Шавкат Мирзиёев бир гуруҳ ватандошларга давлат мукофотларини топширди
Президент Шавкат Мирзиёев 28 декабрь куни Кўксарой қароргоҳида бир гуруҳ ватандошларга давлат мукофотларини топширди.
Август ойида, Ўзбекистон мустақиллигининг 29 йиллиги арафасида кўплаб соҳалар вакиллари президент фармонлари асосида давлат мукофотлари билан тақдирланган эди.
28 декабрь куни Кўксарой қароргоҳида ушбу мукофотларни ўз эгаларига топшириш маросими бўлиб ўтди.
Маросимда президент Шавкат Мирзиёев сўзга чиқди; фахрий унвон, орден ва медаллар билан мукофотланган ватандошларни шахсан қутлади.
«Биз кейинги йилларда яхши анъанани йўлга қўйиб, юртдошларимизга мукофотларни байрам кунида топшириб келаётган эдик. Афсуски, бу йилги пандемия шароитида одамларимизнинг соғлиғини асраш учун ушбу хайрли тадбирни бироз кейинга суришга тўғри келди. Эзгуликнинг кечи йўқ, дейдилар. Насиб этган экан, мана бугун сизлар билан Янги йил байрами арафасида юзма-юз кўришиб, дийдорлашиб турибмиз», – деди Шавкат Мирзиёев.
Kun.uz фотомухбири санъат, сиёсат ва жамоат арбобларини бир жойга тўплаган тантанали тадбирдан фоторепортаж тақдим этади.
Суратлар муаллифи – Нуриддин Нурсаидов