Элёр Жўраев: Ҳеч кимни Сизчалик соғинмагандим…
ҲЕЧ КИМНИ СИЗЧАЛИК СОҒИНМАГАНДИМ
Бунчалик чўзилди жон қаранг бу тун,
Айролик музлатди танимни бутун,
Расмингизга қараб йиғладим бугун —
Ҳеч кимни сизчалик соғинмагандим.
Келинг, тиз чўкайин бир пойингизга,
Қувончим сиғмайди рўёйингизга,
Кўникмадим борлиқ дунёйингизга,
Ҳеч кимни сизчалик соғинмагандим.
Кўнглим ёришмайди ўчик чироғи ,
Расмингизга сингган чашмим қароғи,
Дийдорнинг бизларга борми яроғи,
Ҳеч кимни сизчалик соғинмагандим.
Балки арзимайди дейсиз бу байтинг,
Кўксингиз бошимни сўрарму айтинг,
Ишқимиз дарбадар юрарму қайтинг —
Ҳеч кимни сизчалик соғинмагандим.
Тафтингиз рангини чизиб излайман,
Унимсиз беҳуда гарчанд сўзлайман,
Олис йўллар яқин аниқ кўзлайман,
Ҳеч кимни сизчалик соғинмагандим.
Ташнаман, муҳимдир меҳр ариғи,
Келмаганингиз шу висол дариғи,
Нишон эмасми-ё рангим сариғи,
Ҳеч кимни сизчалик соғинмагандим.
Қиё боқолмадим бирор парига,
Бегона ботмайди дилим қаърига,
Ўзим айбдорман бунинг барига,
Ҳеч кимни сизчалик соғинмагандим.
Элёр Жўраев
(Панжакентий)
ШУНДАЙ СЕҲРЛАЙКИ…
Шундай сеҳрлайки, сувратим осиб,
Ҳар битта қайрилган киприкларингга.
Шаҳло кўзларингни қолади тўсиб,
Меҳримни ямайман ёриқларингга.
Шундай сеҳрлайки, юзинг беркитиб—
Турсин, ишончларим бўлиб бир ҳижоб.
Гаҳ — десам, шу заҳот кафтимга қўниб,
Берасан лаббайлаб — сўзимга жавоб.
Шундай сеҳрлайки, жим бўлиб атай,
Соғинчим сабодек юзинг силасин.
Қон йиғлатиб ташлаб кетгудек бўлсанг,
Юрган йўлларингга қадрим қуласин.
Шундай сеҳрлайки, туғулсин минг йил,
Бир кечада олган бўсам уруғи.
Байроғини илса , ожиз қолсин тил —
Жасур, мардонавор ишқим ғурури.
Шундай сеҳрлайки, сенга эргашиб,
Нигоҳим ортингдан соядек қувсин.
Нафсингга қул бўлсанг бесабр шошиб,
Ётган тўшагингда рашкларим буғсин.
Шундай сеҳрлайки, бағритош кўксинг,
Қалбим ўчоғида қиём қайнасин.
Армонлар чалкашса оёқларимга,
Муҳаббат тишида эзиб чайнасин.
Шундай сеҳрлайки, сувратим осиб —
Ҳар битта қайрилган киприкларингга…!
Элёр Жўраев
МЕН МЕҲР БЕРМАЙИН…
Мен меҳр бермайин,
Берсам уялар —
Офтоб!
Ҳижолатга қўймайин дейман.
Кўксингга ёғдирсам эриб кетасан,
Қўйгин хўп!
Телбача суймайин дейман.
Мен меҳр бермайин,
ёмон бераман!
Ўзингни унутиб қўймоғинг тайин.
Меҳрим ортиб борар—
Кун ўтган сайин,
Ишон!
Сўзларим қум,
майиндан-майин.
Мен меҳр бермайин,
Денгизлар чалғир,
Ишқим дунёларга
Бир қучоқ оқ гул.
Дийдорим дурдона,
олтиндан қиммат,
Ошиқиб жисмимга бўлиб қолма қул.
Мен меҳр бермайин,
берсам қўрқаман,
Ёнингда турсам ҳам соғинишингдан…!
Афсонаман жоним,
Мен бир оловман,
Ўзимни тутаман оғинишингдан.
Мен меҳр бермайин,
Боқий эмасман,
Жим!
Фақат тунлари , биров билмасин.
Шундай ниқоб кияй сабрдан тикиб,
Ёнимдан ўтганлар назар қилмасин.
Мен меҳр бермайин,
Меъёрдан ўтиб,
Баъзан эркалансанг истаб қоламан.
Сенга сезилар ё сезилмас балким,
Шамол қиёфада бўса оламан.
Мен меҳр бермайин,
Кўнглим қаъридан,
Берсам ҳам , беркитиб бераман нафсдан!
Кўник!
Шу чиройли…
Худди сен каби,
Фақат ажратибгина ололсанг қавсдан…!
Мен меҳр бермайин…
ВАТАН МАДҲИ
Кўҳна Панжакентим улуғ шоири,
Рўдакий бобомнинг номидан салом.
Ошно-и шеърият назмиға доир,
Элёр Жўраевман, дўстлар ассалом.
Дунёнинг томидур — Помир тоғлари,
Тожикистон юртим, олғайсиз алик.
Чингизга курашган қаҳрамон бобом,
Суғдимнинг оридур -Темури Малик.
Қалбида жўш урган ноласи мақтал,
Хотиримда қолди, минг битта оҳи.
Дилшоди Барнодек бир ғазалнавис,
Истаравшан эрур унинг зодгоҳи.
Ибн Сино каби, табибу олим —
Ҳам шеърнавис, не — не зотлар ўтмаган.
Улар юракларга кўмилган қабр,
Халқимиз ёдида ҳеч унутмаган.
Сомоний савлати — шукуҳи диёр,
Забардаст подшоҳдур бошида тожи.
«-Эй ХУДО юртимни обод қил»- дея;
Бўлди , Эмомали Рахмон ҳам Хожи.
Дунёга табассум улаган инсон,
Хожибойдек ўғлон — асли шу юртдан.
Фахрланиб айтгум муттафаккир-у,
Донишманд онаси — насли бу юртдан..
Мадҳингни ёзаман олис юртларда,
Соғинчинг жўш урар, эй она-Ватан.
Тоғингда ҳилпироқ лолаларингни,
Хаёлда қучаман ягона Ватан!
Мана йигирма беш баҳор ҳам тўлди,
Мана яшнаяпсан озод ва обод.
Жовидон даврингдир номинг ҳам улуғ-
Мустақиллик сенга боз муборак бод!
Элёр Жўраев
Бегона ўтлардек ажралмас чимман,
Ўзга ёр қўлидан тутдингиз жимман,
Биласизми ўзи, асли мен кимман —
Севмаганингизман…
Бепарвойим, сизга бўлсин бу — борлиқ,
Пинҳон муҳаббатим қиламан тортиқ ,
Севганингиздан ҳам севолган ортиқ —
Севмаганингизман…
Шунчаки, кўнгил чун ғамингиз еса,
Шодонсиз бунчалар севаман деса,
Кўзларингиз кўрмас, ёрим мен эса —
Севмаганингизман…
Майли , ҳеч англаманг дарёча меҳрим,
Қалбингиз сезмайди дунёча сеҳрим,
Агар билолсангиз дебоча зеҳним —
Севмаганингизман…
Балки, ҳақсиз , менинг қиёфам ёқмас ,
Чиройдан асрасин, бегона боқмас,
Ҳар кимса кўнглимнинг эшигин қоқмас,
Севмаганингизман…
Бағритошларга пок муҳаббат бичиб,
Алдангансиз, қоши қарони қучиб,
Бир четларда қолган юраги чўчиб —
Севмаганингизман…
Бўса олишингиз тун бўйи кутган,
Уйғотмасдан ётиб аламлар ютган,
Сиздан рози бўлиб дунёдан ўтган —
Севмаганингизман…
Элёр ЖЎРАЕВ
