Таниқли ўзбек журналисти Дилмурод Жумабоев бугун туғилган кун. Табриклаймиз!
“Дунё ўзбеклари” тақдим этади – Дилмурод Жумабоев: Тўй муборак, ҳур Ўзбекистон!
Жумабоев Дилмурод Хасанбаевич 1978 йил 29 июлда Наманган шаҳрида туғилган. Наманган давлат университети филология факультети инглиз тили йўналишини тамомлаган. “Наманган” нашриёти бош муҳаррири.
“Матбуот материаллари таржимаси муаммолари” мавзусида илмий изланиш олиб бормоқда. Илмий ва ижтимоий-сиёсий мақолалари билан республика нашрларида доимий қатнашиб келади.
Рус, инглиз, турк тилларига амалий таржима билан фаол шуғулланиб келади. Ўзбек ижодкорлари назмий асарларининг инглиз тилига таржималаридан иборат “A story about forty souls of the Woman” номли китоби нашрга тайёрланмоқда.
“Ватан дея жўш урса юрак…” (2014) ва “Ўз юртида яшамоқ бу бахт!” (2015) шеърий тўпламлари чоп этилган.
Эрк тўйинг муборак, ҳур Ўзбекистон!
Истиқлол байрами ҳар ёнда бугун,
Шодлик либосига буркандинг, диёр!
Мустақил Ватаним, мадҳинг тилларда,
Қалбларда жўш урар буюк ифтихор.
Ҳофиз куйлар бугун номингни, Ватан,
Шоир ҳар сатрида сен – жаннат макон.
Эл-улус қувончда, юртда кезар бахт,
Эрк тўйинг муборак, ҳур Ўзбекистон!
Тикланиш йиллари кечмади осон,
Ғанимлар уринди тинчинг бузмоққа.
Минг шукр, оғмасдан қурган йўлингдан,
Эришдинг қудратли давлат тузмоққа.
Бунёдкорлик бугун ҳар бир гўшангда,
Ҳавас-ла боқмоқда сенга бор жаҳон.
Ҳаётинг фаровон, турмушинг обод,
Эрк тўйинг муборак, ҳур Ўзбекистон!
Сарҳадинг посбони қувватли қўшин,
Осмонинг мусаффо, балқ урар қуёш.
Равнақинг йўлида меҳнатда халқинг,
Донғингни таратмоқ истар кекса-ёш.
Сен ким миллатларнинг энг улуғисан!
Борлиғинг оламни этар нурафшон.
Доимо юксалгин, абадий қолгин,
Эрк тўйинг муборак, ҳур Ўзбекистон!
Энди сизми, менга ақл бергувчи?!
Сиз ҳали билмасдан ғордан нарини,
Беруний чизганди дунё шарини.
Унутдингиз наҳот бунинг барини,
Энди сизми, менга ақл бергувчи?!
Сиз ҳали бармоқла қилганда ҳисоб,
Хоразмий битганди Жабрда китоб.
Ўзлаштириб бобом асарин шитоб,
Энди сизми, менга ақл бергувчи?!
Сиз ҳали афсундан кутганда нажот,
Бизда равнақ топган эди тиббиёт,
Бобом эди Ибн Сино деган зот,
Энди сизми, менга ақл бергувчи?!
Форобий жамият таърифин қилиб,
Сизга ўрганмоққа қўйганди илиб.
Давлат тузмоқликни Ўзбекдан билиб,
Энди сизми, менга ақл бергувчи?!
Сичқон ини бўлгандику минг танга,
Боязид хавфи солган ул дам кўланка.
Таъзим қилардингиз шоҳ “Темурланг”га,
Энди сизми, менга ақл бергувчи?!
Сиз осмонга боқиб, хаёл сурган он,
Самога Улуғбек қўйганди нарвон.
Биздик сизга илм даштида сарбон,
Энди сизми, менга ақл бергувчи?!
Сиз ҳали чайлада яшаган маҳал,
Бобурийлар қурган эди Тожмаҳал.
Иншо этмоқликни ўрганиб сағал,
Энди сизми, менга ақл бергувчи?!
Тарихдан мисоллар келтирдим бироз,
Мақсадим, кимлигим эслатмоқ холос,
Ўзини билганга эмасдир бу оз,
Энди сизми, менга ақл бергувчи?!
Ўзбек номи янграмоқда жаҳонда,
Диёримда бунёдкорлик ҳар ёнда,
Барча бизга ҳавас қилган бу онда
Энди сизми, менга ақл бергувчи?!
Юртим юксак тараққиёт йўлида,
Ўз тақдири энди тўла қўлида.
Гул очилган пайтда унинг чўлида,
Энди сизми, менга ақл бергувчи?!
Халқимни етаклар улуғ Юртбоши,
Бахтли бугун элнинг кекса-ю, ёши.
Тарозу босганда Ўзбекнинг тоши,
Энди сизми, менга ақл бергувчи?!
Ватан, сенга жон қурбон!
Ватан деб ҳайқирди чўлларда Широқ,
Билса-да бошидан бўлишин жудо.
Кубро шаҳид бўлди ҳуррият истаб,
Жалолиддин эркчун жон этди фидо.
Торобий курашди Истиқлол учун,
Муқанна ғанимга эгмади бошин.
Ўғлонин йўқотган Тўмарис – Она,
Ёвларни қақшатди, ютиб кўз ёшин.
Беҳбудий миллат деб ёнди шам мисол,
Чўлпон халқ дардида тупроққа ётди.
Истибдод даврининг қонли қўллари
Қодирийни халққа “душман” деб отди…
Улар жондан кечди Мустақиллик деб,
Ки, Ватан севгиси устунлик қилди.
Ўзбекнинг тарихин ёзган бу зотлар
Эркни яшамоқнинг мазмуни билди.
Ибрат бўлсин бизга аждодлар йўли,
Ҳурлик дея оқсин томирларда қон.
Бу қутлуғ тупроқни суртайлик кўзга,
Дейлик: Ватан, сенга жон бўлсин қурбон!
ЭЙ, ЎЗИН ДУНЁГА “УСТУН” БИЛГАНЛАР!
Эй, ўзин дунёга “устун” билганлар!
Ичингиз, ташингиз бир бўлмай қолди.
Иккили сиёсат олиб боряпсиз,
Бундан инсоният ташвишга толди.
Гуантанамо ва инсон ҳақлари
Сўзларин бирликда ишлатмоқ қийин.
Шундайкан, гапирманг инсонийликдан,
Не десангиз, билинг, менга бир тийин.
Ёки Баск давлатин олайлик тилга,
Сизнингча “ЭТО бу – террорга мисол”.
Кулгили эмасми бундайин таъриф?!
Наҳотки бу озод фикрга тимсол?!
Гапирмоқ ортиқча Ирландияни,
Икки қардош бирлашолмай ҳалакда.
Аммо бонг урасиз “эркинлик” дея,
Қуруқ фалсафангиз кезар фалакда.
Саддамни дедингиз золим ҳукмдор,
Дастингиздан вайрон бўлди-ку Ироқ.
Мана орадан ўтди шунча вақт,
Аммо ҳали бу юрт тинчликдан йироқ
Тушунмадим Афғон келишингизни
Мақсад нейди ўзи, тинчлик ё кўкнор?
Бин Ладен дегани ким эди, айтинг,
Диний раҳнамоми ё сизнинг жонвор?
Ислом динин рўкач қилманг ҳар ишга,
Йўқдир бизнинг динда террор деган сўз.
Шамолнинг қаердан эсганин кўрмоқ
Учун етарлидир ҳатто юмуқ кўз.
Араб ўлкаларин ост-уст қилдингиз,
Сизга не бировнинг турмуш тарзидан??
Ёки мумкинми бу, давлатни йиқмоқ,
Уч-тўрт ғаламиснинг қилган арзидан??
Қирғинбаротлардан чайқалар фалак –
Украин элида тўкилмоқда қон.
Оловга ёғ тўкиб сиз – “холис дўстлар”,
Эзилган халқ бўлди, сиёсат – “Майдон”.
Яқинлашманг ҳатто, менинг юртимга,
Қаршингизга энг олд сафда чиқаман.
Ватанни қўримоқ пайти мен ботир,
Билинг, терингизга сомон тиқаман!!!
ХАЛҚИМ
Халқим, ҳушёр бўлгин, босмасин ғафлат,
Сенга ёв бўлганга айт кескин сўзинг.
Ҳар ёндан кирмоққа уринар ғаним,
Ўзингни, уйингни асрагил ўзинг.
Қувватга тўлганинг кўролмаган кўп,
Бойлигинг кўпларнинг уйқусин бузди.
Кўзин сарҳадингга тиккан аблаҳлар,
Сени йиқмоқликнинг режасин тузди.
Уйғоқ бўл, алданма ёлғон, эртакка,
Ўйинчоқ бўлмагин душман қўлида.
Қадрин бил бугунги бахтли ҳаётнинг,
Якдил бўл, бирлашгин тинчлик йўлида.
Саодат калити – Тинчлик, Омонлик,
Бу эзгу сўзларни эт қалбингга жо.
Экмоқ истаганлар нифоқ уруғин,
Билмаслар, сен учун Тинчлик бебаҳо.
Азалдан тотувлик қутлуғ шиоринг,
Мусаффо осмондир сен учун мақсад.
Сузмоққа шай турар вайронкор булут,
Ҳайбатингни кўриб этолмай журъат.
Ҳаддини билдиргин бу ёвуз кучнинг,
Сен буюк давлатсан, ўзингга бексан.
Темурдек паҳлавон фарзанди бўлган,
Оламни титратган миллат – Ўзбексан!
АДАБИЁТ
Кучли қурол дерлар адабиётни,
Кимларнинг қўлида бугун бу қурол?!
Кимлар истаганин қоғозга тўкиб,
Сингдирар ёт ғоя, турибмиз беҳол.
Бири ваҳшийликни этмоқда тарғиб,
Бошқасин ҳар сатри фаҳшга тўла.
Ўзликни ёритган асарлар узра
Пучак кучлар “фикри” солмоқда соя.
Жамият ахлоқин сақламоқ учун
Бундай разолатга қўймоқ керак чек.
Онгга, тафаккурга оғу солгувчи
Бундайин “ижод”ни истамас Ўзбек.
Адабиёт демак – Яхши хулқ демак,
Одоб-ла ҳар инсон топар саодат.
Ахлоқни унутиб битилган ҳар сўз
Ватан, миллат учун эрур фалокат.
Маънавий покликни асрайлик бугун,
Шунда комилликка бурканар ҳаёт.
Номақбул жумлалар ёзмасин қалам,
Биз учун кераги бу – ОДОБИЁТ!
Наманган
Наманган – водийнинг ажиб гўшаси,
Лафзи кенг жаҳонга кетган хуш наво.
Гуллар шаҳридир бу, гулзорлар шаҳри,
Боғидан хушбўйлик тарқатар сабо.
Наманган – пок ният, шижоат демак,
Аҳлининг қалбида юртга муҳаббат.
Ҳунарманд элдир бу, савдогар эли,
Меҳнатда топмоқда эътибор, ҳурмат.
Наманган – мозийнинг ёрқин шуъласи,
Машраб киндик қони тўкилган макон.
Олимлар юрти бу, фозиллар юрти,
Не Усмон, Ҳабиблар кашф этди замон.
Наманган – саънатга ошуфта маскан,
Ҳофизи бетакрор, шоири – якто.
Ижод конидир бу, истеъдод кони –
Ҳуррият мадҳига жўровоз наво.
Наманган – латофат руҳига булоқ,
Аёллари лобар, қизлари дилбар.
Эрам аксидир бу, нафосат акси,
Бунда оташ севги топади диллар.
Наманган – яшнатиш ишқининг рамзи,
Бунёдкорлик бирла кент топди виқор.
Ҳурлик кўркидир бу, Истиқлол кўрки,
Нурга бурканмоқда бу сўлим диёр.
Наманган яшариш ичида бугун,
Оллоҳнинг бергани – мана шу асли.
Шараф онидир бу, саодат они,
Хуш келдинг шаҳримга ЎЗГАРИШ фасли!
ТИЛИМ
Саксон тўққизинчи йилнинг кузида
Эркнинг илк нафасин келтирди сабо.
Давлатнинг тилига айландинг, Тилим,
Бошланди боғларда Ўзбекча наво.
Етмиш йил сўзлашиб ўзга тилида,
Аллалар олганди ўзгача оҳанг,
Шукр, қайтдинг охир Туркий элимга,
Сенсиз суҳбатларда қолмаганди ранг…
“Хамса”ни битмоққа етган сўзларинг,
Қимтиниб, бир четда турар эди жам.
“Оғалар тили”да куйлардик қўшиқ,
Тилим, сенсизликдан кўзлар эди нам…
Ҳуррият йўлида дастлабки қадам –
Миллатим тилига қайтганинг, Тилим.
Келтирдинг ортингдан Мустақилликни,
Ўзбекча жар солди бу ҳақда элим.
Сенсиз маъни йўқдир менга яшашдан,
Борлигинг ғурурга тўлдирар дилим.
Мен учун муқаддас, олий забонсан,
Чунки сен онамнинг тилисан, Тилим!
…БЎЛМА
Тупроққа қоришган хаслардан бўлма,
Ҳеч ким эшитмаган саслардан бўлма,
Ўз созини сотган пастлардан бўлма,
Ватан манфаатин сўзловчи бўлгин!
Беҳуда сарф бўлган онлардан бўлма,
Бекорга тўкилган қонлардан бўлма,
Ҳаёти маънисиз жонлардан бўлма,
Ватан манфаатин кўзловчи бўлгин!
Она тупроқ қалбин тилгувчи бўлма,
Ўзга юртни жаннат билгувчи бўлма,
Бегонага қуллуқ қилгувчи бўлма,
Ватан манфаатин изловчи бўлгин!
СОНЕТЛАР
Ўзбек эли
Бирига музлик ватан, бошқа бирига тоғлар,
Фақат Ўзбекка Оллоҳ бўстонни кўрмиш раво.
Эй замини мўъжиза, таърифинг бўлмас адо,
Қимтинади олдингда жаннатга қиёс боғлар.
Бу олтин тупроғингга талпинди не не шоҳлар,
Баъзан зулмат остида қасрингда тинди наво,
Хатто кун бўлди халқинг азобдан чекди жафо,
Ҳисобини йўқотди сенчун қазилган чоҳлар.
Лек юртсевар алпларинг Ватан дея тўкди қон,
Мустақиллик курашинг мозийларда топди шон.
“Иймондан Ватан ишқи” – ҳайқирар ўтмиш саси.
Эркинг бўғмоқ бўлганлар шукр, букилди бели,
Не буюк неъматдир бу – ҳурриятнинг нафаси,
Истиқлол – азал ҳаққинг, давринг сур, Ўзбек эли!
Ўзбегим
Сергак бўл Ўзбегим, элтмасин ғафлат,
Ёрқин камолингга ҳасад қилган кўп,
Ғавғо чиқармоққа уриндилар хўп,
Тўрт ёнда ёғийлар кутмоқда фурсат.
Дунёни бошқарар бугун манфаат,ё
Ўзганинг бахтидан бойиган бир тўп,
Сокинлик бузмоққа етади бир чўп,
Маънисиз саробдан айлагил нафрат.
Буюк келажакка тутдинг йўлингни,
Душмандан асрагил ўнгу сўлингни,
Қўшни эллар сенга ибратул назар.
Тинчлик, омонликдир саодат тахти,
Хотиржам бўлмасанг не керак зеб-зар?!
Осойиш, ҳур Ватан – инсоннинг бахти!
Дилмурод ЖУМАБОЕВ,
Наманган
“Дунё ўзбеклари” дан:
Бугун наманганлик истеъдодли ўзбек журналисти Дилмурод Жумабоев таваллуд топган кун.
Ўзбекистон ўзининг Дилмуроддек фидойи ва садоқатли фарзандлари борлиги учун ҳам Ўзбекистон бўлиб турибди десам, муболаға бўлмас.
«Дунё ўзбеклари» нашр этила бошлаганидан бўён ижодий ҳамкорлик қилиш жараёнида мен Дилмуроднинг дунёқараши ва қувваи ҳофизаси ниҳоятда кенглигига бир неча бор ишонч ҳосил қилдим. У инглиз ва рус тилларини яхши билади. Бугун Наманганда, эртага Корея ва индинига Туркиядаги халқаро анжуманларда Наманган ва Ўзбекистон номини шон шарафга буркаб маърўзалар қилаётганини кўриш мумкин.
У бугун ўзи меҳнат қилаётган «Водиймедиа.ўз» нашри муҳаррири Анварбек Икромов билан эркин сўз қудрати нечоғлик кучли ва улуғвор эканини нафақат Наманганда, балки бутун Ўзбекистонда ҳам тараннум этмоқда. Ўзбекистонда инқилобий ўзгаришлар бошланган шу муборак кунларда давлат раҳбарининг ёнида Дилмурод ва Анварбеккка ўхшаш Ватан учун жонини ҳам фидо қилишга тайёр билимли ва истеъдодли ёшлар бўлиши лозимлигини ич-ичимдан аниқ ҳис этаман.
«Дунё ўзбеклари»нинг Наманганда шундай жонкуяр ва жасоратли ҳамкорлари борлигидан мен олис Канадада бўлсам-да, муҳаррир сифатида қалбимда ажиб бир фахр туяман.
Шу фахр бизни ҳеч қачон тарк этмаслигини орзу қиламан…
Исмат Хушев,
«Дунё ўзбеклари» Бош муҳаррири,
29 июль, 2017 йил, Торонто шаҳри, Канада…
МАҚОЛАНИ ДЎСТЛАР БИЛАН БАҲАМЛАШИНГ
Баракалло Дилмурод табриклаймиз.
Энди баландпарвоз гапларни йигиштириб, Узингиз халк учун нима иш килдингиз шундан гапиринг.
Бир пайтлар хужайинингиз «хаёт учун» деган проектида нималар килганини дунё билди.
Аввалам бор Дилмуродни туғилган куни билан табриклайман!
Бугунги глобал ўзгариш замони ўз йўлини топиб бораётганлиги рост бўлсин.
Агарда шароитга мослашаётган бўлсалар бу жуда ачинарлик бир холат бўлади!
Мен собит бир ишонч билан бундай бўлмаса керак деб ўйлаб турибман.
Ўтган бир мақоласида чет элларда юрганларнинг кўпини қайтариш керак дейишганида Дилмуроднинг эътирозли ва қаршиликларга тўла мақоласи чиқган эди.
Вақтнинг ўтишини қаранг ўша инсонлар қарши курашган жиноятчилар бугун дунёга шарманда бўлишди!
Юртбошимиз Шавкат Миромонович бизларнинг кўнглимиз тубидаги, ҳалқимизнинг айтилмасдан келинган орзу умидларини олий минбарлардан туриб баралла айтмоқдалар!
Юртни севиш билан, раҳбариятни севиш ўртасида жуда катта фарқ бор.
Худди шунингдек мансаб ва ҳаётни севиш ва ҳокозолар!
Дилмуроднинг изланувчан эканлиги жуда яхши, журналистик қалами ўткир бўлишлиги учун тилакдошман!
Ана шу изланувчанлиги сўнмасин ва мардлик билан қоришиб кетсин!
Siz hali barmoqda qilganda hisob
Xorazmiy bitgandi jabrda kitob-debdi shoir Dilmurod Jumaboev….
Bizda algoritmning mushkul muammolari
Qo’ldagi barmoqlarday oddiy qilinganda hal.
Oliy irq da’vogari Cherchilni bobolari
Hatto sanay olmasdi o’n barmoqni mukammal…. Bu esa G’ofir G’ulom satrlari.
Хакикатдан укимишли, зиёли ва маданиятли инсон эканликлари бир карагандаёк кузга ташланади.
Ота онасини бахтига омон булсинлар! Фарзандлари хам узларига ухшаган зиёли ва маданиятли инсон булиб етишишсин!
Ташки дунё билан, айникса ривожланган давлатлар билан алока урнатишда инглиз тилини билувчи дунёкараши кенг кадрлар бир куприк вазифасини утайдилар. Жамиятимизда асосан мана шундай ёшлар фикрига суяниб сиёсат олиб борилса, фойдадан холи булмайди.
Dilmurod demokratiyaga qarshi kurashadi
. Dunyouzbeklari esa demokratik nashr. Bu yerda konflikt bor va chuqurlashib boraveradi. Bir kuni bu portlaydi.