Абдиҳалим Мелиев: Висолингга етолмасам мен, Ойнинг нури менга дор, дердинг
Абдиҳалим МелиевданЭСИНГДАМИ?
Эсингдами?..
Ўйнар эдик иккимиз боғда,
Ҳис-туйғулар чаларди қарсак.
Сен-Лайлию Мажнун эдим мен,
Биз завқланиб образга кирсак.
Эсингдами?..
Сочларингни қирқта ўрардинг,
Менинг қирқта жоним бор, дердинг.
Висолингга етолмасам мен,
Ойнинг нури менга дор, дердинг.
Эсингдами?..
Чиройиму ҳусну холимга,
Осмон ошиқ, ошиқ ер, дердинг.
Шерозийнинг ўшал шартига,
Хоразмни қўшиб бер, дердинг.
Эсингдами?..
Боқар эди бизга суқлана,
Номозшомда бир жуфт мусича.
Бизни кўриб иккита ялпиз,
Севишарди ўзи-ўзича.
Эсингдами?..
Майин эсган сокин шабада,
Ишқимизни учириб кетди.
Ўзингни ҳам оппоқ либосда,
Ўзга уйга кўчириб кетди.
Эсингдами?
Мусичалар йиғлади шунда,
Ариқ суви тескари оқди.
Кўзларида жиққа ёш билан,
Ялпизчалар атрофга боқди.
Эсингдами?..
Миттигина, кичик жўссангда,
Қирқта жонинг бўлмади ҳазм.
Ўланлару ёр-ёр сасидан,
Қалқиб тушди ҳатто Хоразм.
Эсингдами?..
Ой ҳам хафа бўлди бизлардан,
Ишқнинг дами қолди паст бўлиб.
Ўттиз йилки яшайвераман,
Тақдиримга душман, қасд бўлиб.
Эсингдами?
Мен ўшанда кечиб баридан,
Дўст тутиндим бардош, сабрга.
Сени кўмдим ёр-ёр кечаси,
Юрагимдан қазган қабрга.
Эсингдами?..
Абдуҳалим МЕЛИЕВ.
«Дунё ўзбеклари» редакция почтасидан