ББС: Мухлисларимга раҳмат — Озодлик: Руфат Рисқиев комага тушди…
Боксчи Руфат Рисқиев.
“Тошкент йўлбарси” лақаби билан танилган ўзбекистонлик боксчи Руфат Рисқиев куни кеча оғир аҳволда касалхонага олиб кетилган. Мияга қон қуйилиши ташхиси қўйилган собиқ боксчи, Фарғона.ру агентлиги хабарига кўра, ҳозирда ҳукумат стационарининг жонлантириш бўлимида ётибди.
Шу йилнинг 18 сентябрида бир оёғи қорасон туфайли кесиб ташланган Рисқиев бир ойдан кўпроқ давом этган муолажадан сўнг уйига қайтганди.
Айтилишича, бир неча кун муқаддам оғайнилари томонидан тўйга олиб кетилган собиқ боксчи қайтишда ота уйига кириб ўтмоқчи бўлган ва ўша ерда икки кун қолиб кетган. Шифокорлар ёрдамидан мосуво бўлган Рисқиев ўша ерда ҳушини йўқотган.
67 ёшли Руфат Рисқиев 1974 йили жаҳон чемпиони унвонига сазовор бўлганди. Ўз фаолияти давомида у 189 марта жанг ўтказган ва улардан 174 тасида ғалаба қозонган.
ОЗОДЛИК
Руфат Рисқиев: ‘Мухлисларимга катта раҳмат’ — BBC O’zbek
Куни-кеча оёғида жарроҳлик амалиётини ўтказган ўзбекистонлик донгдор боксчининг касалхонадан Би-би-си Ўзбек Хизмати билан суҳбатида айтишича, ҳозир аҳволи анча яхши ва оғриқлари ҳам деярли босилган. Ўзбекистондан душанба куни олинган хабарлардан қорасон бошлангани сабаб, шифокорлар Руфат Рисқиевнинг бир оёғини тиззасидан пастини кесиб ташлашга мажбур бўлишгани аён бўлганди. Маълум бўлишича, ҳаваскор боксда ўз вазн тоифасида собиқ жаҳон чемпиони, Ёзги Олимпиада Ўйинларининг илк совриндори бўлган ўзбекистонлик бу боксчи жарроҳлик амалиётини пойтахт Тошкентдаги 16-касалхонада ўтказган. “Саломатлигимга билдирган қизиқишлари учун, авваламбор, мухлисларимга катта раҳмат. Мана шу жарроҳлик амалиётидан кейин уч-тўрт кун ҳаммаёғим жудаям ёмон оғриди-да…Ўрнимдан туролмасдан ётдим. Мана, ҳозир икки-уч кундан буён яхши ухлаяпман. Оғриқ ҳам оз. Шифокорларга ҳам раҳмат, қўлларидан келган ҳамма ишни қилишаяпти. Ҳозир оғриқ йўқ ҳисоби”, — дейди Руфат ака Рисқиев. У кишининг айтишича, жарроҳлик амалиёти ҳам яхши ўтган. “Шифокорларга катта раҳмат. Улар бўлишмаса, мен нима қилардим”, — дейди суҳбатдошимиз. Руфат ака Рисқиевнинг айтишича, ўзининг касалхонада экани, жарроҳлик амалиётини ўтказганига оид хабарни эшитган кимки бор, ҳозир йўқлаб, яхши тилаклар билдириб кетишаяпти. Би-би-си Ўзбек хизматининг видеоларини www.bbcuzbek.com да ҳам кўришингиз мумкин.