Исмат Хушев: Янги ҳукумат таркибида жиддий ўзгаришлар бўлиши кутилмоқда

---

Вазирлар Маҳкамасининг жиддий “реорганизация” бўлиши нимадан далолат?

Рустам Иноятов ва Ботир Парпиевларнинг тақдири нима бўлади?

Қайси вазирликлар тугатилиши мумкин?

Бугун МХХни ким бошқармоқда?

1.

Ўзбекистон ижтимоий сиёсий ҳаётидаги воқеалар шиддат билан яхшилик ва янгилик томон ривожланиб бормоқда.

Шавкат Мирзиёев Президент сифатида қасамёдга келтирилди.

Абдулла Арипов Бош вазир этиб тайинланди.

Сенат раисининг биринчи ўринбосари мансаби таъсис этилиб, бу юқори лавозимга Содиқ Сафоев сайланди.

Биз олис Канададан туриб, бу учала бахтиёр мулозимни янги ва муборак вазифалари билан чин юракдан муборакбод этамиз, уларнинг Ватан ва халқимиз бахт саодати йўлидаги фидокорона ишларига улкан омадлар тилаймиз.

Донишманд шоир Абдулла Орипов ёзганидек:

Омад деганлари дунёда бор гап,

Бу ерда ҳар қандай хурофот бекор.

Иқбол қуёшингиз нур сочса порлаб,

Демак Сиз ҳаётсиз, омад Сизга ёр…

2.

Энди янги ҳукумат таркибида қандай ўзгаришлар бўлиши ҳақидаги янгиликларни ўз манбаларимиздан олган хабарлар  асосида баҳоли қудрат таҳлил қилишга уриниб кўрсак.

Бизни таажжубга солган янгиликлардан бири – Рустам Азимов Бош вазирнинг биринчи ўринбосари лавозимидан ҳам озод этилиши мумкин.

Ва бундан ҳам таажжублиси эса, Бош прокурор Бахтиёр Абдуллаевнинг Бош вазирнинг биринчи ўринбосари бўлиши ҳақидаги хабардир.

Бугунги Бош прокурор бу юксак вазифага муносиб, албатта. Лекин ҳукумат таркибида бу қадар жиддий ва кескин ўзгаришлар бўлишини биз ҳозир эмас, балки сал кейинроқ кутгандик.

Бош прокурорлик лавозимига эса Президент ҳозирча кимни тавсия этиши ноаён. Бирорта (масалан, Фарғона) вилоят прокурори ёки ҳокими бўлиши мумкин деган гаплар ҳам бор. Лекин бу ҳали аниқ эмас.

Бу, демак, бугун қасамёдга келтирилган Ўзбекистоннинг янги Президенти Шавкат Мирзиёев мамлакатда ростдан ҳам жиддий ва том маънодаги инқилобий ўзгаришлар қилишга бел боғлаганидан далолат беради…

3.

Баъзи гап-сўзларга қараганда Ўзбекистон ҳукуматининг “ўтда ёнмас ва сувда чўкмас” вазири Элёр Ғаниев бош бўлган вазирлик тугатилиб ёки “реорганизация” қилиниб, унинг ўрнига янги вазирликлар ташкил этилиши мумкин.

1960 йилнинг 1 январь куни Сирдарёда туғилган Элёр Ғаниев чорак асрдан бўён марҳум президент Ислом Каримовнинг энг суюкли ва ишонган “олтин” кадрларидан бири эди.

Ислом ака Элёр Мажидовични шу қадар яхши кўрардики, уни икки марта Ташқи Ишлар вазири, айни пайтда Бош вазир ўринбосари этиб тайинлаган эди.

Собиқ Президент узоқ йиллардан бўён Ташқи иқтисодий алоқалар вазирлигини бошқарган эркатой вазирига, кейинги йилларда Савдо ва инвестиция вазирлигини ҳам қўшиб берган эди.

Лекин энди Ислом Каримов бу дунёда йўқ.

Ҳозирча Элёр Ғаниевнинг қайси вазифада қолиши ҳам ноаён бўлиб турибди…

4.

Маданият ва Спорт вазирлиги ҳам иккига ажратилиб, уларга мутлақо янги раҳбарлар тайинланиши мумкин.

Бизнинг назаримизда ҳам шундай қилинса, яхши бўларди. Бунинг эса ўзига хос аччиқ ва аламли сабаблари бор.

Кейинги йилларда Маданият вазирлари юз тутаётган фожеали ҳолатлар ҳали ҳануз ёдимиздан ўчгани йўқ. Маданият вазири Анвар Жабборовнинг сирли ва фожеали ўлими тафсилотлари ҳамон юракларни ўртаб келади.

Кейинги йилларда тез тез содир бўлиб келаётган вазирлар алмашинуви ва инқирозига ниҳоят барҳам берилади, соҳада илдиз отган коррупция, таниш билишчилик, маҳаллийчилик каби иллатлар йўқ қилинади деган умиддамиз…

5.

Раҳбарлари ҳануз ҳибсда қолаётган Давлат Матбуот Қўмитаси тизими ҳам қайта кўриб чиқилиши мумкин.

Бизга қолса, умуман, Ўзбекистон Матбуот ва Ахборот вазирлиги ташкил қилиниб, унга республиканинг барча оммавий ахборот воситалари, ЎзТВ, ЎзРадио, ЎзАлар бир вазирликда жамланса, яхши бўларди.

Матбуотнинг жамият ҳаётида, мамлакат ижтимоий сиёсий саҳнасида тутган мавқеи ва ўрнини ҳисобга олиб, бу вазирлик раҳбари айни пайтда Бош вазир ўринбосари ёки биринчи ўринбосари этиб тайинланса – нур устига аъло нур бўлурди.

Бу юксак лавозимга Шавкат Мирзиёев кимни тайинлашини биз бугун билмаймиз.

Лекин адабиёт, матбуот ва журналистика дунёсида обрў эътиборли бўлган таниқли истеъдод соҳиблари Шароф Убайдуллаев, Мамадали Маҳмудов, Аъло Хўжаев, Сафар Остонов, Саъдулла Ҳаким, Нурали Қобул, Сергей Ежков, Анвар Абдувалиев, Шокир Саъдуллаев, Набижон Боқий, Сирожиддин Саййид, Абулқосим Мамарасулов, Чори Латипов, Ҳамроқул Асқар, Норқобил Жалил, Аҳрор Аҳмедов, Қурбон Эшматов, Амирқул Карим  ва Карим Баҳриев каби эл суйган бетакрор истеъдод соҳиблари шу соҳа раҳбарияти сафларидан ўрин олишса, яхши бўларди…

6.

Биз кейинги пайтда “Дунё ўзбеклари”да “Қора бозор”нинг “Қироли” ким?” деб жуда кўп танқид қилиб келган чорак асрлик  Марказий Банк Бошқаруви раиси Файзулла Муллажонов, ниҳоят, истеъфога чиқариладиган кўринади.

Унинг ўрнига Рустам Азимов тайинланиши мумкин деган гаплар бор. Айни пайтда Рустам Содиқович Бош вазирнинг оддий ўринбосари бўлиб қолиши ҳам мумкин.

Ўзбекистон қишлоқ хўжалиги вазири бундан кейин бир пайтнинг ўзида Бош вазир ўринбосари ҳам бўлиши кутилмоқда. Шавкат Мирзиёев бу лавозимга кимни тавсия этиши ҳозирча номаълум. Самарқанд вилоятининг бугунги ҳокими (З.Т.Мирзаев) бўлиши мумкин деган фикрлар ҳам йўқ эмас…

Узоқ йиллар Тошкент горкомининг биринчи секретари бўлиб ишлаган ва камтарлиги билан ном чиқарган Асатилла Ашрапович Хўжаевнинг ўғли Боиир Хўжаев  – Молия вазири бўлиши кутилмоқда.

Куни кеча янги Президент қўлидан Ватаннинг юксак мукофотини олиш бахтига муяссар бўлган Очилбой Раматов жаноблари “Ўзбекистон Темир Йўллари” раҳбарлигини сақлаб қолиш баробарида, айни пайтда Бош вазир ўринбосари рутбасига ҳам чиқиши кутилмоқда…

7.

Рустам Иноятов, Ботир Парпиев ва Адҳамбек Аҳмадбоевлар тақдири ҳозирча номаълум.

Биз ўтган мақолаларимизда уларнинг ишдан кетиши мумкинлигини башорат қилган эдик. Лекин кейинги хабарлар бу воқеалар ниҳоятда мураккаб ва чалкашлигини кўрсатмоқда.

Ҳозирча, Ботир Парпиев вазифасида қолмаса керак деган маълумот мавжуд. Лекин бу қай даража ўз исботини топади, номаълум.

Ўзбекистон раҳбарлигига келган одам ҳаммани бирдан ишдан ололмайди, ўзгартиролмайди, албатта. Кадрлар масаласи жуда нозик ва мураккаб масала. Ўзбекистон ҳукуматидаги ҳар бир мулозим ортида юзлаб, минглаб одамлар – қариндош-уруғлар, ҳамюртлар, гуруҳлар ва кланлар бор.

Шунинг учун ҳам бу масала секин аста, ҳушёрлик ва энг муҳими – ақл-идрок ва донишмандлик билан ҳал этилиши лозим.

Энди олдинги раҳбар давридагидек ҳеч ким ноҳақ ишдан олинмаслиги, кўчага улоқтирилмаслиги, кибр ва кўролмаслик боис ҳибс ва хорижга бадарға қилинмаслиги керак.

Биринчи раҳбар бағри кенг ва кечиримли бўлиши зарур…

8.

Тошкентдан келаётган бу фикр ва мулоҳазалар қай даражада ҳақиқатга яқинлигини эса вақт кўрсатади.

Вақт эса шиддат билан ўтиб бормоқда.

Академик шоир Ғофур Ғулом “ВАҚТ” шеърида ёзганидек:

Азиз асримизнинг азиз онлари,

Азиз одамлардан сўрайди қадрин.

Фурсат ғаниматдир, шоҳ сатрлар-ла,

Безамоқ чоғидир умр дафтарин…

Бугун Ўзбекистонда умр ва юрт дафтарини, Ватан сарҳадларини безайдиган улуғ ва муборак ишлар содир бўлмоқда.

Одамларнинг руҳи тетик, кайфияти аъло. Улар янги Президентга ишонч ва умид кўзларини тикишган.

Мамлакатда ҳозир изғиринли қиш бўлса ҳам, лекин одамларнинг кўнглида баҳор.

Бугун вафот этганига роппа роса қирқ кун бўлган буюк ўзбек шоири Абдулла Орипов ёзганидек:

 

Баҳоринг муборак бўлсин ушбу дам,

Менинг Ўзбекистон – дилбар Ватаним…

 

деб биз ҳам халқимизга олис Канададан туриб яхши ва ёруғ ниятлар тилаб қолсак, не ажаб…

Исмат Хушев,

“Дунё ўзбеклари” Бош муҳаррири,

15 декабрь, 2016 йил,

Торонто шаҳри, Канада

 

МАҚОЛАНИ ДЎСТЛАР БИЛАН БАҲАМЛАШИНГ