АЗИМ СУЮН ДЕГАН ДАРЁ БОР ЭДИ…

Бу дарёдан сув ичганларнинг сафи жуда кенг, улар бугун ўзбек адабиёти, журналистикасида ўз муносиб ўрнини топган, ўзлари ҳам устозга айланган.

Бугун халқимиз яна бир улуғ фарзандидан айрилди. Азим Суюннинг Дўрмондаги ҳовлиси жойлашган кўчага одамлар сиғмади. Шоирнинг тобути қўлма қўл бўлиб кетди. Мамлакатнинг барча бурчакларидан устозни билган, таниганлар, олис Нуротадан жигаргўшалари оғамлаб етиб келди жанозага. Чиғатойга қадар турнақатор машиналар карвони жилди…

Устозни сўнгги манзилга кузатарканмиз, кўнгилдан айрим иштибоҳлар ҳам кечди. Ижтимоий тармоқлар, айрим сайтлар эрталабдан бери тингани йўқ, Азим Суюн номи билан боғлиқ ёруғ ва ўлмас хотиралар эълон қилиняпти.

Лекин расмий, норасмий теле, радиоканаллар деярли сукут сақлаб ўтирибди(Маданият ва маърифат твдан ташқари). Уларга буйруқ керак, бўлмаса…

Баъзан бўлар бўлмас майлису тадбирларни мухбиру камера босиб кетади, лекин бугунги маросимдан ҳам уч тўрт минутлик лавҳа тайёрланиб эфирга узатилса, бирор коттакон сўкармиди?

Эркин Воҳид, Абдулла Ориф таъзияларини эслайлик, Азим Суюн ҳам юртнинг ардоқли вакили эдику!

Бу ҳам катта йўқотиш эмасми, халқ шундай азиз ўғлонидан айрилганини билса, ёмонми?

Эҳ, қачон эл бўламиз, қачон халқ бўламиз, Азим Суюнлар ҳар доим туғилавермайдику!!!

Шоир Азим Суюн оламдан ўтди