Феруза Ханжар Президентга: МЕНИ ВАТАНИМДАН АЙЛАМАНГ ЖУДО…
Феруза Ханжар: МЕНИ ВАТАНИМДАН АЙЛАМАНГ ЖУДО…
Ўзбекистон Республикаси Президенти Ш.М.Мирзиёев,
Ички Ишлар вазири П.Р.Бобожонов,
«Дунё узбеклари» интернет газетаси Бош мухаррири Исмат Хушев,
Озодлик радиоси ва барча ОАВга
Бухоро вилояти, Қоракўл тумани, Човли МФЙда
24.12.1980 йилда туғилган Феруза Юсуфжон қизи
томонидан
Ш О Ш И Л И Н Ч О Ч И Қ М У Р О Ж А А Т
Ўзбекистон Республикаси Конституциясининг 21,22-моддалари,
Ўзбекистон Республикаси Олий Мажлиси ратификация этган
БМТнинг «Инсон ҳуқуқлари умумжаҳон Декларацияси» ва «Фуқаролик ва сиёсий ҳуқуқлар буйича халкаро Пакт» асосида.
2011 йилнинг май ойи охирларида Бухоро вилоят ИИБ ОВИР бошлиғи таъзйиқ остида диктовка қилиб, собиқ Президент И.Каримов номига мендан Ўзбекистон фуқоролигидан чиқиш., тўғрисида ариза ёздириб олганди.
Менинг хоҳиш иродамга зид ғайри ихтиёрий ёздирилган ушбу ариза ва шу асосда қонунга хилоф усуллар билан тўпланган барча ҳужжатлар президентга тақдим этилган. Ғайри ихтиёрий ёздириб олинган ушбу ариза бўйича на маҳалла фуқоролар йиғини, на ҳукумат комиссияси мен билан суҳбат ўтказмаган. Мен жиноят содир этмаганман, судланмаганман. Шу боис, амалдаги Ўзбекистон Республикаси Конституциясига хилоф тарзда чиқарилган Президент қарорини ҳақийқий эмас деб ҳисоблайман.
Шундан сўнг кўп ўтмасдан ҳукумат мулозимлари бир ҳафталик паспорт билан 2008 йилда туғилган уч ёшли ўғлим билан бизни Америкага жўнатиб юборишди. Ушбу вақтинчалик паспорт асосида фуқоролигимни тиклашни сўраб собиқ Президент И.Каримовга тинмай аризалар ёзганман. Ўзбекистоннинг АҚШдаги элчиси ёрдам берамиз., десаларда алдаб Ватанимдан чиқиб кетганимни тасдиқловчи ягона бир ҳафталик паспортни ҳам тортиб олишгач, мутлақо ҳужжатсиз қолдик. Бу бир она-болага нисбатан мудҳиш адолатсизлик эди…
Муҳтарам Шавкат Миромонович!
Сиз ҳокимият тепасига келгач, Она Ватанда яшашдан, фуқороликдан маҳрум этилиб дунёга тариқдай сочилган ўзбекларни Ватанга чорлаганингиз менга қанчалар қувонч ва умид бахш этганлигини тасаввур қилиш қийин. Лекин, минг афсуски минг машаққатлар билан 90 кунлик виза олиб Ватанга қайтганимда орзуларим умидларим чилпарчин бўлди.
Уч ойлик муддат хам Ички Ишлар идоралари остонасида бесамар ўтди. Бухородан Тошкентга, Тошкентдан Бухорога «ишинг бу ердамас, у ерда ҳал булади., » деб саргардон этишди. Бирон бир қонуний асос бўлмаган ҳолда фуқоролигим ғайриқонуний бекор этилгани холис ўрганилмади, виртуал кабулхонангизга мурожаатларим хам оқибатсиз қолдирилди. Аксинча, муддатни сарсонликда ўтказишга маҳкум этишиб, энди ИИБ ходими қўнғироқ қилиб: — Сенинг ва болангни ташриф муддати тугади, Ўзбекистондан чиқиб кет, бўлмаса катта жарима билан мажбуран чиқариласан., дейишди. Менинг: — нега, қайси гуноҳим учун., биз қайга борамиз., деган саволларим жавобсиз колаверди.
Биз АМЕРИКАГА ҳеч қандай ҳужжатсиз, юпун, яланг ҳолда Ватандан қувғин бўлиб бордик. АКШ бизга яшаш учун ҳужжат берди, саховатли мезбон бўлди, аммо уз туғилиб ўсган юртимизга минг умид, ишонч билан келганимизда яна қувғин бўлмоқдамиз?! Бу зулмнинг чеки борми?!
Республика ОВИР қабулидаги: — тез чиқиб кет, ёки ўзимиз депорт қилиб чиқариб юборамиз., айтилган ушбу сўзлар мени даҳшатга солди! Нахотки, менинг жонажон азиз Ватанимда адолат, озодлик, инсонийлик ҳануз уйқуда?!
Мен дунёни кезиб сарсон бўлган ўзбек аёлиман. Лекин, ҳанузгача америкалик Америкадан, россиялик Россиядан, қозок Козогистонидан,Туркман Туркманистонидан депорт килингани хақидаги аянчли воқеа эшитган эмасман. Ҳолбуки, умрида бирор жиноят қилмаган бир онани етимча гўдаги билан яна бадарға этиш кимга керак бўлди?!.
Ҳурматли Президент! Бу адолатсизлик Сизгами ё, бизгами?! Ёки, Сизнинг фармонларингизни менсимасликмасми бу?!
Бутун дунё ислохотчи Президент сифатида тан олиб турганида Сизнинг обрўйингизга рахна солиш эмасми бу қилмишлар?! Сизга ишониб келган она-болани она Ватанидан қувгин килишса, қани адолат?!
Менинг 12 яшар болам мактабда ўкишдан, Ватанда яшашдан махрум килинса. Ўзингиз таъкидлаганингиздек: — ота учун бола, бола учун ота жавоб берадиган замон эмаску?!
Ўзбекистон давлати аьзо бўлиб, ратификация этилган БМТнинг «Инсон ҳуқуқлари Декларацияси» 15-моддаси 2-қисмида: — Ҳеч ким ўзбошимчалик билан фуқоролигидан ёки ўз фуқоролигини ўзгартириш ҳуқуқидан маҳрум қилиниши мумкин эмас., 13-моддасининг 2-қисмида эса: — Ҳар бир инсон ҳар қандай мамлакатдан, хусусан ўз мамлакатидан чиқиб кетиш ва қайтиб келиш ҳуқуқига эга., дейилган. Ҳолбуки, БМТ аъзоси бўлган Ўзбекистон Республикасида менинг фуқоролигим тортиб олиниб, конституцион ҳуқуқларим поймол этилди?!
Муҳтарам Ўзбекистон Республикаси президенти
Шавкат Миромонович!
Сиздан ўзга ҳимоячим йўқ, ёлғиз умидим Сиздан!
Илтимос, мен билан боламнинг зўравонлик билан тортиб олинган фуқоролигимиз тўлиқ тикланишига амалий, инсонпарварлик ёрдами кўрсатишингизни сурайман!
Камоли эҳтиром ила:
Феруза Юсуфжон кизи
19.01.2018 йил
+99893 591 05 30
Илова: — ИИВ ва ОВИР мулозимларига тақдим этилган менинг ва ўғлим Ханжар Юсуф ўғлимга оид паспорт ҳужжатлари фотонусхалари ва шеърий мурожаат. Жами 4 варақда.
Сизнинг мурожаатингиз Ўзбекистон Республикаси Президенти Виртуал Қабулхонасига муваффақиятли юборилди!
Диққат!!! Қуйидаги малумотларни сақлаб олинг
Мурожаат рақами |
5756-s/19 |
Текшириш коди |
9a3c0a94d9 |