Андижон адабий гурунгида Наврўз ва Оналар мадҳи
АНДИЖОН АДАБИЙ ГУРУНГИДА НАВРЎЗ БАЙРАМИ
Андижон адабий гурунгги анжумани бу сафар наврўздан сал илгарироққа тўғри келди. Бу кунни наврўзга бағишаниши келишилмаган бўлса-да ижодкорлар наврўзга аталган шеърлар олиб келишган эди.
Анжуманда қатнашган Сухайлий домла — “Кел Наврўзим” ва “Келар Наврўз” Эркин Охунд — “Ассалом наврўз!”, Икромжон Шукуров — “Нарўзим”, Абдунаби Абдураҳмонов — “Юртим наврўзи” номли шеърлар ўқиган бўлса Ғани Мажид — “8-мат”, Ойтожихон — “Онажонимга”, Ойшабону — “Баҳор келди”, “Бувижонимга” , Мирзамаҳмуд Ботиров — “Аёллар” номли шеърлар ўқиб, давра — ҳам наврўз байрами, ҳам 8-март байрамига аталган ажойиб тадбирга айланиб кетди.
К Е Л А Р Н А В Р Ў З
Кенг оламга гуллар сочиб,
саҳий бўлиб, келар Наврўз,
Тонг саҳарда сабо бўлиб,
қирлар ошиб, елар Наврўз!
Харир либослар эгнида,
келинчакдек нозланади,
Бутун борлиқ — табиатни
гуллар билан белар Наврўз!
Қутлуғ қадам, муборак руҳ
билан келар юртимизга,
Одамларга бахт – саодат
ва омадлар тилар Наврўз!
Она Ватан яшнаб кетди
Гулбаҳорнинг қадамидан,
Еру кўкда сабо бўлиб,
қаҳ-қаҳ отиб, кулар Наврўз!
Бобо деҳқон Наврўзойнинг
йўлларига мунтазирдир,
Мўл ҳосилдан дарак бериб,
таъзим бажо қилар Наврўз!
Қир, далалар, хатто тоғлар
лолалардан сарҳуш ажаб,
Бойчечагу чучмомалар
ҳадя этиб, келар Наврўз!
Ҳар бир йилнинг хислати бор,
ҳар фаслнинг фазилати,
Йилдан – йилга ороланиб,
кўрк – чиройга тўлар Наврўз!
Бу Мустақил юртимизда
Баҳоройнинг ҳурмати зўр,
Кенг далалар, боғлар аро
Қордек гуллар элар Наврўз!
Суҳайлий ҳам ёшлар каби
Наврўз билан фахрланур,
Унинг кўнглини шод айлаб,
узоқ умр тилар Наврўз!
——————
Айниқса Мирзамаҳмуднинг “Болалик” номли шеъри кўпчиликка маъқул бўлди. Бу шеър онани севиш ва улуғлашга бағишлангани учун байрамга бағишланган шеър сифатида қабул қилинди.
БОЛАЛИК
Болалик—подшоҳлик, бегуноҳ дамлар,
Унда узоқ бўлган ташвишу ғамлар,
Онам тиззасига бош қўйган дамлар,
Энг бахтли экан-а, энг бахтли дамлар.
Онам ёпган нонлар саҳар палласи,
Сенга деб пиширган кичик кулчаси,
Юзларимни силаб айтган алласи,
Энг бахтли экан-а, энг бахтли дамлар.
Онам полизларда қовун сўйган дам,
Таъми кетмас асло ёшлик кетса ҳам,
Руҳимда яшайди ҳамиша ҳамдам,
Энг бахтли экан-а, энг бахтли дамлар.
Онамнинг бағрини ҳидлаб ётганим,
Ул зотнинг қалбидан меҳр топганим,
Қувончларга тўлиб бахтга қонганим,
Энг бахтли экан-а, энг бахтли дамлар.
Осмон кенгроқдайин, табиат гўзал,
Ўқигим келарди тинмай шеър ғазал,
Булоқ сувлари ҳам гўёки асал,
Энг бахтли экан-а, энг бахтли дамлар.
Анжуман охирида гурунг раиси шоир Ғани Мажид гурунг қатнашчилари учун ўзининг таклифларини ўртага ташлади. Таклифни овозга қўймай шартнома кўринишида хоҳловчиларнинг имзоси тўпланиб шу имзо чекканлар орасида бу таклифларни амалга ошириладиган бўлди.
Таклифлар гурунгда ижодкорлар учун қизиқарли лекин ҳамма ҳам хоҳламаётган мунтазам равишда жамоа тўпламлар тайёрлаб бориш, “Келажак” газетасида доимий саҳифалар эълон қилиб бориш, Фарид Усмоннинг ҳар анжуманда сўзга чиққанлар ижодига ўз фикрини айтиб туриши, ҳар анжуманда биттадан ижодкорнинг ижодини муҳокама қилиб бориш, ёшларнинг “Нафосат” тўгарагида катталарнинг навбат билан ижод сирлари ҳақида суҳбат олиб бориши масалалари ўртага ташланган эди.
Абдуқодир Нурмухаммад ўғли Саттаров,
рухшунос олим
«Дунё ўзбеклари» учун махсус
Андижондан
МАҚОЛАНИ ДЎСТЛАР БИЛАН БАҲАМЛАШИНГ