Бердиёр Жумаев: Аббосовнинг Говорухиндан нимаси кам…
Ассалому алайкум, Исматбек!
Соғ-омонмисиз? Ижодий жамоангиздаги дўстларимиз ҳам сиҳат-саломатмилар?
Бугун эрталаб интернетда ғалати янгиликни ўқиб қолдим, унга кўра, Россия президенти Владимир Путиннинг ўзи атоқли рус кинорежиссёри Станислав Говорухиннинг хонадонига бориб, уни 80 йиллик юбилейи билан шахсан табриклабди.
Ўша хабар билан танишгач, 2016 йил бошида ўзимизнинг буюк киносанъаткоримиз Шуҳрат Аббосов таваллудининг 85 йиллик юбилейини Ўзбекистонда нишонлаш нариги ёқда турсин, мазкур воқеага умуман ва мутлақо муносабат ҳам билдирилмаганлиги ёдимга тушди.
Айни икки хил манзара тўғрисидаги қисқача мулоҳазамни ёзиб, сизларга тавсия тариқасида юбораяпман. Илтимос, у билан танишиб чиқиб, лозим топсаларингиз фойдаланасизлар, деган умиддаман.
Сизларга ҳаётий, фаолиятий ҳамда ижодий муваффақиятлар тилаб, эҳтиром билан:
Бердиёр ЖУМАЕВ.
Бердиёр ЖУМАЕВ
Аббосовнинг Говорухиндан қаери ё нимаси кам?!
Ушмундоқ таққос нечун зарур бўлиб қолди, дейишингиз мумкин. 30 март куни эрталаб интернетда янгиликлар билан танишаётиб: “Путин Говорухинни юбилейи билан шахсан табриклади” сарлавҳали хабарга кўзим тушиб қолди. Унда таъкидланиши-ча, Россия президенти Владимир Путин маълум ва машҳур рус кинорежиссёри Станислав Говорухинни, унинг уйига ташриф буюрган ҳолда, 80 йиллик юбилейи билан юзма-юз муборакбод этибди ҳамда туғилган куни билан қутлабди.
Очиғи, Путинни ғирром сиёсий ўйинлари-ю бошқа фитнакорликлари учун оддий бир шахс сифатида мен ҳам жуда ёмон кўраман. Лекин мамлакатнинг ҳамда миллатнинг ана шунақанги эъзозли ва эҳтиромли инсонларига кўрсатаётган унинг эътиборини тан олмаслик ёхуд эътироф этмаслигам инсофдан эмас-да.
Мана шу ахборотни ўқигач, беихтиёр, хаёлимга ўзбекнинг жаҳонга маълум ва машҳур киносанъаткори Шуҳрат Аббосовнинг 2016 йил январида 85 ёшга тўлгани ва мазкур юбилей Ўзбекистонда эмас, балки Москвада тантанали нишонланганлиги ёдимга тушди.
Ўзбек халқининг бутун дунёга таниқли ва атоқли кино устасининг ўз Ватанида эса, мазкур улкан ҳамда табаррук муносабат билан, ҳатто, Шуҳрат Аббосовнинг номиям тилга олинмади.
Шуҳрат Аббосовнинг улуғлиги-ю буюклиги Станислав Говорухинникидан ортиқ бўлса ортиқдир-ки, зинҳор кам эмасди-ку! Россияда Говорухинга ўхшаган кино санъати арбоблари анча-мунча бўлишса-да, аммо Шуҳрат Аббосов эса, кино ижодкорлиги соҳасидаги улкан иқтидори ҳамда бетакрор салоҳияти билан Ўзбекистонимизда якка-ю ягона-ку… Говорухин Россия Федерацияси халқ артисти бўлса, Аббосов
эса, ҳам СССР халқ артисти, ҳам Ўзбекистон Республикаси халқ артистидир!
Станислав Говорухиннинг “Робинзон Крузонинг ҳаёти ҳамда ғаройиб саргузаштлари”, “Учрашув жойини ўзгартириш мумкин эмас”, “Ўнта негр боласи”, “Ворошиловча мерган” сингари фильмлари машҳур бўлса, Шуҳрат Аббосовнинг “Маҳаллада дув-дув гап”, “Сен етим эмассан”, “Тошкент – нон шаҳри”, “Оловли йўллар” каби киноасарлариям шон-шуҳрат қозониш бобида улардан зинҳор орқада эмас.
Говорухин туғилган куннинг 80 йиллиги санаси Россиядан ўзга бирор мамлакатда нишонланадими ёхуд йўқми – ҳали аниқ эмас. Бироқ, юқорида таъкидлаганимиздек, Шуҳрат Аббосов таваллудининг 85 йиллиги юбилейи айнан Россиянинг пойтахтида катта тантана қилинди.
Ўзбекистонда-чи: мана шунақа кинорежиссёримиз бор эди, у фалон ёшга кирибди, дея йўқлаб ёинки эслаб ҳам қўйилмади.
Шундай экан, нечун Станислав Говорухин давлат раҳбари даражасида муборакбод этилади-ю Шуҳрат Аббосов номи эса, ҳеч жойда тилгаям олинмайди.
***
Хўш, Шуҳрат Аббосовнинг Станислав Говорухиндан қаери ёхуд нимаси кам?!
«Дунё ўзбеклари» учун махсус
МАҚОЛАНИ ДЎСТЛАР БИЛАН БАҲАМЛАШИНГ
Хурматли Бердиёр ака! Миллатимиз ва ҳалқимизнинг оғриқ нуқтасига эътибор берганлигингиз албатта улкан олқишларга муносиб.
Аммо лекин саволни хам жуда ўлдириб қўйибсиз «ҚИЗИМ СЕНГА АЙТАМАН, КЕЛИНИМ ЭШИТСИН» қабилида қилиб!
ШУҲРАТ АББОСОВНИНГ СТАНИСЛАВ ГОВОРУХИНДАН ҲЕЧ ҚАНДАЙ КАМЧИЛИК ЖОЙИ ЙЎҚ. АКСИНЧА БЕШ ОЛТИ ЁШ УЛУҒЛИГИ БОР.
АСЛИДА ГАП «УН» ДА ЭМАС, БУҒДОЙДА!!!
ОТА-БОБОМИЗДАН ҚОЛГАН БИР ҲИКМАТ БОР. ҚОЗОНИДА БЎЛСА, ЧЎМИЧИГА ЧИҚАДИ ДЕГАН. БУҒДОЙИ ПУЧЛАР ПРЕЗИДЕНТНИ ОГОҲ ЭТИШМАЙДИ ШЕКИЛЛИ. У КИШИ БЕҲАБАР!!!