Кўклам қизларига, дийдор муборак, Гиёҳ-майсаларга, баҳор муборак! — Исматилла Йўлдошев

---

БАҲОР МУБОРАК!

Бойчечак уйғонар қиш кўрпасида,
Камалак тўлғанар тонг шарпасида,
Бир илинж-чўғ ёнар дил пардасида,
Кўклам қизларига, дийдор муборак,
Гиёҳ-майсаларга, баҳор муборак!

Ўрик гулларида келинчак либос,
Қизғалдоқ қимтинар-лаблари гилос,
Бўтакўз бўй чўзар – кўзлари чарос,
Соғинч қарашларга гулзор муборак,
Ул чилвир сочларга, баҳор муборак!

Қиқирлаб югурар қизлар басма-бас,
Бахшилар ўланни жирлар басма-бас,
Шукрона айтади ҳар жон, ҳар нафас,
Шу азиз тупроққа, ул ёр муборак,
Ул чашми қароққа, баҳор муборак!

Шаррос ёмғир ёғар-эҳсони фалак,
Ташвишинг муборак, эй жони ҳалак,
Энди дошқозонда қайнар сумалак,
Гўдакка жилмайган рафтор муборак,
Юракка роз айтган баҳор муборак!

Қалдирғоч ин қурмиш, эй дўст, уйингдан,
Йигитлар сарҳушдир қизлар бўйидан,
Сизга бу хуш нома Ватан тўйидан,
Наврўзни қўмсаган, иқрор муборак,
Юртим, боғларингга, баҳор муборак!

Исматилла Йўлдошев

«Дунё ўзбеклари» редакция почтасидан

МАҚОЛАНИ ДЎСТЛАР БИЛАН БАҲАМЛАШИНГ