Мирзиёев виртуал қабулхонасига: Судларда ижро аҳволи ёмонлиги ҳақида

---

“Дунё ўзбеклари”дан:

Ўзбекистон муваққат Президенти Шавкат Мирзиёев виртуал қабулхонаси фаолиятига хайрихоҳлигимиз ва қизғин қўллаб қувватловимиз сабаб бўлса керак, бизга ҳам ўзбекистонликларнинг дарду изтироблари баён этилган арзнома-ю, хат, хабарлар оқиб келмоқда.

Чунки, мамлакат раҳбарига мурожаат қилаётган ҳар бир фуқаронинг арзи тингланиб, адолат мезонида кўриб чиқилаётгани одамлар қалбида яхши ва ёруғ кунларга умид уйғотмоқда.

Аслида, виртуал қабулхона ташкил этилишининг ҳам асл мақсади ҳам шу –  мамлакатда узоқ йиллардан бўён ҳал этилмай, тўпланиб қолган муаммолар ечимини топишга, одамлар қалбида давлат ва ҳукуматга, адолат ва диёнатга нисбатан ишонч уйғотишга қаратилган.

Зотан, Бош вазир қабулхонасида халқ билан очиқ мулоқот ўрнатилганининг асл мақсади ҳам шу.

Халқимизда “Қизим сенга айтаман, келиним сен эшит” деган ҳикматли бир гап бор. Шу  сабабдан бизга келаётган хат хабар ва саволлар ҳам виртуал қабулхона томонидан эътиборсиз қолмайди.

Савол қайси тарафдан келишидан қатьий назар – олис Канадада нашр этилаётган “Дунё ўзбеклари” халқаро нашридан борадими ёки Ўзбекистон ичкарисиданми, бундан қатьий назар, у албатта виртуал қабулхона масъул ходимларининг диққат марказида бўлади.

Нашримизда бугундан бошлаб бериб бориладиган арзнома-ю, дилномаларни вертуал қабулхона масъул ходимлари  эътиборга оладилар ва тегишли чора тадбирлар кўрадилар деб умид қиламиз.

Исмат Хушев,

“Дунё ўзбеклари” Бош муҳаррири,

Торонто шаҳри, Канада

17 октябрь, 2016 йил.

21 асрга келиб Ўзбекистонда ижро масаласи

Амир Темур давридан ҳам паст даражада.

 

Ўзбекистон Республикаси муваққат Президенти,

Бош вазир Ш.М.Мирзиёев,

“Дунё ўзбеклари” халқаро интернет нашри Бош муҳаррири Исмат Хушев

ва барча Оммавий Ахборот воситаларига

 

Хоразм вилояти, Урганч шаҳри, Қизилқум кўчаси,

77-уйда яшовчи, Сайёра Самандарова томонидан

 

 

Н А З О Р А Т   Т А Р Т И Б И Д А  О Ч И Қ  

М У Р О Ж А А Т

 

Ўзбекистон Республикаси Конституциясининг 43, 44,114 – моддалари талаблари тартибида.

 

Марҳум Президент Ислом Каримов ҳам судьялар, прокурорларни жуда кўп танқид қилган, қонунчилик ижросини таъминлаш борасида юзлаб фармонлар имзолаган эдилар. Лекин, кўриб турибсизки, суд ва ижро маҳкамаларидан дод деганларнинг сафи кўпайса кўпайди, лекин камайгани йўқ. Ҳар ҳолда Сизнинг бу тизим халққа хизмат қилмаётгани тўғрисидаги танқидларингиз кўпчилик қатори менда ҳам умид уйғотди.

 

Менга нисбатан содир этилган Чирсиқ туманлараро фуқоролик суди 25.06.2013 йилда: – жавобгар Умиров Рустам Мусурмонович, Нормуродов Улуғбек Ғаффорович, Юлдашов Ҳасан Собировичлардан Сайёра Самандарова фойдасига 14.773 200 сўм моддий, 15.000 000 сўм маънавий зарар солидар тартибда ундирилсин., дейилган ҳал қилув қарори чиқарган эди.

 

Алдов йўли билан менинг мулкимни талон – тарож қилган бу фирибгарларнинг асосий яшаш жойи бўлган Сурхандарё, Хоразм, Қашқадарё вилоятларига суднинг ижро варақаси юборилсада, мазкур вилоятларнинг суд ижрочилари жавобгарлар билан ўзаро тил бириктириб, турли баҳоналар билан ижрони таъминламасдан келмоқдалар.  Хоразмдан 1000 километр йўл босиб, 2013 йилдан буён Тошкентга, Чирчиқга қатнайвериб қанча пулим кетди, соғлиғимдан айрилдим. Турмуш ўртоғи бу сарсонгарчилик, асаббузарликдан саратон касалига учраб айни кунларда ўта оғир аҳволда қолганмиз.

 

Менинг ушбу вилоят прокурорлари, Адлия вазири, Бош прокурорга ёзган шикоятларим охири яна шуларнинг ўзларига юборилади, улар яна эски гапни такрорлайдилар. Бош прокуратура бошқармаси бошлиғи М.Мирсолиҳов, Адлия вазирлиги суд қарорларини ижро этиш Бошқармаси бошлиғи У.Б.Холмирзаев, ўрибосари Ш.Ш.Қудратов, департамент директори ўринбосари Т.Н.Орзиев шу департаментнинг Хоразм вилоят ҳудудий бошқармаси бошлиғи М.С.Қаландаров, Тошкент вилоят ҳудудий бошқармаси бошлиғи ўринбосари  А.Ю.Абдуллаев, Суд ижрочилари Шеробод туман бўлими бошлиғи Ғ.Бердиев, Шеробод туман прокурори А.с.тўраев, Юқори Чирчиқ туман прокурори А.Ш.Каримов., хуллас уч вилоятдаги ишга тегишли барча мансабдорларнинг ҳар биридан 4, 5 тадан жавоб хатлари олдим. Лекин, ҳеч қандай натижа йўқ! Юқори Чирчиқ туман ижро департаменти бўлим болиғи Е.Е.Цой деган кимса мен боришим билан жавобгар Рустам Ўмировни қочириб юборади. Қолганлари ҳам бундан баттар!

 

Фирибгарлар сардори Ҳасан Юлдашев қурилиш фирмаси орқали қанча иш қилиб катта пул топсада ижрочилар билан келишиб, қўлингдан ҳеч нарса келмайди деб мақтаниб юрипти. Қолганлари ҳам ўзига тўқ, мол – мулки етарли лекин ижрочилар суст, тўғрироғи таъмагир.

 

Амир Темур ҳазратлари бирор фуқоронинг моли йўқолса, ўша жойнинг элликбошисидан молнинг пулини ундири жабрланувчига берар эканларда, эллик бошига: – сен ўғрини тутиб, пулни ўшандан ол., дер эканлар. Кўриб турибсиз, 21 асрга келиб Ўзбекистонда ижро масаласи Амир Темур давридан ҳам паст даражада.

Муҳтарам Шавкат Миромонович!

 

Юқорида баён этилган важларни Конституцион талаблар асосида холис ўрганган ҳолда Сиздан:

 

1. ФИБ Чирчиқ туманларао судининг 25.06.2013 йилдаги ҳал қилув қарори ижроси таъминланиб, жавобгарлардан 29.773 200 сўм моддий ва маънавий зарар ундирилишда амалий ёрдам беришингизни;

 

2. Ўзбекистон Республикаси Конституциясининг 114-моддасига хилоф тарзда қонуний кучга кирган суд қарори ижросини асоссиз баҳоналар билан таъминлашдан бўйин товлаб мени 3 йилдан буён сарсон қилганҳар уч вилоят суд ижрочиларига нисбатан қонуний чора кўришни сўрайман!

 

Бўлажак Президентлик сайловида Сизга

улкан зафарлар тилаб, камоли эҳтиром ила –

Сайёра Самандарова

24.10.2016 йил.

+998937503515

Илова:

• Бош покурор қабулхонасига 11.05.2015 йилда топширилган шикоят, Адлия вазирлиги жавоби ва менга келган хатлар тасвирлари. Жами 7 варақ файлда:

 

 

  

Менга юборилган жавоб хатларидан намуналар…

“Дунё ўзбеклари” учун махсус Ўзбекистондан

МАҚОЛАНИ ДЎСТЛАР БИЛАН БАҲАМЛАШИНГ