Малика Салимова: Қирқта канизаги энди ҳар куни, Сайрга чиқади Куз билан бирга!
Малика СалимоваСирли шаббодалар сир олар дилдан,
Булутли либосда осмонистоним.
Кўйлак кийиб олиб сариқ-яшилдан,
Сайрга чиқади аста Куз хоним.
Бирдан шивирлашиб қолар дарахтлар,
Райҳонлар ҳаёлга толади маюс.
Чумчуқлар чурқ этмай қолган, карахтлар,
Этакларин судраб келаверса Куз!
Бошидан тангалар сочмай кўрсинчи,
Тўшамай кўрсинчи ялтир поёндоз.
Ним кулиб, ичига ютган ўкинчин,
Тахтини бўшатиб бераётган Ёз!
Сепиб атиргулнинг сўнги атрини,
Ноз қилиб томчилаб ўтган ёмғирга.
Қирқта канизаги энди ҳар куни,
Сайрга чиқади Куз билан бирга!
Қуёш нурларига ёпар ёпинчиқ,
Турналар тарк этар ватанларини.
Танноз ойимчага ўхшаб Куз тантиқ,
Анорларни ёрар, татиб кўргани.
Уни севмайдилар нимагаямдир,
Қўл солиб кўрмаслар кўнглига нечун.
Куз ҳам севилмоқни истайди ахир,
Бир кун айрилиқда ёнмоқлик учун.
Ана, ўтиб борар, сочлари тўзиб,
Дарахт япроқларин узиб аламда.
Севги сайр этган боғларни кезиб,
Унинг изларига қўяр аланга!
Гўё қариқиздек, тунлар ухламай,
Тинмай яратгандан тилайди сабр.
Унинг аҳволини кўриб, чидамай,
Бирдан шаррос қуйиб юборар ёмғир.
Малика Салимова