Исмат Хушевга мактуб: Сизда гапириш санъати бор экан, эшитиш санъати йўқ…

---

Ассалому-алайкум Исмат ака.

Ўзбекистондан кайтгандан кейинги мақолаларингизни ўқиб яна ҳайратга туша бошлаяпман. Ҳақиқатга йўғрилган чиқишларингизни кўриб ҳали Канадада туриб қиладиган ватан олдидаги яна бир йиллик бурчингиз борлигини англаб етдим. Айниқса, Кетмоновга ўхшаб юрт келажагини барбод қилишга астойдил бел боғлаганларнинг кирдикорларини фош қилишдек шарафли бурч фақат Сизнинг чекингизга тушган экан.

Келажак олдидаги ушбу шарафли миссиянгизни тугаллашингизда Сизга куч-қувват тилайман.

Тошкент оқшомидаги суҳбатимиз сиз ва мен кутгандек бўлмади. Ўша вақтда Сизга кўнглимдаги фикрларимни тўлиқ билдиришни жоиз деб билмадим. Сабаби, сиз ўша вақтда жуда асабий эдингиз. Фикрларимни телефонда айтишни ҳам жоиз деб билмадим. Чунки, сизда гапириш санъати бор экану эшитиш санъатини топа олмадим. Сиз ўша вақтда фақат ўзингиз кутган жавобларни эшитишни истаяпсиз. Савол бераяпсиз аммо ўзингиз кутган жавобни бермагунча қайта-қайта сўраяпсиз.

Сиз мендан хафа бўлманг. Чунки сизга мен ҳеч нарса ваъда қилмаганман. Аввало менда ваъда қилиш ваколати ҳам мавжуд эмас. Сизга ўзимнинг фикрларимни айтганман, холос. Менинг фикрларимнинг барчаси амалга ошганда Ўзбекистон аллақачон жаннат бўлиб кетган бўлар эди. Агар менинг қўлимда бўлганда сизни “Халқ сўзи”нинг бош муҳаррилигига ўтказишдан бошлар эдим.

Юбелийингизга келсак, мен ҳам худди шу фикрни айтган бўлар эдим. Раҳбарларнинг бу таклифи жуда ўринли. Бу фикр президент фикри эканлигига 100 фоиз аминман. Сабаби, Ш.Мирзиёев бугунги кунда чорак аср азобу-уқубатларда яшаган халқ учун дабдабали туйу-тантана қилишни уят деб билади. Шу боис “Мустақиллик” ва Наврўз каби давлат байрамларини ҳам оддийгина қилиб ўтказмоқда.

Ҳақиқатдан, бу халқ учун катта тантаналар қилишга ҳали камида 5 йил вақт бор. Иккинчидан, хориждан Ўзбекистонга кела солиб тантана қилишга рухсат берилиши – раҳбарлар олдида президентнинг озгина бўлсада обрўйини тўкиб қўйиши мумкин эди. Шу боис юбилейни ўз она юртингизда – Китобдаги “Минг Чинор” ресторанида ортиқча шов шувсиз ўтказишни маъқул деб билишган. Бу эса, энг тўғри қарор эди.

Энг яқин дўстларингиз ва қадрдонларингиз айта олмаган гапни Сизга айтмоқчиман. Буни хоҳласангиз бетгачопарлик ёки сурбетлик дейишингиз мумкин. Барибир кўнглимдагини яширмасдан тўғри баён қиладиган қусурим бор. Шул боис бўлса керак, ҳаётда доим тўсиқларга дучор бўламан.

“Исмат Хушев билан юзма юз” номли теледастурларингизни ўзингиз озгина цензура қилишингиз лозим. Чунки ушбу кўрсатувларингиз Сизнинг салбий тарафларингизни ҳам ошкор қилиб қўймоқда. Ҳозиргилари анча яхши бўлиб қолган. 10 кун ичида шошилинч қилган кўрсатувларингизда камчиликларингиз яққол билиниб қолган эди. Ҳақиқий мухлисларингизга бу билинмаслиги мумкин. Аммо сизни диққат эътибор билан кузатиб турган раҳбарият учун аниқ кўринади.

Кўрсатувларингизни мақтаётган дўстларингиз аслида ўзлари билмасдан Сизга зиён етказиб қўяётганларини билишмайди. Мисол учун 10 кун ичида қилиб қайтган кўрсатувларингзда Президент номини ҳаддан ортиқ кўп тилга олган эдингиз. Ш.Мирзиёев маҳаллий ОАВга ўзини мақташни тақиқлаган. Шундан билса бўладики, у киши маддоҳликни ёмон кўради. Ўзбекистондаги ютуқларни мақташнинг ўзи кифоя. Чунки, ҳозирда Ўзбекистонда рўй бераётган ҳар бир ютуқ бевосита Ш.Мирзиёев номи билан боғлиқ.

Юқоридагилар менинг шахсий фикрларим. Бундай фикрларни душман сизга ҳеч қачон айтмайди. Дўст эса айта олмайди, истиҳола қилади.  Дилимга келганини тилимга чиқарганим учун аввало узр сўрайман. Маъқул бўлса, қабул қилинг. Маъқул бўлмаса, ҳеч нарса ўқимадим деб ҳисоблаб ёддан чиқаринг.

Аслида эса буларнинг барчасини Сизга меҳрим баландлигидан айтаяпман.

Омонлик тилаб,  

Ф.И.О.

Тошкент шаҳри, Ўзбекистон

“Дунё ўзбеклари” редакция почтасидан

 

МАҚОЛАНИ ДЎСТЛАР БИЛАН БАҲАМЛАШИНГ