Таниқли ўзбек журналисти Дадахон Ёқубов: “Ассалому алайкум, баҳор!”
Суратда: Таниқли ўзбек журналистлари Дадахон Ёқубов, Исмат Хушев ва Карим Баҳриев Ўзбекистон Олий Кенгаши сессиясидан танаффусга чиққан лаҳзалар…
Ассалому алайкум, Исматжон дўстим!
Мен бу мактубимни Ассалому алайкум, баҳор! деб номладим. Ал Беруний бобомиз таърифлаганидек, олам буржининг икки кўзи бор, бири наврўз бўлса, иккинчиси меҳржондир. Бири 21 мартга тўғри келса, иккинчиси 21 сентябь куни юз берадиган тенгкунлик, яъни кеча ва кундузнинг тенглашиши демакдир. Шу кундан янги кун бошланади. Меҳржон нафақат табиатда, балки жамиятдаги илиқлик билан бошланди. Мамлакатимизда илиқлик эпкинлари эсмоқда…
Кейинги йилларда Сиз ўзингизни ҳақиқий журналист, ижодкор шоир, янги жанрларни кашф этувчи ёзувчи, холис тадқиқотчи эканлигингизни исботлай олдингиз. “Дунё ўзбеклари” сайти машҳур бўлиб кетди, Сизга катта шуҳрат келтирди. Бугун ўзбек журналистлари орасида энг таниқлиси ҳам ўзингиз бўлсангиз керак. Ўзбекистон бу ижод изини ва самарасини кўп йиллар унитмаса керак. Кўплаб ҳамкасб дўстларингизни тушкунлик гирдобидан олиб чиқдингиз. Жумладан мени ҳам.
Мен кейинги ўн йил давомида тинмай меҳнат қилдим, гоҳида адашдим, гоҳида жон сақлаш учун оғир муаммолар ичида қолдим. Аммо сўнгги нафасгача ижодни тарк этмадим. Тўғри , баъзан ҳом, пишмаган асарларимни ҳам эълон қилдик. Фикрни биринчи эканлигини тан олган ҳолда таваккалчиликка ҳам йўл қўйилади, албатта. Сиздан миннатдорлигимнинг яна бир сабаби, ўн йил давомида хеч кимдан яхши гап эшитмадим. Жон фидо қилсам ҳам, миллионлаб ўз маблағларимни сарф қилсам ҳам “раҳмат”га муносиб бўла олмадим.
Отам раҳматли кунларнинг бирида “Нима қилиб бўлса ҳам телестудияга қайтгин, Сени элга танитган тележурналистлик касбинг бўлади, иложини топмасанг, у ерга қоровул бўлиб ишга киргин, хеч бўлмаса, ёнингдан ўтган кетган ўша Дадахон, тележурналист, деб шарафлаб қўяди, дер эдилар.
Менинг тележурналистика касбига қизиқишим, Тошкентда қолиб кетишимга, ота-оналаримдан узоқда яшашимга сабаб бўлди. Отам каби оддий боғбон бўлганимда уларнинг бетакрор меҳрига қонган, азизларимни имкониятим даражасида сийлаган бўлар эдим, афсус. Энди улар бу ёруғ оламни тарк этиб кетдилар. Ҳудо раҳмат қилсин!
Тўғри, ҳар ойда икки мартадан уларни зиёрат қилиб, Андижонга – Ойим қишлоғимизга борар эдим. Энди бирга яшаш бошқа эканлигини, ўзим ота, бобо бўлиб, сезаяпман. Фикримни давом эттирсам одамларнинг менга бўлган муносабатини билишимча, телеэкандаги қиёфам белгилар экан.
Бундан етти йилча аввал Ёдгор ака Турлибеков: Дадахон Ёқубовни мен яхши биламан, уни Ўзбекистонда билмаган одам топилмаса керак. Унинг олтмишинчи йилларда Ўзбекистон телевидениясида ишлаб, халқ юрагининг энг теран ва ҳар ким журъат этаолмайдиган дардларини излаб топа билиши ва уларни юзага чиқаришда миллионлаб ўз муҳлисларига эга бўлган эди. У ғайрат билан ишлаб толмас, хар кунги ўша пайтлар Ўзбекистон радиосидан кеч соат 10 дан бошланадиган “Оқшом тўлқинлари” эшиттиришларида ҳам қатнашар ва бу эшиттириш бошланишини ҳам кўплар ҳар куни зориқиб кутишарди. Унга кўплар қатори менинг ҳам ҳавасим келарди.
Ҳа, Дадахон ўша даврнинг машҳур дикторлари Насиба Иброҳимова ва раҳматлик Ўктам Жобировлар қаторидаги ёқимли нодир овоз ва нафас соҳиби бўлган. У 2005- йил, Қарши шаҳри, бизнинг “Муқимий” маҳалламизда ўтказилаётган “Наврўз” байрамида иштирок этган. Унинг “Ассалому алайкум” деган ёқимли товуши микрофондан янграганда, унинг таниш нафасидан гўё бу зал тўла одамлар 15 йилдан бери соғиниб кутган қадрдонини топгандай, маҳалламиз халқи уни гулдурос қарсаклар билан, ҳатто қарияларимизгача ўринларидан туриб кутиб олганди”, – деб “БИРДАМЛИКИНФО” сайтида ёзган эканлар.
У кишига раҳмат, умрингиз узоқ бўлсин, самимий инсон, дегим келади. Ўқиб жуда ҳам ҳурсанд бўлдим. Айтиш жоиз бўлса, қайта туғилдим.
1993 йилда Телевидениедан бадарға қилинганман. Шундан буён мени хеч ким экранга яқинлаштирмайди. Янги касбни топиб, ўрганишга кучим етмади. Ишсиз қолдим. “Наврўз” жамғармаси эса етим қолди.
Давлатга ҳам, муҳолифатга ҳам керак бўлмади. Миллийлик ўрнини нима эгаллаганлигини ўзингиз биласиз. Ҳатто диндорларимиз иккига бўлиниб олишди. Мен эса ўзбекчиликни, наврўзни куйлаб юравердим.
Одамлар ўша баҳор онларини унутди. Ёшларимиз осмондан тушишди. Шеър ёзсам ( қирқ беш йилки) иқтидорсиз дейишди, роман ёзсам, ёмон дейишди, кўрсатув қилсам, камчилигини қидириб кесишди. Сиёсатда ҳар икки томон ҳам мени яккалади. Интернетда троллар кўп. Танқид дегани ҳақорат.
Йўқ, дарров мени ёмонловчи одамлар топилди, муаллифга дашном беришди. Шу каби Сизни ҳам Исматжон, танқид қилувчилар кўп.
Мени “қўшмачи”, “олғир”, “юлғир” дейдиганлар ҳам бор. Менинг асосий айбим, милиция капитани томонидан “Наврўз” жамғармасида ноқонуний текширув ўтказилганлиги ва мендан унинг пора олишга уринганлигини боис, МХХ ёрдамида уни фош этганим, ҳамда унинг тегишли қонуний жазо олиши бўлди.
Милиция зобити қамалиб кетгди. Унинг ҳамкасблари мендан қасос олдилар.
Қолганини достон қилиб ўтирмайман. Бундан фойдаланган нопок кимсалар “Наврўз” жамғармасини талон-тарож қилдилар. Ўзимни эса жисмоний йўқ қилишга ҳаракат бошладилар.
Ўзимни тентакка солиб, уларга қонуннинг ҳам кучи етмаслигини билиб, қочиб кетишга мажбур бўлдим.
Энди хориждаги баъзи интернет сайтларига келсак, Мамлакатда катта ўзгаришлар юз бериб, адолатнинг илиқ эпкинлари эса бошлаётганига қарамай, давлат раҳбарларини ҳам,мамлакат ичкарисида яшаётган минглаб оддий кишиларни ҳам ҳақорат қилишдан қайтмаяпти.
Ўзбек халқида шундай мақол бор: ”Бировга ўлим тилагунча, ўзингга умр тила!”
Ҳаракат ўз раҳбарлари дастурларини, таклифларини ишлаб чиқиши, халқ дардига дармон бўлиши, одамлар билан тил топиши зарур эмасми?
Мустақилликни фақат миллий ҳамжиҳатлик, бир бирини кечира билиш, самимият, меҳр –муҳаббат ва олиймақом меҳнат сақлаб қолади. Юримизга бахт олиб келади. Фаровонлик яратади. Соҳта обрў излаб машҳур ва ҳурматли одамларга лой чаплаш, бекорчи ва фитначининг иши саналишини ҳамма билади.
Бағишлов шеъримда машҳур кишиларимизнинг номларини шарафлар эканман, уларга ҳам тош отишганлигини танқид қилдим. Эркин Воҳидов, Абдулла Орипов каби улуғлар ҳақида ёмон сўзни шайтонлар айтишади, менимча.
Ҳатто муҳолифат фаоли Дадахон Ҳасановни ҳам ҳақоратлаганлар бор.
Осмондаги доно ўгитларни айтиб ўтирмайман. Яратган ҳамма нарсани ўзи кўриб турибди. Мен ҳам балки гуноҳсиз паришта эмасдирман. Аммо давлатдан ташқари ўз фаолияти давомида 100 миллион доллардан ортиқ маблағ топиб, камбағалларга улашган. Яхши сўзини, меҳрини аямаган одам, “Наврўз” байрамини меҳр–саҳоват, миллий ҳамжиҳатлик байрамига айланишига хисса қўшган одам бир неча минг долларни ўз вақтида эгасига қайтара олмаганлиги учун фирибгар бўладими?
Бир жиноятга битта жазо берилиши Жиноят кодексининг 8 моддасида белгилаб қўйилса-да, тўрт марта жиноий жавобгарликка тортишларини қандай тушуниш мумкин? Бунинг асосий сабаби, Наврўз жамғармасини қолган қутган бойликларини талон тарож этиш мақсади эди. Бунга эришдилар. Мени лавозимимдан бўшатиш орқали бечораларнинг қозонини қайнатиб турган жамғармани ҳам йўқ қилишди.
Куни кеча Перзидент Вазифасини бажарувчи, Бош Вазир Шавкат Мирзиёевнинг тадбиркорлик фаолиятини ҳимоя қилиш юзасидан жиддий фармони чиқди. Бу эса “олғир” текширувчиларнинг, коррупциячи амалдор ва орган ходимларининг ноқонуний харакатларини жиловлашга ҳизмат қилиши аниқ!
Кейинги бир ой давомидаги ўзгаришларга эътибор берилса, йиллар давомида тўпланиб қолган муаммоларнинг анчагинаси ечилди. Ҳатто хориждаги алчоқлар ҳам буни “илиқлик эпкини”деб баҳоладилар.
Исматжон дўстим!
Элда танилган одамларни бадном қилаётганлар ҳақидаги фикримга қўшимча шуки, Сизни, Юлдузни, давлат раҳбарларини тилга олса, мен ҳам ном қозонаман деб ўйлайди. Чорак аср вайсагандан бир ой амалий иш қилган яхши.
Лекин журналистикада танқидий жанрлар ҳам бор. Аввал ўзингга боқиб, кейин ноғора қоқ дейдилар. Доим тортишув, оғзига келганини гапириш одобданми? “Сокин” исимли интернет мухлисига раҳмат, менинг имло ҳатоларимни тилга олибди. Кўзлари хиралашиб қолган (телевизион аппаратлар таъсирида) кекса журналист имло ҳатоларига, албатта йўл қўйиши табиий.
Энг муҳими, берилиб, синчиклаб, “сокин”ни “секин” деб ўқибдилар.
Абдулқосим Мамарасулов, жиззахлик шоирнинг эса фермерлигини писанда қилишибди. Ўша фермер халқ хизматида эканлигини, деҳқонлигини ҳисобга олсак, эл–юртга ҳаммамиздан кўпроқ фойдаси текканлигини тасаввур қилиш мумкин.
Менинг истагим ўзгаришларнинг илиқ эпкинлари ҳаммамизни бирлаштирсин.
Аллоҳ яна барчамизни биргаликда Ўзбекистонимизга, халқимизга ижод ва меҳнат қилиш бахтига мушарраф қилсин.
Раҳбарларимиз дилига меҳр солсин, халқимиз дилига муҳаббат ва бағрикенглик ато этсин.
Биз “нотинч”ларга умид, ишонч, хамжиҳатлик ва ёруғ кунлар ёр бўлсин.
Ассалому алайкум, янги илиқ кун, наврўз, меҳржон!
Ассалому алайкум, Баҳор!
Дадахон Ёқубов,
Ўрта ер денгизи атрофларидан…
АССАЛОМУ АЛАЙКУМ, БАҲОР!
Илиқ ҳаво аста елади,
Қушлар яна қайтиб келади,
Қўшиқларин айтиб келади,
Ассалому алайкум, баҳор!
Ва алайкум ассалом, баҳор!
Бойчечаклар униб чиқади,
Ёруғ олам гуллар тақади,
Қуёш нури танга ёқади,
Ассалому алайкум, баҳор!
Ва алайкум ассалом, баҳор!
Яратганга шукрона сўзлай,
Тақдиримдан бахтимни кўзлай,
Топдим сени бир умр излай,
Ассалому алайкум, баҳор!
Ва алайкум ассалом, баҳор!
Қозонларда қайнар сумалак,
Совчиларим қайтарма малак,
Тўйга шошар еру кўк-фалак,
Ассалому алайкум, баҳор!
Ва алайкум ассалом, баҳор!
Суратда: “Ҳаёт қувончлари ва ташвишлари” телекўрсатуви асосчиси, Ўзбекистон халқ депутати Дадахон Ёқубов мухлисалари билан…
РИЗО
Ким қанча яшайди,
Яратган билар.
Кимнинг тадирига
Нелар битилган.
Умримиз бор балки,
Балки юз йиллар.
Бизнинг ортимиздан
Ажал тикилган.
Балки бир лаҳзами,
Қанчадир бордир.
Рози ризоликка,
Вақт етмас-тайин.
Сени босиб тўпроқ,
Берганман азоб.
Қучоқлаб,бош эгиб
Узрим сўрайин.
Эй гуллар, сизларни
Пайҳон этганман.
Янчиб ўтавердим,
Бермай эътибор.
Эй азиз одамлар
Мени авф этинг.
Берган бўлсам агар
Сизларга озор.
Қўлдан кетган бойлик
Сароб туш экан.
Энг ноёб хис экан,
Меҳру муҳаббат.
Амал ҳам қадри йўқ
Бир юмуш экан.
Ундан қолган излар,
Ғазаб ва нафрат.
Тириклик аслида
Синов дунёда.
Бизлардан нари юр,
Эй маълун низо.
Нияти улуғнинг
Умри зиёда.
Роз этсак ўзгани
Ўзимиз ризо.
Ҳурмат ила Дада Зафар
“Дунё ўзбеклари” учун махсус
3 шарҳ
Dunyouzbeklari.Com сайтининг Telegram даги каналига қўшилинг ва энг сўнгги воқеалар шарҳидан хабардор бўлинг.
1 шарҳ
-
Мусофир says:
Ассалому алайкум Дадахон ака! Сизни оддий, хокисор, содда, оккунгил халк согинган. Куйинг ана у луттибоз – амалпарастларни. Сиз халк учун кадрдон ва бебахосиз! Коядан кейин албатта жарлик келганидек, жарликдан кейин албатта баландлик, ёруглик бошланади. Ишларингизга ривож тилайман!!!
Шарҳ қолдириш
Фақат 500 белгигача рухсат этилади. Мақола ёки хабарларни МАҚОЛА ВА ФОТОСУРАТЛАР ЖЎНАТИШ ёки Биз билан алоқа шакли орқали жўнатинг.
Ассалому алайкум Ҳурматли дўстлар!
Дадахон Ёқубовнинг билдирган фикрларига қўшилган ҳолда яна шуни айтиб ўтмоқчиманки, эски мустабид тузумнинг жабри туфайли чет элларда Ватангадо бўлиб юрган кўплаб Ватанпарварлар юртимизга ва ҳалқимизга ҳар доим яхшилик тилаб, қачон бўлса ҳам шу ватанга ва ҳалқига хизмат қилиш истагида, умидида, орзусида, ҳаёлида яшаб келишди.
Тош отаётганлар эса мансабнинг қули,бир тийиннинг гадоси ва улар учун энг биринчи ўринда ўз манфаати устун турадиган малъун кимсалардир.
Тарихимизда энг қора хотиралар билан қолган умримизни, навқирон йилларимизни еган кимсалар, Ватан ва халқ хоинлари бугунги кунларда хам органларда фаолият юритишмоқда, энди эса кўплари бир юмалаб ҳалқпарвар бўлиб олишади.
ЗАМОН ЎЗГАРАЯПДИ – принципларига асосланишиб.
Ўзбек баҳорининг келгани рост бўлсин. Ҳақиқий Ватанпарварлар юртимизга қайтишлари шарт.
“Дунё Ўзбеклари”ҳақиқат майдони эди ва шундай бўлиб қолади.
Озодлик радиоси ва унинг раҳбари Алишер Сиддиқ ҳақида гапириб ўтириш ҳам керак эмас.
АРЗИМАЙДИ!
Таниқли ўзбек ижодкори Дадахон Ёқубовнинг бу қалб нидоси айнан талантли журналист Исмат Хушевнинг “Дунё ўзбеклари” нашри орқали бутун дунёга ошкор этилишида ҳам яхши бир рамзий маъно бор.
Демак, ҳеч кимга ишонмаган Дадахон – фақат Исмат Хушевга ишонади.
Демак, Исмат Хушев одамларнинг ишончини қозонган журналист.
Озодлик ва ББС одамларнинг ишончини қозонишни Исмат Хушев ва у раҳбарлик қилаётган “Дунё ўзбеклари”дан ўрганишлари керак.
1 шарҳ
Uch haqiqat olovlari… Hurmatim baland…
“Дунё ўзбеклари” учун махсус