Амир Худойбердиев: Баҳор майсаларни уйғотар аста, Уйғонар табиат, ҳатто жамият.
Ассалому алайкум Алиқул ака!
Исмат аканинг «Дунё ўзбеклари» сайтидаги чиқишларини қизиқиш билан кузатиб келаяпман. Айниқса, шоир-ёзувчилар ҳақидаги фикрларига юз фоиз қўшиламан.
Биз ижодкорларнинг қадр-қиммати ҳақида қайғураётгани учун ватанпарвар журналист, фидойи қалам соҳиби Исмат акага катта раҳмат.
Дарҳақиқат, шоир-ёзувчиларнинг, умуман олганда зиёлиларнинг жамиятдаги мавқеи кўтарилмас экан, юрт равнақи ҳақида гап ҳам бўлиши мумкин эмас.
Ҳурматли Алиқул ака!
Сизнинг ҳам сайтдаги савол-жавобларда фаоллигингиз таҳсинга лойиқ.
Исмат ака каби, сиз сингари ҳақиқатпарвар кишилар қанча кўпайса, халқимизда уйғоқлик кучаяди, Президентимиз Шавкат Миромонович бошлаб берган ислоҳотлар шунча тез самара беради ва халқимиз албатта мурод-мақсадига етажак!
Буюк эврилишлар замони бу кун,
Тикланмоқда инсон қадри, қиммати.
Осонмас елкада замоннинг юкин
Кўтармоқ, бу жўмард зотлар ҳиммати.
Баҳор майсаларни уйғотар аста,
Уйғонар табиат, ҳатто жамият.
Қаҳратон қиш заҳрин енгиб бир пасда
Уйғонар дилларда мардлик, ҳамият.
Уйғониш фасли бу, яшариш фасли,
Покланади борлиқ, боғим-бўстоним.
Қалбларни уйғотган озод сўз асли,
Янгиланиб борар Ўзбекистоним!
Фурсатдан фойдаланиб Дунё ўзбеклари хотин-қизларини бугунги байрам билан муборакбод этаман.
Исмат ака ҳамда сиз каби инсонларни Аллоҳ ҳамиша паноҳида асрасин, элпарварлик ишларингиз бардавом бўлсин!
Сизга эҳтиром ила Амир ХУДОЙБЕРДИ,
Ўзбекистон Ёзувчилар уюшмаси аъзоси, шоир
МАҚОЛАНИ ДЎСТЛАР БИЛАН БАҲАМЛАШИНГ