Рўзиқул Алимардон ижоди: Хитоб қилдим…

---

Хитоб қилдим,
Хитоб қилдим!
Машрабнинг тӯрвасидан
тушиб қолган сӯзларни
Китоб қилдим,
китоб қилдим.
Яссавийдек яшамадим,
Яссавийни устоз билдим.
Яссавийнинг ҳассасини
Суйиб, суйиб тавоб қилдим.
Қодирийга жоним куйди,
Кумушни чин дилдан суйдим.
Усмон Носир , Сизга атаб
Юрагимга ҳайкал қӯйдим.
Муҳаммадни излаб бир кун
Андижонга йӯлим сурдим.
У сув ичган ариқлардан
Мен ҳам кам-кам татиб кӯрдим.

Бу кун ӯзим ёлғиз,
На Машраб бор,
На Яссавий.
Муҳаммадни соғинаман,
Абдулла Орифни
кӯргим келар.

Ташқарида куз шамоли елар,
-Бобур ҳайқирар:
— Пиримқул Қодир, Сен ҳақиқий ӯзбек боласи!
Улуғбек бағрига босар Одил Ёқубни.
Ойбекни қучар Навоий.
Мен-чи мен
томашабин.
Томашабин
кӯпдир бу замонда.
Мендек томашабин…

«Дунё ўзбеклари» редакция почтасидан

МАҚОЛАНИ ДЎСТЛАР БИЛАН БАҲАМЛАШИНГ