А.Айматли: Акам… Саксон икки ёшли Асрақул ака хайрлашув чоғи мунғайиб қолди
Акам
(Саксон икки ёшли Асрақул ака хайрлашув чоғи мунғайиб қолди).
Ака, кўзингизда милт-милт этар ёш,
Уни кўриб қандай берайин бардош,
Бундай онда агар бўлса ҳамки тош,
Бўлса ҳамки темир юрак эригай,
Вужудда нокерак, керак эригай.
Биламан, тилак мўл, гўёки денгиз,
Афсуски, шарҳлашга тилингиз ожиз,
Ундан кўра сизга осон чўкмоқ тиз,
Бу ҳолни кўрганда юрак эригай,
Вужудда нокерак, керак эригай.
Акалик меҳри бор бошдан то оёқ,
Мени сизламангиз, ки сен яхшироқ,
Ниятингиз сочингиз мисол оппоқ,
Бу ҳолни кўрганда юрак эригай,
Вужудда нокерак, керак эригай.
Сизни гапиртирмас кўздаги ёшлар,
Бўғизга тиқилган темирми, тошлар,
Сўроққа айланган ул оппоқ қошлар,
Бу ҳолни кўрганда юрак эригай,
Вужудда нокерак, керак эригай.
Шоҳсиз қизиқ эмас ҳатто шахмат ҳам,
Шу гапга қўшилар Асад, Раҳмат ҳам,
Ҳувуллаб қолади сизсиз Аймат ҳам,
Бу ҳолни кўрганда юрак эригай,
Вужудда нокерак, керак эригай.
Бизни ўйласангиз юзга киринг Сиз,
Кўп яшанг, майлига, музга киринг Сиз,
Ўн саккиз йил Баҳор, Кузга киринг Сиз,
Бу ҳолни кўрганда юрак эригай,
Вужудда нокерак, керак эригай.
Айматда энг улуғ ёшда экансиз,
Тўю маъракада бошда экансиз,
Гоҳо Аймат, гоҳо Шошда экансиз,
Бу ҳолни кўрганда юрак эригай,
Вужудда нокерак, керак эригай.
Ака, кўзингизда милт-милт этар ёш,
Уни кўриб қандай берайин бардош,
Бундай онда агар бўлса ҳамки тош,
Бўлса ҳамки темир юрак эригай,
Вужудда нокерак, керак эригай.
«Дунё ўзбеклари» редакция почтасидан