Исмат Йўлдошев: Мени излаб келмади ҳеч ким, Янги йилнинг қаҳратонида…

---

ҚИШ СОНАТАСИ
-I-
Мени излаб келмади ҳеч ким,
Янги йилнинг қаҳратонида.
Янги йил кечаси ёлғиз, хаёлан
Тонгни кутдим унинг қаҳкашонида.

Сени бир нафас ҳам холи қўймадим,
Маъюс суратингни безади аёз.
Мен ҳали ҳеч кимни бундай суймадим,
Севгимнинг қошида дарёлар саёз.

Мен қандоқ айтурман сўзлар лол, ожиз,
Бегона вужуддай титраб турур тан.
Ҳолимни англатмас на шеър, на мажоз,
Кўксим ғам мулкига бўлди-ку ватан!

Ўтган кунларингни ўйлаб ўкинма,
Сира ғам босмасин нигоҳларингни.
Сен менга ташлагин қанча бўлса ҳам,
Ўзим кўтарурман гуноҳларингни.

-II-
Осмон ҳам аслида улкан кўз эрур,
Қара, киприкларин қопламиш қиров.
Унга дўст, балким ёр, билмам не зарур,
Сал узоқ тикилсанг йиғлайди дарров.

Суйсам шу осмонча суярман, бағрим,
Йиғласам йиғларман шул осмон қадар.
Қаҳримни муз каби эритар меҳрим,
Гоҳ армон ўртайди — поёнсиз кадар.

-III-
Бул кун ҳамма нарса исмимдир менинг,
Лаббай деяжакман, гар десанг денгиз.
Аслида, шу осмон кўзларинг сенинг,
Борлиқ либос киймиш ёқасиз, енгсиз.

Дафн маросимин эслатар ҳаво,
Ўлганлар оқ кияр, қолганлар қора?
Мени ўйлантирар бул қадим савдо —
Муҳаббат, аслида, энг кўҳна яра.

Маъюс суратингга боқаман такрор,
Бунча бардошлидир шу парча қоғоз.
Оғзимни очсам бас, портлайди дунё,
Ичимда оғриққа тўйинган овоз…

-IV-
Гўё қиш юмшаниб ўрнини секин,
Бўшатиб бергандай, келгандай баҳор,
Қоронғи кулбамга нур тўлар сокин
Умид ҳадя этар кўнглимга наҳор

Биламан, қайдадир хафа, ғамгузор,
Турибсан кўксингни шамолга кериб.
Деразам раҳини қоплаган музлар
Илиқ нафасингдан кетди-ку эриб.

Сен оппоқ либосда бўлдинг-у зоҳир,
Кўрдим, имо қилдинг силкиб бошингни.
Келдинг-ку ёлғизим, кўрдим-ку ахир,
Тарновлардан томган тоза ёшингни.

Келган бўлса шундай келгандир беҳол,
Лайли ҳам Мажнуннинг қошига саҳар.
Кирган бўлса шундай киргандир, алҳол,
Ширин ҳам Фарҳоднинг тушига саҳар.

-V-
… Офтоб туриб қолди кўкда муаллақ,
Яна тўқнаш келди абадул аввал.
Соат кафтгирини айлади талоқ,
Бир лаҳза бузилди ул кўҳна жадвал.

Илоҳий эҳсондир бизга ушбу дам, янги йилнининг қаҳратонидан.
Мен сени кутаман ҳамиша эркам —
Умримнинг баҳор, ёз саратонида…

Исматилло Йўлдошев

МАҚОЛАНИ ДЎСТЛАР БИЛАН БАҲАМЛАШИНГ