Ёр, эшигинг очилмади мен учун, Тилингдан бол сочилмади мен учун — М.Юсуф
МУҲАММАД ЮСУФ:
КЕТАР БЎЛДИМ
Ёр, эшигинг очилмади мен учун,
Тилингдан бол сочилмади мен учун.
Уйингдан жой топилмади мен учун —
Кетар бўлдим юзингни бир кўролмай…
Келдим десам, жойинг йўлак дедилар,
Севдим десам, тенгинг бўлак дедилар.
Сенинг севгинг кимга керак дедилар…
Кетар бўлдим юзингни бир кўролмай…
Куйма, ёрим, куйдирмагин, куйма, ёр,
Бир яхшига бир ёмон ҳар жойда бор.
Икки яхши яшнаган жой қайда бор?..
Кетар бўлдим юзингни бир кўролмай…
Дерлар: жон соғ бўлса жаҳон топилгай,
Бир парча ер, парча осмон топилгай,
Лекин қайда сендек жонон топилгай,
Кетар бўлдим ўзингдан бир сўролмай…
Ёр, эшигинг очилмади мен учун,
Тилингдан бол сочилмади мен учун,
Уйингдан жой топилмади мен учун,
Ўтар бўлдим юзингни бир кўролмай.
© Муҳаммад Юсуф
https://t.me/Adabiyot_olami
«Дунё ўзбеклари» редакция почтасидан
МАҚОЛАНИ ДЎСТЛАР БИЛАН БАҲАМЛАШИНГ