Мирзиёев унга етказилмайдиган хабарларни Озодликдан ўқишини тан олди
Ўзбекистон президенти Шавкат Мирзиёев Олий Мажлиснинг қуйи парламентида ўтказган видеоселектор йиғилишида палаталар, сиёсий партиялар фаолиятини таҳлил қилар экан, қабул қилинган қонунларнинг ишламаётганини, депутатларнинг бепарволигини танқид қилди. Президент тиббиёт соҳасидаги камчиликларни айта туриб, бунга мисолни Озодлик веб сайтида эълон қилинган мақоладан иқтибос ўқиб берди. Мажлисда президент ҳар эрталаб Интернетга киришини ва депутатлар билмаган ишлардан хабари борлигини айтди.
Президент Шавкат Мирзиёев Олий Мажлисда депутатлар билан бўлган учрашувда, паламент депутатлари қишлоқ врачлик пунктлари, касалхоналарида энг камида ўн кун юриб, ҳақиқий муаммоларни аниқлаб, муаммоларни қонуний ҳал қилиш бўйича парламент назорати тизими яратиши кераклигини айтди.
Шавкат Мирзиёев касалхоналардаги аянчи аҳволга тўхталар экан, унга берилмайдиган информацияни ўзи Интернетдан излаб топганини айтди:
— Мана битта мисол, эрталаб Интернетни ўзим очдим, буни ҳеч ким менга бермайди. “3 июль куни Бешариқ марказий касалхонасига келтирилган 25 яшар аёл вафот этди. Унинг турмуш ўртоғи Воҳид Омоновнинг сўзларига кўра, фожиа биринчи ёрдам кечиктирилгани ва шифокорларнинг лоқайдлиги туфайли юз берган, дейди президент
Озодликнинг «Ҳомиладор аёлнинг ўлимига ўзбек тиббиëт тизими айбдорми?» мақоласидан скриншорт
Президент мақоладан яна:
“Агар вақтида биринчи тиббий ёрдам кўрсатишганида хотиним тирик қолган бўларди. УЗИ текширувидан сўнг хотинимни зудлик билан операцияга ётқизилиши кераклигини айтишди. Бироқ анализлари чиқмагач, операцияни нуқул орқага суришди. Тез операция қилишганида ўлмасди. 6 соат кечикиб операция қилишди.
Олий Мажлисдан текширув келди, деб лабороторияни ёпиб кетиб қолишган. Операция қиладиган врач ҳам текширувчилар билан бирга юргани боис касалга қарашга қўли тегмади. Хотини ҳам врач экан уни телефон қилиб¸ мени ўрнимга операционнийга кир деяпти. Текширувчи келса касалга қарамаслик керакми?, дейди Воҳид Омонов, деб Озодлик мақоласидан келтирилган иқтибосни тугатар экан, Мирзиёев бундай дейди:
— Олий Мажлис келади экан деб, ёпиб қўйган лабораторияни. Катталар келади деб, ҳаммамиз катта бўлиб кетдикми?, дейди президент.
Bu yangilikni eshitib ajib bir o’ylar ila xursand bo’ldim…