Аҳмад Турон: Тўймадик дунёга, шуҳрату-шонга, Бу бир эслатмадир — синов инсонга,

---

Аҳмад Турон

Тождор вирус

Аллоҳнинг йўлидин тойилдик ёнга,
Шукурлар қилмадик неъмату-нонга,
Тўймадик дунёга, шуҳрату-шонга,
Бу бир эслатмадир — синов инсонга,
Йўқликдан бир тождор келди жаҳонга.

Ман-ман тождорларни тиз чўктиргани,
Зулмкор тузумлар чокин узгани,
Қудратлиман деган уйин бузгани,
Биз билмаган адолатни тузгани,
Ҳудодан тожи бор келди жаҳонга.

Ёвузликлар сингиганди қонларга,
Маишатлар тегиб кетди жонларга,
Бузуқликлар тўлди ҳар томонларга,
Қолмади жой дунёда иймонларга,
Энди кулфат қатор келди жаҳонга.

Судҳўрликка берилган эди юртлар,
Пораларга тўймаган эди қуртлар,
Подишоҳу хоким эди бебуртлар,
Тугар дамда халқда сабот-субутлар,
Бало каби бисёр келди жаҳонга.

Уммонлардан чиқиб келди дедилар,
Кўршапалак туғиб кетди дедилар,
Чўчқа каби харом ҳариш eдилар,
Иймон аҳли зиндонларда эдилар
Барча учун бир дор келди жаҳонга

Мўмин дунёсини эсга олсин деб,
Кофир юракларга қўрқув солсин деб,
Гуноҳкор элларнинг тинчин олсин деб,
Одам боласига жазо бўлсин деб,
Яратгандан қарор келди жаҳонга.

Икки дунё остонаси бугундир,
Бойлик, ишрат асли йўқлик – тутундир,
Иймони бут ким ул бағри бутундир,
Қалби тоза жисми тоза тутумдир,
Турон динин мадор билди жаҳонга.

1/4/2020

МАҚОЛАНИ ДЎСТЛАР БИЛАН БАҲАМЛАШИНГ