Хонбиби Ҳиммат қизи: Журналистлар муаммосини ким ўрганади?
ЖУРНАЛИСТЛАР МУАММОСИНИ КИМ ЎРГАНАДИ?
Хонбиби ҲИММАТ қизи МАХАМОВА, “Адвокат” журнали мухбири:
— 30 йилдан буён таҳририятларда ишлайман. Йигирма йил деганда зўрға қарз олиб 1 хонали уй олдим. 5 йил қарз тўладим. 405 минг сўм маошга сабр қилиб ишладим. Ўғлим контрактга ўқишга кирди. Контракт пулини тўлолмадим. “Уйимни ўзимни номимга прописка қилишга ёрдам беринг”, дея 2019 йил 8 августида Ўзбекистон Республикаси Хотин-қизлар қўмитаси раиси Элмира Боситхоновага шикоят ариза ёздим. Қўмита хатимни Ўзбекистон Журналистлари ижодий уюшмасига ва ИИВга юборибди.
12 сентябрда Уюшма раиси С.Ҳакимов “…Уюшма ўз ходимларини Тошкент шаҳрида прописка қилишга тавсия бериш ҳуқуқига эга бўлган идоралар рўйхатига киритилмаганлиги сабабли ушбу масалада Сизга амалий ёрдам беришнинг имконияти мавжуд эмаслигини маълум қиламиз” деган мазмунда хат юборди.
17 сентябрда ИИВ миграция ва фуқароликни расмийлаштириш бош бошқармаси бошлиғининг биринчи ўринбосари Н.Ғ.Зияев “…Фуқароларни Тошкент шаҳри ва Тошкент вилоятига доимий пропискага қўйиш Ўзбекистон Республикасининг 2011 йил 14 сентярдаги “Тошкент шаҳри ва Тошкент вилоятида доимий прописка қилиниши лозим бўлган шахслар — Ўзбекистон Республикаси фуқаролари тоифаларининг Рўйхати тўғрисида”ги Қонунига мувофиқ амалга оширилади” дея узундан-узун тоифа рўйхатини ёзиб юборди.
Хуллас биз журналистлар бу тоифага сираям кирмаймиз. Шундай қилиб 10 йилдан буён прописка азобида қийналиб, асабийлашиб яшайман. Чунки ўз уйимга ҳар 6 ойда вақтинча пропискага туришим учун туман паспорт столига ўғлимни, уйимни номига олган Дилфузани судрайман. Бир кун учаламиз ишдан қолиб, навбатга туриб, асабимиз бузилиб вактинчалик прописка когозини давлат божи тўлаб оламиз. Хуллас, прописка энг катта ва муҳим муаммоим бўлиб қолди…
«Дунё ўзбеклари» редакция почтасидан