Академик Иброҳимжон Искандаров таваллуд куни муносабати билан (3-мақола)
ЖОНДАН АЗИЗ ПАДАРИ БУЗРУКВОРИМ!
Мўътабар 80 ёшни қаршилар экансиз, ушбу сана билан Сиз азиз инсонни муборакбод этишга ҳамда ушбу муносабат билан қалбимдан кечган баъзи ҳиссиётларимни баён этишга ижозат бергайсиз.
Ушбу мўйсафид ёш, қолаверса умр, бир қарашда жадаллик билан жудаям тез ўтиб кетган кўринади, аслида эса Отажон, бу ёшга етгунингизча не-не заҳматларни бошингиздан кечирмадингиз, не-не курашларда миллат учун, ор-номусингиз, ғурурингиз учун “жанг” қилмадингиз.
Гўдаклигингизданоқ Иккинчи жахон уруши туфайли колхознинг тегирмонига мутасадди бўлдингиз, очлик балосию, қаҳатчилик изтиробини, совуқ захринию, юпунлик ғамини бошингиздан ўтказдингиз. Кейинчалик, 3 синфни зеҳнингиз ўткирлигидан, 1 йилдаёқ тугатдингиз, кейин Тошкентда олий маълумот олдингиз, сўнгра Бухоро сафарига отландингиз, кейин Москва аспирантураси, номзодлик, докторлик диссертацияларини ёқладингиз; ўзингизнинг айтишингизча, бу даражаларга етиш учун 18 йил турли ётоқларда яшаган экансиз, биргина костюм-шимни ётоқдошларингиз билан навбатма-навбат кийган экансизлар…
Алал-оқибат эса илм-фан соҳасидаги энг буюк унвон — академиклик даражасига кўтарилдингиз. Бу оғир, айни пайтда шарафли йўлни босиб ўтиш Сизга осон бўлмади: йўлингизда миллатимизга қарши турли ёт унсурлар – “десантчилар”, гоҳ шу миллатдан чиққан, аммо унинг манфаатини Москвага ёқиш учун атайлаб оёқ ости қиладиган миллат хоинлари, гоҳ эса ўзингиз уларга устозлик қилган, кейинчалик давлат юқори лавзимига кўтарилиб, кибрга берилиб, чил-парчин бўлган шахслар бот-бот чиқиб турди.
Аммо Отажон, Сиз фидойи инсон эдингиз, бутун хаётингиз мазмунини оддий ўзбек халқига хизмат этиш ташкил этди. Барча хаётингиздаги қийинчиликларни, ғам-андуҳларни, хиёнатларни Тангрим Сизга ато этган билим, ватанпарварлигингиз, тажрибангиз, сабр-тоқатингиз билан енгиб ўтдингиз.
Барча ишларингиз шу миллат манфаати учун қаратилди, ҳатто ўз тақдирингизни хавф остига қўйиб, миллат манфаати, айниқса унинг юраги – ўзбек деҳқонлар синфини ёнини олдингиз, Москвадаги олий даражадаги мажлисда баралла — руслар ўзбек дехқонини лақиллатаётганини, унинг хақини тўла бермаётганини исбот этиб бердингиз ва шу миллат манфаати учун айтган хақ сўзингиз билан умрбод тарихда қолдингиз!
Ўз илмий-публицистик асарларингизда ҳам фақат миллат манфаатини ҳимоялаб чиқдингиз. Умрингиз давомида кўп инсонларга ёрдамлар бердингиз, Сизнинг хизматингиздан оддий деҳқону-ишчи, талабаю-олим, ёзувчию-мухандис, давлат хизматчисию-қози, ҳатто генерал-қўмондонлар ҳам баҳраманд бўлишди. Оддий инсонга турли жабҳада ёрдам беришдек эзгу амалингизни ҳозирга довур амалга ошириб келмоқдасиз.
Сизнинг тажрибаларингизни ҳозирда прогрессив давлатлар рахбарлари, жумладан, социалист, пролетарсевар, машҳур президент ва қўмондон Уго Чавес жаноби олийлари хам хаётга тадбиқ этмоқда. Ҳаттоки, иқтисодий ва сиёсий тузумига сиз ашаддий рақиб бўлган, капитализмнинг онаси – АҚШдаги дунёдаги турли инсонлар хаётини, ишларини таҳлил этувчи институт ҳам Сизнинг ишларингизни олдида бош эгиб, уларнинг тўғрилигини тан олиб, Сизнинг муборак номингизни “ХХ асрнинг энг буюк шахслари” қаторига қўшди, шу далилнинг ўзиёқ Сиз бекорга яшамаганингиздан далолатдир.
Яратганга кўп-кўплаб шукроналарким Отажон, мен Сиздек олийжаноб бир инсоннинг фарзандиман. Биз фарзандларга ҳам бор-билимингизни, қалбингиз қўрини бериб, ҳалол тарбиялаб вояга етказдингиз. Менга нафақат оталик меҳрини, балки устозлик ўгитларини ҳам бердингиз. Сиздан кўп билимларни: диний, иқтисодий, сиёсий, тарихий, фалсафий, инсонлар ўртасидаги муносабат, психология ва айниқса, ҳеч қаерда ўқитилмайдиган билимларнинг буюги — оддий инсонларнинг, миллатнинг, Ватаннинг корига яраш билимини олдим ва улар менга умрбод дастуриламал бўлиб қолади.
Шу муборак ёшингиз, Сизга қутлуғ бўлсин, азиз Отажоним! Умрингиз узоқ, саломатлигингиз мустаҳкам бўлсин! Миллатимнинг, Ватанимнинг, фарзандларингизни, набираю-абираларингизни тўла – тўкис бахтини яна узоқ вақтлар кўриб юриш Сизга насиб этсин!
Чексиз миннатдорчилик билан,
оилам номидан — ўғлингиз Истеъдод.
8.V.2012 й.
Суратда: Академик Иброхимжон Искандаров ва ёзувчи Шукрилло (ўртада) юртимизга тинчлик ва омонлик тилаб дуога қўл очиб турган пайт…