Абдулла Орипов: Сен баҳорни соғинмадингми? Икромжон Бўронов куйлайди

---

Абдулла Орипов: Сен баҳорни соғинмадингми?

Абдулла Орипов шеъри 

Уйғонгувчи боғларни кездим,

Топай дедим қирдан изингни.

Ёноғингдан ранг олган дедим –

Лолазорга бурдим юзимни,

Учратмадим аммо ўзингни,

– Сен баҳорни соғинмадингми?

 

Узоқлардан зарворли тоғлар,

Хаёлимни келдилар босиб.

Кечди қанча интизор чоғлар,

Васлинг менга бўлмади насиб,

Сенсиз мен ҳам, баҳор ҳам ғариб,

– Сен баҳорни соғингмадингми?

Унгурларда сакрайди оҳу,

Наъматакда саъва миттижон.

Қорликлардан сипқорилган сув,

Дараларда уради жавлон.

Нигоҳимдан фақат сен пинҳор,

– Сен баҳорни соғинмадингми?

 

Мана, бугун наврўзи олам,

Дўстларимга гуллар тутарман.

Қайлардасан, суюкли эркам…

Қўлимда гул сени кутарман,

Умрим бўйи чорлаб ўтарман:

– Сен баҳорни соғинмадингми?

SEN BAHORNI SOG’INMADINGMU Ikromjon Bo`ronov,Икромжон Бўронов

 Abdulla Oripov. Sen bahorni sog’inmadingmi? — Xurshid Davron kutubxonasi

«Дунё ўзбеклари» учун махсус

МАҚОЛАНИ ДЎСТЛАР БИЛАН БАҲАМЛАШИНГ