Турсуной Содиқова вафоти — шогирдлар изтироби… («Ўтганлар ёди» туркумидан)
Турсуной Содиқова деган Нур кетди!
Неча-неча хаста, қоронғу қалбларни нурафшон айлаган, бутун борлиғи билан Одамзотга Эзгулик улашиб яшаган зот, ёқут изларини миллионлаб юракларга муҳрлаб, Ўзининг абадий масканига бориб етди!
Эшитган, англаган Юраклар бир силкиниб, титраб-титраб кетди…
Бу омонат ёлғончида У ЯРАТГАН буюрган вазифасини муносиб бажариб, МАВЛОСИНИНГ ҳузурига ёруғ юз билан етди!
Турсуной Содиқова деган тонгдек мунаввар ном, бахтли-бахтсиз деразалардан, ҳар қандай зулмат пардаларини суриб ташлар эди!
Ўзбек аёлининг тимсоли, Яхшиликнинг қаҳрамони, Замонамиз намунаси, бир умр Сўз сеҳри билан чалажон руҳларни поклаб ўтган, азиз устозим биздан рози бўлинг!
https://www.facebook.com/ozoda.bekmurodova
Бугун раҳматли Турсуной опа Содиқованинг ўз қўллари билан эсдалик учун берган » Мураббий ким?..» китобини такроран ўқиб чиқдим.
Китобга киритилган ҳар бир кичик эсселари тушкун кайфиятимга кўтаринкилик бағишлади.
Охиратингиз обод бўлсин Турсуной опа.
***
Лафз хусусида
Болага ваъда бердингми, албатта бажар. Энг майда ваъда ҳам ваъда! Масалан, «Эртага кўйлагингнинг дазмолланганини кўраман», «Туфлингнинг мойланганини текшираман», деб айтдингми, ижросини унутма. Ижрони бир марта унутсанг, тамом, тарбиянинг жилови қўлингдан кетади! Бола сенга ишонмай қўяди. Энг ёмони сендан ҳафсаласи пир бўлади! Ахир ўша куни кўйлагини астойдил дазмол қилган эди ёки туфлисини қандай ярақлатиб келганини бир кўрсатмоқчи, сендан рағбат сўзларини эшитмоқчи эди! Ундан ҳам ёмони шуки, «Фалончи домладай инсон ҳам ваъдасида турмасди-ку, мен ҳам гоҳида шундай қилсам нима бўлибди» дейди ва феълида бетайинлик бошланади!
Берган ваъдамизни бажаришга имкон бўлмаса, улардан албатта узр сўраш керак. Боладан узр сўраш орият эмас. Катталар ҳам хато қилиши мумкинлигини ва хато қилган одам узр сўраши кераклигини улар ёшликдан билиб борсинлар. Токи улғайганларида «Мен ота-онаман ёки мураббийман, катталар узр сўрамайдилар», дейдиган худбинларга айланиб қолмасинлар.
(«Мураббий ким?..» китобидан)
https://www.facebook.com/ruzibay.azimiy