Бош муҳаррир И.Хушевга: Ҳақиқатни яшириш оғир гуноҳ эмасми?!
Исматбек, ушбу видеони кўрсатувингизга қайта қўйганингиз учун раҳмат. Аслида, очиқ мурожаатим, Сизни далдангиз билан Сизнинг сайтингизда бошланган эди.
Мен, ўтган давр ичида, мазкур масалани анча жиддий таҳлил қилганман, ислом уламолари билан ҳам маслахатлашганман.
Прокуратуранинг аввалги айрим мулозимларининг бу масалага муносабатидан маълум бўлишича, юртдошларимиз ичида, менинг ҳаракатимни ножўя ҳисобловчилар, “ёпиқлик қозон ёпиқлигича қолгани яхши» дегувчилар ҳам бор.
Бу каби фикрлар, натижага эришмаётганимизга сабаб бўлаётган бўлиши ҳам мумкин. Бу юртдошларга қуйидаги мулоҳазалар ҳақида ҳам ўйлаб кўришликни илтимос қилган бўлур эдим.
Украиналик она чақалоғини 100 доллорга сотиб олган Австралиялик оила ҳам, туғриқхонада қолдириб кетилган чақалоқни асраб олган Америкалик оила ҳам, кейинчалик фарзандларига биологик ота-онасини таништиришга эришишади.
Совет даврида болаларни алмаштириш кам учрайдиган ҳол бўлган эмас. Фарзанд биологик отасига ҳам, онасига ҳам мутлақо ўхшамаслиги мумкин эмас (ғайритабиий ҳоллар бундан мустасно).
Энди тасаввур қилиб кўрайлик-а, алмаштириб қўйилган фарзанд, табиийки, оилада ота-онасига ҳам, бошқа фарзандларга ҳам ўхшамайди. Фарзандлар улғайишган сари бу ҳолатга уларда ички ҳайронлик туғилиши табиий. Отадачи? Қариндошларда, қўшниларда, таниш-билишлардачи?
Натижада, Покиза она шаъни шубҳа остида қолмайдими? Бундай ҳолларда, ноҳақ азобда қолган оналар қанча бўлган, товушини чиқармай бузилиб кетган оилаларчи?
Бундай ноаниқлик ўрнига, бир-бирига ишонган эр-хотин масалага ойдинлик киритишга эришса, фарзандлар улғайганда уларга ҳақиқатни ошкор этишлик, биологик ота-онаси билан таништиришга ҳаракат қилишлик, нечун салбий назарга лойиқ?
Инсондан, у ҳақидаги ҳақиқатни яшириш оғир гуноҳ эмасми?
Қуръони Каримнинг икки оятида бу масалада тушунтириш берилган-ку.
Ҳаммага ҳурмат билан,
Собир Тўлаганов.
«Дунё ўзбеклари» редакция почтасидан
МАҚОЛАНИ ДЎСТЛАР БИЛАН БАҲАМЛАШИНГ