Исмат Хушев: МХХ раисининг 1-ўринбосари ишдан олинди. Бошлиқ қачон олинади?
«Дунё ўзбеклари»дан:
Ўзбекистоннинг янги Президенти Шавкат Мирзиёев янги ҳукумат таркибини тузаркан, куч ишлатар тизими ва ҳуқуқни ҳимоя қилиш органлари раҳбарларини тайинлашда ўта эҳтиёткорлик қилаётганини олдин ҳам алоҳида таъкидлаган эдик.
Бу жуда ҳам тўғри тактика. Шуни ҳисобга олиб, биз ўтган йилнинг 11 декабридаёқ бу ҳақда: “Рустам Иноятовнинг ҳам қуёши ботган кўринади” номли мақола эълон қилган эдик. 2016 йилнинг 26 декабрида эса бу фикрни ривожлантириб, унинг узвий давоми сифатида: «МХХ раиси Иноятов ва куч ишлатар тизими раҳбарлари чиғириқдан нега ўтолмаяпти? номли иккинчи мақолани ҳам чоп этган эдик.
Янги Президент бу борадаги илк қадамни — Фавқулодда вазиятлар вазири бўлиб ишлаб келган Турсунхон Худойбергановни ўзига Давлат маслаҳатчиси қилиб олишдан бошлади.
Янги йилнинг илк кунларидан бошлаб, Ички Ишлар вазирини ўзгартирди. Тўрт йилнинг нари берисида ўзбек милициясининг куч ишлатар тизимига баҳоли қудрат раҳбарлик қилган генерал Адҳамбек Аҳмадбоев — ҳуқуқни ҳимоя қилувчи органлар фаолиятини назорат қилувчи Давлат Маслаҳатчиси бўлиб Президент аппаратига келди.
Жиззах милициясига 2009 йилдан бўён бошчилик қилиб келаётган генерал Абдусалом Азизов Ўзбекистон Республикаси Ички Ишлар вазири этиб тайинланди.
Президентнинг кадрлар сиёсатига масъул бўлган Давлат маслаҳатчиси Даврон Назармуҳаммедов яна ўз ўрнига қайтарилиб, Ички Ишлар вазирининг биринчи ўринбосари бўлди.
Ва ниҳоят куни кеча — 5 январь куни — МХХ тизимида ҳам дастлабки ўзгариш амалга оширилди. Бу тизимнинг йигирма беш йиллик «Ўтда ёнмас, сувда чўкмас» раиси Рустам Иноятовнинг энг ишонган ва садоқатли шогирди, суюкли ҳамюрти ва табиийки — ўзидан кейинги меросхўри сифатида кўрилга биринчи ўринбосари Шуҳрат Ғуломов ишдан олинган. У ҳозирча тўла тасдиқланмаган хабарга кўра — Сурхондарё вилоят МХХ Бошқармаси бошлиғи этиб Термезга бадарға қилинган.
Бу нимани англатиши мумкин?
Бу — Ўзбекистонда чорак аср давомида қонунсиз ҳукм суриб келган, ўзбек халқини қўрқув ва қуллик, таъқиб ва тазйиқ гирдобига солиб, онги ва шуурини заҳарлаган, фалажлаган, охир оқибат уни зомби ва манқурт ҳолига келтирган — махфий хизмат салтанатининг узоқ йиллар орзиқиб жиддий инқирозидан далолатдир.
Энди навбат бу махфий хизмат раисини ҳам алмаштиришга келди, чамамда.
МХХ раисидан ташқари, Бизнинг олис Канададан туриб қилаётган тахмин ва башоратларимизга кўра, яқин кунларда махфий хизмат идорасига бевосита алоқадор бўлган Ўзбекистон давлат ва ҳукумат тизимидаги қатор мулозимлар ишдан олиниши кутилмоқда.
Буларнинг қаторида Савдо, инвестиция ва Ташқи Иқтисодий алоқалар вазири Элёр Ғаниев, Ўзбекистон Телевидения ва Радиоэшиттириш Давлат Қўмитаси раиси — ЎзТВ Бош директори Алишер Ходжаевлар биринчи навбатда алмаштирилиши лозим бўлган мулозимлар сирасига киради…
Русларда: «Поживем, увидим!» деган бир гап бор…
Исмат Хушев,
«Дунё ўзбеклари» Бош муҳаррири,
6 январь, 2017 йил, Торонто шаҳри, Канада…
Шуҳрат Ғуломов МХХ раисининг 1-ўринбосари лавозимидан бўшатилгани айтилмоқда
Фаррух
Ҳурматли дўстлар!
Бизнинг энг фожеали ва оғриқли нуқтамиз, қора доғимиз бўлган Андижон қонли воқеаларида ЎЗБЕКИСТОН ҚАҲРАМОНИ унвонини олиб ва уни кўксига тақиб юрган инсоннинг кимлигини тасаввур қилиш учун катта ақл шарт эмас.
Инсоннинг кимлигини, Ватанга бўлган чин мухаббатини билиш учун уни Ватанидан жудо қилиш учун бир оғиз сўз кифоя.
Ўз ихтиёри билан бола чақаси ва невара чеварасини ЧЕТ элга олдиндан олиб бориб қўйиш бу ВАТАН хоинининг ишидир.
Бундай инсонлардан яхшилик чиқишини кутиш ғирт аҳмоқликдир.
Каримов ўлимигача МХХ ҳақида сал иккиланишлар бўлган бўлса, бугунги кунга келиб унинг рахбарияти ҳақида тўлиқ ишонч билан ҳалқимиз ва давлатимиз душманлари деб айта оладиган бўлаяпмиз.
Иноятов Ўзбекистон тарихида яхши ном билан қола олмайди.
Хали кўрасизлар бир неча вагон томлаб қалбаки жиноий ишлар кўтарилади. Минглаб ўлдирилган инсонларнинг рухлари уларни албатта тинч қўймагай.
Иноятов кетмаса мустақиллик хам, келажак хам бўлмайди!!!
Худди мана шундай актив журналистик позицияда туриб Ўзбекистондаги матбуот ҳам бу мавзуларни дадил кўтариши керак. Лекин минг афсуски, буни фақат Канададан туриб жасоратли журналист Исмат Хушев кўтаряпти. Кимдир юқорида тўғри ёзган, “Дунё ўзбеклари”нинг бир ўзи юртимиздаги бутун бир матбуотнинг ишини қиляпти деб. Буни кўрмаслик ва билмаслик мумкин эмас. Президент яқинда биз билан учрашар экан деган гап сўзлар юрибди. Учрашса, шу масалани биз биринчи бўлиб кўтарамиз. Ўзбекистон матбуотини тубдан қайта қуриш вақти келди…