Бош муҳаррир И.Хушевга: Ўзимга ишонч ва келажагимга умид уйғотдингиз
Ассалому алайкум ҳурматли Исмат Маҳмудович!
Асл касбим бўйича — адабиёт муаллимиман. Бухоро вилоятидаги қишлоқ мактабларининг бирида ўқитувчилик қиламан.
Сизни икки йилдан бўён кўриб, нашрингизни ўқиб келаман. Ростини айтишим керак, сиз билан танишгунга қадар ҳаётга бошқача қарардим. Уй, бола чақа ташвиши ва иш. Рўзғор ва мактаб. Тамом. Ҳаёт ҳақида, юртимизда бўлаётган ўзгаришлар ҳақида, сиёсат ва жамият ҳақида ўйлаш хаёлимга ҳам келмасди.
Мана энди эса, мен тамомила бошқачаман. Бугун юртимизда бўлаётган янгиликлар, сиёсий жараён ва янгиланаётган Ўзбекистон менинг бутун фикру хаёлимни чалғаб олган. Президент олиб бораётган сиёсатни бугун мактабда менчалик қўллаб қувватлайдиган одамни тополмайсиз.
Бу қизиқиш, интилиш ва ватанпарварлик туйғуларининг барчаси Сиз туфайли, сизнинг теледастурларингиз туфайли менинг тор ва кўримсиз қишлоқдаги шу мўъжаз ҳаётимга кириб келди. Мен бугун тамомила бошқа одамга айландим.
Энди мен кунларим қандай ўтганини билмай қолаяпман. Олдинлари кун ўтиши қийин, ўтганда ҳам жуда зерикарли ва ҳис ҳаяжондан йироқ ўтарди. Бугун мен дунёга бошқача кўз билан қарайдиган бўлдим. Дунё менга кулиб боқмоқда, Исмат ака.
Бугун мен шу тор ва хароб, шаҳардан ва марказдан йироқ қишлоғимда ҳам ўз ҳаётимдан мамнунман. Бунинг учун сизга рахмат. Менинг кўз ўнгимда бу ҳаётнинг сирларини очиб бердингиз. Юрагимга яшаш ва ижод қилиш завқини бердингиз.
Ўзимга ишонч ва келажагимга умид уйғотдингиз.
Президент Шавкат Мирзиёевнинг «Янги Ўзбекистони»ни мен сиз боис кашф этдим. Юртимизда ростдан ҳам оламшумул ўзгаришлар бораётганини менга Ўзбекистондаги газета ва журналлар эмас, балки сиз содда тилда тушунтириб, исботлаб бердингиз.
Сиз теледастур орқали шеър ўқиганда, аллақандай номсиз ва исмсиз титроқ ва ҳаяжон бутун вужудимни, юрак бағримни тамомила забт этади. Мен сизга сеҳрланиб қоламан. Умрим бино бўлиб ҳали ҳеч ким менинг хаёлимни сиздай банд этолмаган эди.
Узоқда бўлсангиз ҳам яхшиям борсиз, Исмат ака.
Куни кеча ота онангиз расмини кўрсатиб, ўқиган шеър ва гапирган гапларингизни йиғлаб эшитдим. Менинг ҳам ота онам эрта ўтиб кетишди. То тонггача уларни эслаб, ухлолмай чиқдим. Улар тириклигида мен дунёдаги энг бахтли ва саодатли инсон эдим.
Ҳар куни мактабдан келиб, уй рўзғор ишларимни тугатиб, ҳаммани ухлатиб, сиз билан ёлғиз қоламан. Барча эшиттиришларингизни эшитиб, сиз билан ғойибона суҳбатлашиб, сўнг уйқуга кетаман.
Мен Сизни жудаям ҳурмат қиламан ва …яхши кўраман.
Сизга ҳурмат билан: Ойсулув.
Бухоро вилоятидаги оддийгина адабиёт муаллимаси…
«Дунё ўзбеклари» редакция почтасидан
МАҚОЛАНИ ДЎСТЛАР БИЛАН БАҲАМЛАШИНГ