Ўзбекистон: Қашқадарёда ишчилар ғалаён кўтарди…

Ўзбекистон: Қашқадарёда ишчилар ғалаён кўтарди, ИИВ вазият барқарорлигини айтмоқда — oлдинроқ бир гуруҳ норози ишчиларнинг ғалаён кўтаргани ва заводда ёнғин келиб чиққани ҳақида видеолар тарқалганди. Би-би-си сатҳдаги сўнгги вазиятни ўрганди:

ИИВ Қашқадарё вилояти Ғузор туманидаги Enter Engineering компания ишчилари кўтарган норозилик барқарорлашганини билдирди.

Олдинроқ бир гуруҳ норози ишчиларнинг ғалаён кўтаргани ва заводда ёнғин келиб чиққани ҳақида видеолар тарқалганди.

Энергетика вазирлигининг хабар беришича, 21 октябрь тонги 7:30 электрон кириш тизимидаги носозликлар сабаб нонуштага киролмаган ишчилар норозилик уюштирган.

Аммо маҳаллий блогер ва мавзуни ўрганган бошқа нашрларнинг ёзишича, норозиликларга ишчиларнинг бир неча ой маош олмагани ҳамда кечки овқат ва нонушта берилмагани асосий сабаб бўлган.

Ижтимоий тармоқларга тарқалган видеоларда ишчиларнинг тўп-тўп бўлиб югураётгани, завод биноларининг бирида ёнғинни кўриш мумкин.

Яна бошқа бир видеода ишчилар томонидан офис жиҳозларига зарар берилгани акс этади.

«Куч ишлатилди, дейиш абсурд»

Ички ишлар вазирлиги матбуот котиби Шоҳрух Ғиёсов Би-би-сига ғалаён куч билан бостирилмаганини билдирди.

«Куч ишлатилди, дейиш абсурд. Чунки булар — ишчилар. Ишлаб туришибди. Тўғри гапирса тушунади. Ичиб олиб, чекиб олиб ёки бошқа давлатларга анаву қилганлармас, оломон эмас. Ўшанга у ерда унақа муаммо бўлмади», дейди у.

Ички ишлар вазирлиги матбуот котиби айрим сайтларда чиққан 5 мингга яқин ишчи норози бўлиб погромда иштирок этди, деган гапларни ҳам инкор қилди.

«Асосий видеода кўринаётганлар томошабинлар. Қанақадир қисми ўша ерда норозилик кайфияти кўрсатган. Норозиларнинг аниқ сонини ҳозир сизга аниқ айтолмайман», дейди Ғиёсов.

Блогер ва журналистларга гапирган гувоҳлар норозиликка ишчиларнинг маошларни вақтида ололмаётгани ва кечки овқат ҳамда нонушта берилмагани асосий сабаб бўлганини айтган.

Энергетика вазирлиги матбуот котиби Элмира Бекмуродова ишчиларнинг маоши кеч берилаётгани ҳақидаги хабарларни рад қилди.

Муаммо жойида ҳал этилдими?

Аммо вазирликнинг кейинроқ Би-би-сига берган расмий хабарида воқеа жойига етиб борган мутасаддилар ойлик маоши борасидаги муаммоларни жойида ҳал этгани айтилади.

Энергетика вазирлигининг хабар беришича, воқеа жойига Қашқадарё вилояти ҳокими, вилоят прокурори, миллий гвардия ва бошқа сектор раҳбарлари, «Enter Engineering» компанияси раҳбари, Энергетика вазирлиги ва «Ўзбекнефтгаз» АЖ вакиллари етиб борган.

«Норозилик билдирган ишчилар билан очиқ мулоқот ташкил этилди ва ишчи-ходимлар томонидан кўтарилган барча муаммо ва масалалар (овқат таъминоти сифати ва шароити, иш вақти, ойлик маоши, яшаш шароитлари, карантин талаблари бажарилиши ва бошқалар) жойида ҳал этилди ва тегишлилиги бўйича қарорлар қабул қилинди», дейилади расмий хабарда.

Энергетика вазирлиги матбуот хизмати айни вақтда вазият тўлиқ барқарорлашгани, барча масалалар ижобий ҳал этилиб, ишчи-ходимлар ўз иш жойларига қайтаётганини маълум қилди.

Ғалаён вақтида етказилган зарар миқдори ўрганилаётгани айтилди.

Ҳодисада тан жароҳати олганларга оид хабарлар ҳам бор, ҳозирча бирор бир масъул идоранинг бу борада расмий маълумот билан чиққани кузатилмайди.

«ENTER Engineering» компанияси ишчилари маошларни ўз вақтида ололмагани учун норозилик уюштириши биринчи марта учраётгани йўқ.

Шу йилнинг 10 сентябрь куни компаниянинг «Самарқанд туристик маркази» лойиҳасида ишлаётган ишчилар норозилик билдирганди.

Ўзбекистон Касаба уюшмаси хабарида ишчилар ҳаққини талаб қилганидан 1 ҳафтадан сўнг уларнинг маош муаммоси ҳал қилингани айтилади.

«Шунингдек, ушбу воқеа Компания бўйича кенг муҳокама қилиниб, келгусида бундай ҳолатга йўл қўймаслик бўйича керакли чора-тадбирлар кўрилган», дейилганди расмий хабарда.

Бош прокуратура ахборот хизмати раҳбари Ҳаёт Шамсутдиновнинг маҳаллий матбуотга билдиришича, мазкур ҳодиса вилоят прокуратураси ходимлари томонидан жойида ўрганилмоқда.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek

https://www.bbc.com/