Борис Немцов Кремльнинг ёнида ўлдириб кетилганига роппа роса икки йил бўлди!
Бугун Борис Немцов ўлдирилганига 2 йил бўлди
Немцов хотирасига ўтказилган митинглардан бири, Петербург, 26 февраль, 2017 йил.
Бугун Россия мухолифатининг таниқли лидери Борис Немцов ўлдириб куетилганига 2 йил тўлди.
Москвада ва Россиянинг бошқа қатор шаҳарларида якшанба куни минглаб одамлар 2015 йилнинг 27 февраль куни Кремль яқинида ўлдириб кетилган Борис Немцов хотирасига бағишланган маршда иштирок этди.
Хотира маршида иштирок этиш учун Қримдан ҳам қрим-татарлари келишди. Улардан бири 59 ёшли Ибрагим Османов мана буларни айтди:
«Немцов ҳар доим қрим-татар халқини қўллаб-қувватлаб келди. Биз бу ерга унинг хотираси олдидаги қарздорлигимизни узгани келдик, биз доим уни ёдда сақлаймиз. У бизнинг мустақиллигимиз учун курашди. Биз биламиз, у Қрим Россия томонидан босиб олинишига қарши эди”,— деди Османов.
Немцовнинг ўлимида айбланиб чеченистонлик беш одам қўлга олинган эди. Бироқ улар судда ўзларига билдирилган айбловларни инкор этган. Немцов тарафдорлари ҳақиқий қотиллар топилишига ишонмайдилар.
Москвада Россия мухолифати лидери Борис Немцов ўлдириб кетилди
Россия мухолифатининг йирик намоёндаси ва Бош вазирнинг собиқ ўринбосари Борис Немцов Москвада президент Владимир Путин сиёсатига қарши ўтказилиши режалаштирилган норозилик намойишига икки кун қолганида ўлдириб кетилди.
Россия ички ишлар вазирлигининг билдиришича, Борис Немцов Кремлдан унча узоқ бўлмаган Катта Москворецк кўпригида 27 февраль куни тунда номаълум шахслар томонидан отиб ўлдирилган.
Россия президенти Владимир Путин Немцовнинг ўлдирилишини “ваҳший қотиллик”, деб атади ва мухолифатчи буюртма қотиллик қурбони бўлган бўлиши мумкин, деган тахминни билдирди.
Путиннинг матбуот котиби Дмитрий Песков бу масалада Кремль позициясини эълон қилар экан, Немцовнинг ўлдирилишини давлат раҳбари “ваҳший қотиллик”, деб баҳолаганини яна бир бор эслатиб ўтди ҳамда Немцовнинг ўлдирилишини “рус ҳукумати обрўсини тўкиш учун уюштирилган фитна”, деб атади. Песковга кўра, Путин мухолифат лидерининг ўлдирилиши юзасидан қидирув ва тергов ишларини олиб борилишини шахсан ўз назоратига олган.