Бош муҳаррир И.Хушевга: Пайариқ ҳокимига туҳмат қилишяпти, Исмат ака…

---

“Дунё Ўзбеклари” сайтининг Бош муҳаррири Исмат Хушевга

Пайариқ туманидаги аҳвол аслида сизга етказилгандек эмас

Сизнинг “Дунё ўзбеклари” номли телеграм канал, ютуб ижтимоий тармоқларидаги сиёсий-ижтимоий муаммолар ҳақидаги муносабатларингизни кузатиб борамиз. Сизнинг фаоллигингиз ва тезкорлигингиз тарафдоримиз. Аммо Самарқанд вилояти ва шу жумладан, Пайариқ туманидаги ҳолатлар юзасидан айрим чиқишларингиз юзасидан муносабат билдирмоқчи эдик.

Пайариқ тумани ҳокими Дилшод Мусиновнинг бизнинг туманда порахўрлик, ерларни истаган одамга ҳатто биз ўйлаб ҳам кўрмаган катта суммалардаги долларларга сотилиши, одамларни хор-зор қилиб, уларга мажбуран узумзорларни кредит эвазига берилиб, бу кредит пулларининг талон-тарож қилинаётганлиги ҳақидаги фикрлар қандайдир бу ердаги умумий ҳаракатлар, мақсадлардан йироқ одам томонидан ёзилиб, сизга етказилаётганлиги аён.

Чунки Азамат Ҳақназаров номи билан материаллар эълон қилиб, бу ном остида яширинган одам, айтиш керакки, сизга мавҳум, нотўғри маълумотларни етказаётганини айтиб қўйишни ўз зиммамдаги вазифа деб билдим. Сизнинг Ўзбекистонда таниқли журналист бўлиб ишлаганингизни ва халқимизнинг тарихдаги шарт-шароитлари, имкониятлари ҳақида яхши тасаввурга эга эканлигингизни биламиз. Айтайлик, бундан 30 йил аввалги шароитларни тасаввур қилсак, эсимизга олсак.

Биласизки, Пайариқ тумани ҳам собиқ иттифоқ тузуми давридан бошлаб пахта яккаҳокимлиги сиёсатидан эзилиб келган эди. Туманда ҳар қарич ердан 6 миллион танна пахта бунёд этиш мақсадида фойдаланилган. На биронта фабрика, завод, тадбиркорликка йўл берилмаган. Халқнинг тадбиркорлик қобилиятлари умуман инобатга олинмаганини, сиз бир журналист сифатида, яхши биласиз. Натижада ишсизликка йўл очилганди.

Биласизки, бу сиёсат халқимизни анча чарчатиб, халқимизнинг ривожланишига тўсиқ бўлган. Мустақилликнинг ўтган 20-25 йилида ҳам туманда айтарлик саноат корхонаси йўқ эди. Халқимиз ер ва қишлоқ хўжалиги билан тирикчилик қилади. Биз Наволи ва Ингичка даштли зоналаридан ер ажратиб, токлар бунёд қилганимиз ана шу ишсиз ёшларнинг боғбонлик ва мулкдорлик ҳиссини оширишдан иборат эди.

Фақат пахта билан ишлаб келган халқимизнинг ҳурматли Президентимиз Ш.М.Мирзиёев бошчилигида лалми, ўзлаштирилмаган ерларда боғлар барпо қилиш ҳақидаги ташаббуслари натижасида ёшларимизни иш билан таъминлаш, уларга шарт-шароитлар яратиш фикри билан яшадик. Кимдир сизга етказганидек, Пайариқдаги кластер катта пулларни ўзлаштириш билан шуғулланмади, балки улар ҳозирда 40 миллион долларлик тўқимачилик корхонаси бунёд этмоқда. Бу билан 800 нафар ишсизлар ишли бўлиб, 12 минг тонна пахтани қайта ишлайди. Албатта, бу бизнинг келажакда кийим-кечаклар, ёғ-мой, ип-калава ишлаб чиқаришга ўтиш ва экспортимиз кўпайишига хизмат қилади.

Шуни ҳам айтиб ўтишимиз керакки, сизга туманимиздан етказиб туриладиган ёлғон ахборотлар ҳақида ҳам икки оғиз сўз. Чунки туманимиз ҳокими Д. Мусинов ҳам оддий оилада ўсган бўлиб, у киши саҳифангизда ёритилгани каби катта-катта поралар олиш билан эмас, шу туман аҳлини минглаб гектарлардаги узумзорлар, ўрта тадбиркорлик, ишлаб чиқаришга эътиборини кучайтиришга, даромад топишга рағбат уйғотишга ҳаракат қилаяпти. Бизнинг туман чекка ҳудуд бўлиб, катта магистрал ва темир йўллар йўқлиги сабабли катта-катта заводлар қуриш ортда қолган бўлиши мумкин, лекин шундай бўлсада, бу соҳаларга ҳам бугунги кунда алоҳида эътибор берилмоқда. Ва бу борада амалий ишлар ҳам бошлаб юборилган.

Кўз билан кўрмасдан бунга ишониш қийин, лекин ўтган йили ишга туширилган Наволи ҳудудимиздаги узумзорлар ичида 1200 нафар фуқароларга ажратилган бўлиб, уларнинг ҳар бири ўтган йили қатор ораларига тарвуз, қовун, нўхат, ловия, бодринг ва бошқа маҳсулотлар экиб, ҳам оилаларини таъминлашди, ҳам бозорга маҳсулот чиқаришиб, миллион-миллион сўм фойда топишди. Шуни айтиш керакки, уларга берилган 22,5 миллион сўм кредитлар уларнинг бу завқли меҳнати ўлароқ икки-уч йилда қопланиб, қолган кредит муддатининг 4-5 йилида йилига 2-3 тоннадан тайёр майиз олишади. Бу майизларнинг ҳар килоси нархи ҳозирги кунда бозорда 20-30 минг сўмдан кам бўлмайди. Бунинг устига қатор ораларига экилган қовун-тарвуз, ловия, ошқавоқлар ҳам бозоримизни тўлдириб, ҳам оилаларнинг фаровонлигига хизмат қилди. Ҳар бир оила ҳали узумлар ҳосилга кирмасдан 10 миллион сўм атрофида даромад топишмоқда. Агар узумлар ҳосил бера бошласа биз уларнинг маҳсулотларини қайта ишлаб жаҳон бозорига чиқариш ниятидамиз. Шунингдек, Ингичка ҳудудимизда ҳам томчилатиб суғориладиган ерларда бунёд этилаётган 1600 гектар ерлардаги боғлар ҳам, ана шундай самара беради. Айтиш керакки, бу ерларда илгари ҳеч қандай экин экилмаган.

Яна бир сизга ноҳақ ва нотўғри етказилаётган бир гап бу боғ берган фуқароларга жабр қилиш эвазига кредит берилиб, бу кредитлар талон-тарож қилинаётгани ҳақидаги хабардир.

Чунки фуқароларимизнинг кредитни қайтариш муддати 7 йилга узайтирилди, бу ҳам узум қийғос ҳосилга киргач, 3-4 йилда бемалол кредитини тўлаб, ортиқча ўн миллионлаб даромад қилиши мумкинлигини билдиради. Агар бу узумларни дунё мамлакатларига марказлаштирилган тартибда экспорт қилсак, бундан ҳам кўп пул бўлиши мумкин.
Албатта, тадбиркорлик умуман ривожланмаган туманда бирданига ишларни жонлантириб, ҳамма одамларга тадбиркорликни ўргатиш қийин. Аммо айтиш керакки, саноат, қишлоқ хўжалиги, жумладан, балиқчилик, паррандачилик, чорвачилик соҳаларида ҳам янги лойиҳалар амалга оширилмоқда.

Шунингдек, Самаранд вилояти ҳокими ва Пайариқ тумани ҳокими ўртасидаги сиз кўп бора тилга олаётган яқин муносабатлар, хусусан, фақат пул учун бирга ҳаракат қилишлари ҳақидаги гаплар ҳам маъносиздир. Чунки ҳар қандай ҳоким энг аввало пул йиғишни эмас, халққа хизмат қилишни ўйлайди. Бунга риоя қилмаганлар эса, сиз айтгандай, қонун посбонлари қўлига тушиб қолиши ва жазосини олиши аниқ. Сиз яхши биласизки, бу икки ҳокимнинг ҳам ўз функционал вазифалари ва бурчлари бор. Улар Самарқанд вилоятига ва хусусан бизнинг туманимизга ҳам холис хизмат қилишмоқда.

Биргина Д. Мусинов туманимизга ишга келгач, барча соҳаларга эркин фикр шаклланди, Халқ депутатлари туман Кенгаши фаолиятидаги жонланиш ҳам сезилди ва бу бизни қувонтиради. Кадрлар соҳасида ҳам сизга етказишганидай, таниш-билишчилик эмас, фикри, маънавий дунёқараши, соҳага қизиқиши, ихлоси, малакаси, билими, эркин муносабати ҳисобга олинмоқда.

Ҳурматли Исмат ака.

Албатта, сизнинг бу борада ўз фикрларингиз бор ва мен уларни ўзгартиришга уринмоқчи эмасман. Фақат айтмоқчиманки, сиз ҳамиша ҳам иғвогар, мунофиқ, ёлғондакам, фактлари ўзгартирилган хабарлар етказаётган кишиларга ишонмаслигингизни ва бизнинг самимий фикрларимизни холис қабул қилишинизни илтимос қиламиз.

 

Дилшод Ҳамидов,

Пайариқ туман ҳокимлиги Ахборот хизмати раҳбари

 

«Дунё ўзбеклари»дан: 

Пайариқ туман ҳокимлигига — очиқ ойдин ва самимий ёзилган мактуб учун миннатдорчилик билдирарканмиз, демак Самарқанддаги вазият биз ўйлаганчалик фожеали эмас экан деган умидли фикрга келдик. Ана шу яхши ва ёруғ ният билан яқин кунларда «Дунё ўзбеклари»нинг махсус мухбири Самарқандга, хусусан Пойариқ туманига ижодий сафар қилади…  

 

«Дунё ўзбеклари» редакция почтасидан

МАҚОЛАНИ ДЎСТЛАР БИЛАН БАҲАМЛАШИНГ