Соҳиба Ҳаёт — ББС ўзбек: Роббим, мени асра хатодан, Бир шарт мени таъқиб қилади…
Дунёлардан кечдим, деб айтсам,
У Ўзингдан раҳмат тилади.
Ё Раб, кимман, сўзимдан қайтсам?!
Бир мард мени таъқиб қилади.
Меҳр — Ҳақдан, ҳавас — Атодан,
Бу ўй ҳисларимни нурга белади
Роббим, мени асра хатодан,
Бир шарт мени таъқиб қилади.
Ҳаввога ҳукмингдан сақлагин Эгам,
Юки маҳшаргача тамға илади.
Ҳали жавобгарман момом учун ҳам,
Бир гард мени таъқиб қилади…
Ёзиб ёзилмайди, ўчиб ўчмайди,
Изн бер, ҳал қилар сўзинг бўлади.
У шонга учмайди, Сенга учрайди,
Бир фард мени таъқиб қилади.
Ҳаммасидан кеч, дейди фикр,
Қалбим борар Йўлни билади.
Бу қисмат-чун Ўзингга шукр:
Бир дард мени таъқиб қилади…