Кун.ўз: Тошкент шаҳри “зам.ҳоким”и маҳалла раисини урди ва ҳақоратлади…
Тошкент шаҳри ҳокимининг биринчи ўринбосари Бахтиёр Раҳмонов Тошкент вилоятининг Оққўрғон туманидаги «Уста Нормат» маҳалла фуқаролар йиғини раиси Алишер Икромовни турли ножўя сўзлар билан ҳақоратлаб, унга нисбатан жисмоний куч ишлатган. Маҳалла ва оилани қўллаб-қувватлаш вазирлиги ижтимоий тармоқларда тарқалган хабар юзасидан ўрганиш олиб бориб, бу маълумотни тасдиқлади.
Маҳалла ва оилани қўллаб-қувватлаш вазирлиги ахборот хизмати масъул ходимлари ҳамда Тошкент вилояти Маҳалла ва оилани қўллаб-қувватлаш бошқармаси раҳбарияти воқеага аниқлик киритиш мақсадида Алишер Икромов билан боғланиб, ҳолат бўйича дастлабки маълумотларни олган. Маълум бўлишича, Бахтиёр Раҳмонов маҳалла раисини унинг хизмат вазифасига алоқадор бўлмаган бошқа масала бажарилмагани бўйича «жазолаган».
«А.Икромов томонидан берилган маълумотга кўра, жорий йилнинг 9 май куни у «Уста Нормат» маҳалласи Деҳқонобод кўчасида жойлашган, Б.Раҳмоновнинг ота уйига чақиртирилади. У бу ерда ўзининг хизмат вазифасига алоқадор бўлмаган, умуман бошқа бир масаланинг бажарилмаганлиги бўйича Б.Раҳмонов томонидан турли ножўя сўзлар билан ҳақоратланади, ҳатто унга нисбатан жисмоний куч ишлатилади», дейилади вазирлик хабарида.
Айни вақтда мазкур ҳолат Маҳалла ва оилани қўллаб-қувватлаш вазири назоратига олинган ҳамда вазирлик ишчи гуруҳи томонидан воқеа тафсилотлари батафсил ўрганилмоқда.
Маҳалла ва оилани қўллаб-қувватлаш вазирлиги ишчи гуруҳ хулосаси асосида А.Икромовнинг, умуман, маҳалла тизимидаги барча ходимларнинг ҳуқуқий манфаатларини ҳимоя қилиш бўйича қонунчиликда белгиланган ҳамда ўз ваколати доирасидаги барча чораларни амалга оширишини маълум қилган.
Маълумот учун, 2013 йил 22 апрелда янги таҳрирда қабул қилинган, «Фуқароларнинг ўзини ўзи бошқариш органлари тўғрисида»ги Ўзбекистон Республикасининг Қонунига кўра, фуқароларнинг ўзини ўзи бошқариш органлари фаолиятига давлат органларининг ва улар мансабдор шахсларининг аралашувига йўл қўйилмайди.
Маҳалла ва оилани қўллаб-қувватлаш вазирлиги Ўзбекистон президентининг 2020 йил 18 февралдаги ПФ-5938-сонли Фармонига асосан, фуқаролар йиғинлари ходимларини уларнинг вазифа ва фаолият йўналишлари билан боғлиқ бўлмаган йиғилиш ва бошқа тадбирларга жалб қилиш, уларнинг фаолиятига асоссиз аралашиш, тааллуқли бўлмаган вазифаларни юклаш талабларини бузганлиги учун давлат органлари ва ташкилотлари масъул ва мансабдор шахсларини эгаллаб турган лавозимидан озод этишгача бўлган жазо чораларини қўллаш бўйича Ўзбекистон Республикаси Бош вазирига ўрнатилган тартибда таклиф киритиб бориш ҳуқуқига эга ҳисобланади.
Эслатиб ўтамиз, Бахтиёр Раҳмонов 2021 йил январида Тошкент вилояти ҳокимлигига ўтказилган Даврон Ҳидоятов ўрнига Тошкент шаҳри ҳокимининг архитектура, капитал қурилиш ва коммуникацияларни ривожлантириш масалалари бўйича биринчи ўринбосари лавозимига тайинланганди.
У муқаддам Тошкент шаҳри ҳокимининг капитал қурилиш масаласи бўйича биринчи ўринбосари бўлган, кейинроқ Миробод ва Сергели туманларида ҳоким лавозимларида ишлаган, 2018 йил майидан Олмазор туманига раҳбарлик қилганди.
