Ўзбекистонда амалга оширилаётган кенг кўламли ислоҳотлар дастурининг рўёбга чиқаётгани АҚШ президенти Дональд Трампга мамнуният бағишламоқда. Америка раҳбари бу ҳақда Наврўз байрами муносабати билан Ўзбекистон Президенти Шавкат Мирзиёев номига йўллаган табрикномасида таъкидлаб ўтган.

Фото: Reuters

«Наврўз Сиз ва Ўзбекистон халқига шодлик ва фаровонлик олиб келишини тилайман. Наврўз тинчлик ва янгиланиш рамзи бўлмиш ўзига хос байрамдир. Ушбу айём айниқса жорий йилда катта аҳамиятга эга, чунки мамлакатларимиз Афғонистонда тинчлик ва барқарорликни таъминлаш йўлида муваффақиятли ҳамкорлик қилмоқда», — дейилади АҚШ президентининг табрик хатида.

«Сиз амалга ошираётган кенг кўламли ислоҳотлар дастури рўёбга чиқаётганини кўриш менга мамнуният бағишлайди. Янада юксак равнақ сари шу йўлдан ҳаракат қилар экансиз, Қўшма Штатлар Сиз ва Ўзбекистон халқининг қатъий ва ўзгармас шериги бўлиб қолади. Наврўз муборак!», — дея қўшимча қилган президент Дональд Трамп.

Мавзуга доир: «Яратганнинг ўзи ҳаммамизни паноҳида асрасин!». Президент Мирзиёевнинг Наврўз табрикномаси

Президент матбуот хизматининг қўшимча қилишича, Наврўз байрами муносабати билан Қозоғистон президенти Қосим-Жўмарт Тўқаев, Тожикистон президенти Эмомали Раҳмон, Қирғизистон президенти Сўронбой Жээнбеков, Туркманистон президенти Гурбангули Бердимуҳамедов, Озарбайжон президенти Илҳом Алиев, Эрон президенти Ҳасан Руҳоний, Фаластин президенти Маҳмуд Аббос, Саудия Арабистони подшоҳи Салмон ибн Абдулализ, Саудия Арабистони валиаҳди Муҳаммад ибн Салмон, БАА вице-президенти, Дубай амири Шайх Муҳаммад бин Рошид Ол Мактумдан ҳам Президент Мирзиёев номига қутловлар келган.

ДАРЁ