АҚШЛИК ТРЕНЕРЛАРГА: ЭРКАК БЎЛИБ, МАҒЛУБЛИКНИ ТАН ОЛИНГ!
Фазлиддин Ғойибназаров Рио-2016 Олимпиадаси чорак финалида савалаган АҚШлик Гэри Расселлнинг тренери Билли Уолшнинг мағлубиятдан сўнг қилган баёнотини қаранг: “Ўзбекистон жамоаси олимпиадада энг яхши натижага эришади, чунки бошқаси уларни енгса ҳам ғалабани унга беришмайди”(!)
Исмини айтмаган бир олимпиада чемпиони боксчи (!) эса дарров қилиниши керак бўлган ислоҳотни ҳам айтиб ўтди. Бу чемпион-Икснинг фикрича, Халқаро бокс ассоциацияси президентини ва бутун бошқарув аъзоларини ишдан олиб ташланса, ҳакамлик муаммоси ечим топармиш…
Ишонгинг келмайди, Ўзбекистон боксчилари Риода рингда қаршисига чиққан исталган рақибни нокаут билан, ҳеч бўлмаганда мутлақ устунлик билан енгиб келаётганини дунё кўриб турган бир пайтда, рингга қулаган рақиблар ҳам оёққа туриб, ҳамюртларимизни қутлаётган мусобақада бундай бемаъниликнинг кун тартибига айлантиришга уринилаётганига.
Бокс – эркак одамнинг спорти! Тўғри, аёллар бокси ҳам пайдо бўлди, лекин Расселл қатнашган мусобақа эркаклар ўртасида боряпти. Шундай экан, мағлубиятни эркакча тан олишни ўргатиш керак экан бу АҚШликларга.
Яқинда Дональд Трамп Ўзбекистонни “террорчи давлат” деб атагани, ортидан эса “бу давлат ўзи қаерда жойлашган?” деб сўрагани ҳақида ёзгандим. Ўша кунлари Ҳасанбой Дўсматов ярим финалда америкаликларнинг энг ишонган боксчиси, олимпиада олтин медали умиди – Нико Фернандезни рингда пийпалаб ташлади. Мана, Ғойибназаров ҳам Расселлни шундай эзғиладики, америкалик бокс ишқибозлари буларни Трампнинг аҳмоқона гапларига жавоб сифатида қабул қилсинлар!
Америкаликлар спортни сиёсатга қўшиб юборишганига кўп бўлди. АҚШнинг спорти манфаати учун кимнидир муайян спорт тури бўйича халқаро федерация раҳбарлигидан турли уйдирма айбловлар билан четлатиш, қайсидир мамлакат спортчиларини мусобақада қатнашиш ҳуқуқидан маҳрум қилиш кабилар одат тусига кирди. Лекин ҳар доим ҳам кўзлаган мақсадларига эриша олмаяптилар. Уларни ғолиб бўлиши “шартлиги”ни қабул қилмайдиганлар чиқиб қоляпти.
Эй, Билли Уолш, эй унга ўхшаганлар! Шуни билингки, Ўзбекистон – алп эркаклар юрти! Бокс эса, – бирма-бир курашда ким кучли эканини яққол кўрсатадиган спорт тури.
Шундай экан, Халқаро боксга ким мутасадди бўлади, ҳакамликни ким олиб боради, фарқи йўқ, Ўзбекистон Ҳасанбойлари, Фазлиддинлари, Шаҳобиддинлари ва бошқа ринг арслонлари сизнинг Расселлларни, Эрнандезларни, Варгасларни ва бошқа енгилганини тан ололмайдиган жўжахўрозларни енгаверади!
Мағлубликни тан олишга ўрганинг, ёки шогирдингизни аёллар бокси мусобақасида иштирок эттиринг!