
Минг йил бизни этмасанг жудо.
Кетаяпман аммо биламан
Айирасан бизларни бир кун.
Тириклайин дорга иласан
Олисларга кетганим учун.
Сўнгра дорда ўтади умрим
Балки бир йил, ўн йил…осилиб.
Қайғулардан қораяр турқим
Қора кунлар нуқси босилиб.
Бизни боғлар ердан Худога
Она берган жоннинг риштаси.
Она лойиқ мангу дуога
Она- кўкнинг ҳур фариштаси.
Кетаяпман яна саргардон
Билолмайман қайтаман қачон.
* * *
Севги эмас экан кўзингиздаги.
Кечиринг, адашдим. Мен қилдим хато.
Алдади мен севган юзингиздаги,
Қоронғу кўнглимни ёритган зиё.
Насиб этган эди қайта яшармоқ.
Кеча кирган эдим, йигирма ёшга.
Яна бошга тушди юз ёшга қайтмоқ.
Бугун тушди яна қаримоқ бошга.
Кеча сизнинг билан эдим бахтиёр.
Бугун юрагимда адоқсиз ҳасрат.
Қилса ҳам бугунги қайғу мени хор,
Аммо кечаги бахт учун минг раҳмат!
SHOIR.UZ bisotidan
* * *
Оллоҳ мўъжизаси, моҳисан, аёл,
Шодлик маликаси, шоҳисан, аёл.
Буюк – буюкликда сенинг тенгинг йўқ,
Оламнинг бахтисан, тожисан, аёл.
Бошимизда тенгсиз, осмонсан ўзинг,
Сен-ла ҳаёт ҳаёт, замонсан ўзинг.
Одамзоднинг ярми аёл бўлса гар,
Қолган ярмин яратган инсонсан ўзинг.
Сен билан топгаймиз ёруғлик, камол,
Ишқда саждагоҳсан, эй соҳибжамол.
Яралгансан фақат муҳаббат учун,
Ҳар қалбда хокими мутлоқсан аёл.
SHOIR.UZ bisotidan
МАҚОЛАНИ ДЎСТЛАР БИЛАН БАҲАМЛАШИНГ