Исмат Хушев: Исмоил Дадажонов яхши одам эди…
“Дунё ўзбеклари”дан:
1.
Ўзбек мухолифатининг таниқли аъзоси Исмоилжон Дадажонов вафотини эшитиб, жуда хафа бўлдим.
Биринчидан, у киши Фарғонага қайтишни, ўша ерда умргўзаронлик қилиб юришни, кексалик гаштини Қўқоннинг сўлим чойхоналарида суришни орзу қилардилар.
Иккинчидан, дардларига даво топиб, тамомила соғайиб кетишни, Ўзбекистонга ҳам ҳур фикр ва озодлик насимлари кириб боришини, юртга қайтиб озод ва обод Ватанда узоқ умр кўришни ният қилган эдилар.
Лекин, минг афсуски, энди у кишининг бу ниятлари амалга ошмай қолди…
2.
Исмоил ака камтар ва фидойи, меҳрибон ва меҳмондўст инсон эдилар.
Бундан беш-олти йиллар муқаддам Швецияга борганимда у кишининг уйларида меҳмон бўлганман.
Бизни – Марат Зоҳидов, Васила Иноятова ва Матлуба Азаматоваларни худди Қўқондагидай қилиб фарғонача иззат ҳурмат ва тўкин дастурхон билан кутиб олган эдилар.
У киши мени Президент ҳақидаги хотираларим орқали яхши таниб қолганларини айтиб, китоб ҳақида жуда яхши фикр билдирган эдилар. Хусусан, Президентнинг кадрлар сиёсати бўйича Давлат маслаҳатчиси Мавлон Умрзоқовни яхши танишларини, у киши билан Қўқонда бир неча маротаба учрашганларини илиқ бир хотира билан ёдга олдилар.
Сўнг биргалашиб, у кишининг енгил машиналарида Швециянинг узоқ қишлоқларидан бирида истиқомат қилувчи водийлик биродаримизникига меҳмонга бордик. Исмоилжон акани толиқтираб қўймаслик учун мен рулга ўтирдим. Швеция йўллари ҳам худди Канада давлатининг йўллари каби кенг ва равон, одам сира чарчамайди.
Мезбон бизга атаб қўй сўйган экан. Шўрва пишгунча дилдан суҳбатлашдик. Бир оз шеърхонлик қилдик. Андижон воқеалари ортидан бу томонларга келиб қолган биродаримиз давлатдан каттагина ер олиб, ўз режаси ва чизмаси билан архитекторлик қилиб, данғиллама уй қурган экан.
Кўриб ҳавас қилдик…
