“Илҳом” танловида 1-ўринни эгаллаган Акром Маликов Spark автомобили ютди…
Адиблар хиёбонида «Катта адабиёт байрами» ҳафталиги доирасида «Илҳом» мукофоти республика танловининг совриндорларини аниқлаш ва тақдирлаш маросими бўлиб ўтди.
Танлов шоир ва ёзувчилар ҳаёти ва ижодини ўрганиш, уларнинг асарларини таржима қилиш, шу асосда тадқиқотлар ўтказиш, кино ва саҳна асарлари яратиш каби маънавий-маърифий, илмий-ижодий жараёнларда энг юқори натижаларга эришаётган ёшларни излаб топиш ва қўллаб-қувватлаш мақсадида ОТМда таҳсил олаётган ва фаолият юритаётган ёшлар ўртасида ўтказилди.
Танловда 1-ўринга Алишер Навоий номидаги Тошкент давлат ўзбек тили ва адабиёти университети 2-босқич магистранти Акром Маликов муносиб топилди. У «Spark» енгил автомобили билан тақдирланди.
2-ўринга Тошкент давлат шарқшунослик университети жамоаси лойиқ кўрилиб, 30 миллион сўм пул мукофоти билан тақдирланди.
3-ўринни Фарғона давлат университети талабаси Қобилжон Шерматов ҳамда Қорақалпоқ давлат университети таянч докторанти Малика Палимбетова қўлга киритди. Улар 15 миллион сўм пул мукофотлари билан тақдирланди.
Мукофотларни Ўзбекистон Республикаси Президенти маслаҳатчиси А.Абдувоҳидов ҳамда Бош вазир ўринбосари Б.Мусаев топширди.
Танлов ғолибларига махсус диплом ва статуэткалар топширилди.
Н.Усмонова, ЎзА
“Илҳом” танловида 1-ўринни эгаллаган Акром Маликов Spark автомобили билан тақдирланди
“Илҳом” мукофоти республика танловида бу йил 1-ўринга Алишер Навоий номидаги Тошкент давлат ўзбек тили ва адабиёти университети 2-босқич магистранти Акром Маликов муносиб топилган. ЎзА давлат ахборот агентлиги хабарига кўра, у “Spark” автомобили билан тақдирланган.
Тошкентдаги Адиблар хиёбонида “Катта адабиёт байрами” ҳафталиги доирасида 20 май куни бўлиб ўтган “Илҳом” танлови совриндорларини аниқлаш ва тақдирлаш маросимида А. Маликов ва бошқа тадқиқотчиларга мукофотлар топширилган.
Навоийшунос Акром Маликов 2016 йилнинг июль ойида конституциявий тузумга тажовуз қилиш ва жамоат хавфсизлигига хатар солувчи материаллар тайёрлашда гумонланиб, ҳибсга олинган ва кейинроқ 6 йилга озодликдан маҳрум қилинганди. Ҳозир 30 ёшда бўлган А. Маликов ўтган йил августида мамлакат президенти томонидан имзоланган афвнома асосида муддатидан олдин озодликка чиққан.
Қамоқдан чиққанидан кейин маҳаллий матбуот вакиллари билан суҳбатлашган навоийшунос жазо муддатини ўташ жараёнида “хатоларини тушуниб етган”ини қайд этган ва афв этгани учун президент Шавкат Мирзиёевга миннатдорлик билдирган.
Акром Маликов бундан кейинги фаолиятини илмий изланишларга бағишлаш, хусусан, Алишер Навоий асарларини шарҳлаш истагида эканини маълум қилган. Айни пайтда у жамоатчиликдан унинг шахси ёки фаолиятини сиёсийлаштирмасликни илтимос қилган.
Шоир ва ёзувчилар ҳаёти ва ижодини ўрганиш билан шуғулланаётган ёшларни рағбатлантириш учун ҳукумат қарори билан таъсис этилган “Илҳом” мукофоти бу йил биринчи марта эгаларига топширилди. Мазкур қарор 2020 йилнинг 25 августидан, яъни А. Маликов озодликка чиқишидан икки кун аввал кучга кирган.
МАҚОЛАНИ ДЎСТЛАР БИЛАН БАҲАМЛАШИНГ
