Амир Худойберди: Соғ-омон ўтайлик синовларингдан…

---

Амир ХУДОЙБЕРДИ

ТАВАЛЛО

Тангрим, сабр бергин, куч бер, тоқат бер,
Қувват бер, идрок бер, гўзал тоат бер,
Иймон фароғатин бер, саодат бер,
Соғ-омон ўтайлик синовларингдан.

Бас энди тарқоқлик, парокандалик,
Ким Шошлик, ким Кеш, ким Мароқандалик,
Бизга олий мақом сенга бандалик,
Соғ-омон ўтайлик синовларингдан.

Аҳиллик, иноқлик, тотувлик аҳди
Аслида мўминнинг иқболи, бахти.
Шиғил ҳосил берсин дўстлик дарахти,
Соғ-омон ўтайлик синовларингдан.

Бирлашсак писандмас  не тўсиқ, не ғов,
Олий мақсадларга тикажакмиз дов.
Фитна оловини ёқолмайди ёв,
Соғ-омон ўтайлик синовларингдан.

Бугун хуруж қилар кўринмас офат,
Тошқин, бўронлардан кўрдик талофат,
Бемаҳал ёққан қор, сел бир фалокат,
Соғ-омон ўтайлик синовларингдан.

Жипслашса, қувватдир одам одамга,
Тарқоқлик сабабдир ғамга, мотамга.
Сен ўзинг подшосан икки оламга,
Соғ-омон ўтайлик синовларингдан.

Тангрим, саҳар туриб қилдим ибодат,
Сендан ҳар не ҳукм, биздан итоат,
Шояд дуоларим бўлгай ижобат,
Соғ-омон ўтайлик синовларингдан.

2.05.2020

«Дунё ўзбеклари» редакция почтасидан

МАҚОЛАНИ ДЎСТЛАР БИЛАН БАҲАМЛАШИНГ