Мадина: Туш бўлиб қуюлсам кечаларингга, Рақс этса кўзларим қарида гулхан…
***
Туш бўлиб қуюлсам кечаларингга,
Рақс этса кўзларим қарида гулхан.
Умримни чирмаган
Зарпечак мисол
Юлсам,
Сенсиз ўтган кунларни юлсам.
Ойни ўроқ қилиб бешафқат зулмат
Бори кипригимни қамишдек ўрса.
Кафтининг қонида
Чайиб олсаму
Кўнглимни шафақнинг дорига илсам.
Елписа
Саҳронинг ташна лабидан
Тўкилган оятнинг қироатлари.
Улкан қушдек учса кекса барханлар
Фош этиб сукунат синоатларин.
Қайтадан туғилсам
Раҳм этиб Мавло,
Дунё гўдак бўлса нигоҳлари соф.
Йўлларни чирмовуқ босгунича то
Эй Ишқ,
Мени, мендан илгарироқ топ.
Madina Norchayeva
