Сирожиддин Саййид: Сен бир куни кўрмайсан, ҳаёт – Сирожиддин, Исматларингни…
Сирожиддин Саййид
Исмат Хушевга
(Матбуотда эълон қилинмаган шеърлар)
Умр бизга берилган фурсат.
Чегарачи – ўлим қўймайди.
Умр тўхтар, вақт бешафқат,
Умр тўхтар, вақт ўлмайди.
Тирикликнинг кирмай сўзига,
Чегарага элтар қадамлар.
Кетмоқдамиз ернинг юзидан,
Яшамоққа шошинг одамлар.
Ҳаёт, сен ҳам англаб етасан,
Ҳеч иш келмас у пайт қўлингдан.
Сен бизларни ташлаб кетасан,
Поёни йўқ мангу йўлингдан.
Умрин яшар бардошу сабот,
Тарк этаман қисматларимни.
Сен бир куни кўрмайсан ҳаёт,
Сирожиддин, Исматларингни…
Гоҳ омад ёр, гоҳо беомад,
Ишқ дилларга солганда асос.
Тўлқин уриб келган шеърият,
Юрагимга санчилган қасос.
Бу ҳаётнинг баланд, пастига
Парво қилмай, дўстим, сен югур.
Биз яшаган умр остига
Хайрлашув деб босгаймиз муҳр…
1978 йил, “ВУЗ городок” шаҳарчасининг 84 ётоқхонасида ёзилган шеър.
Видео лавҳада: Исмат Хушев Ўзбекистон Ёзувчилар уюшмаси котиби, Ўзбекистон халқ шоири Сирожиддин Саййид ҳузурида. Тошкент – 2013 йил…