"Дунё ўзбеклари" сайтини энди телефонда, планшетда ва комьютерда ихчам мобиль версияда кўришингиз мумкин:

“ОЗОДЛИК” ва “ЭЗГУЛИК” Чўян Маматқуловнинг “Жаслиқ”даги оғир ҳаёти ҳақида

Ватандан хабарлар, Инсон ва қонун, Ўзбекистон | 03/29/2016 03:03- 10087 марта ўқилди

Ўзбекистон / Инсон ҳуқуқлари

Жаслиқдаги фаолнинг 10 яшар қизи президентга хат ёзди

28.03.2016

Жаслиқ қамоқхонасида сақланаётган Ўзбекистон инсон ҳуқуқлари жамияти фаоли, 46 яшар Чўян Маматқуловнинг 10 яшар қизи Сурайё президент Ислом Каримовга хат ёзиб, отасининг айбсизлиги, унинг туҳмат қурбони бўлганини айтди.

Президент Ислом Каримов номига 10 яшар қизалоқ томонидан ёзилган хат баробарида ҳуқуқ фаолининг рафиқаси Дилором Маманова жамоатчиликка мурожаат қилиб, Жаслиқ лагерида қолаётган турмуш ўртоғининг аҳволи оғирлигини таъкидлайди:

“Ўтган йилнинг ёзида Қорақалпоғистондаги Жаслиқ лагерига ўтказилган эрим аллақачон дермотологик касаллик билан хасталанган. Уни тери замбурғли қичима безовта қилмоқда. Сўнгги марта шу йилнинг февралида мулоқотда бўлдик ва у киши ўзи билан бир камерага СПИДга чалинган маҳкумнинг қўшиб қўйилганини айтдилар. Бу эса ҳар қандай инфекцияни қабул қилишга тайёр қичимага чалинган бемор учун муқаррар ўлим деганидир. Қанча ёзмайлик ҳеч ким додимизга қулоқ солмаяпти. Яқинда 10 ва 11 яшар қизларим президентга хат ёзди, аммо жавоб йўқ”, дейди Дилором Маманова.

Чўян Маматқулов иши билан шуғулланаётган “Эзгулик” жамиятининг таъкидича, маҳкумни дарҳол Бекободдаги ҳуқуқни муҳофаза қилиш органларининг собиқ ходимлари саланадиган муассасага ўтказиш лозим. “Эзгулик” Ўзбекистон Қуролли Кучларининг собиқ сержанти ҳисобланган Маматқуловнинг Жаслиқ қамоқхонасида қолиши мумкин эмас, деб ҳисоблайди.

2005 йилда Маматқулов Ўзбекистон Қуролли Кучларининг Олий Бош қўмондони Ислом Каримовга қарши фуқаролик ишлари бўйича Тошкент шаҳар Мирзо Улуғбек тумани судига даъво аризаси билан мурожаат этган ва Ўзбекистон Қуролли кучларининг Интизом низомини ўзгартиришни талаб қилган. Суд даъво аризасини қаноатлантирмаган.

Маматқулов 2013 йилнинг 8 февралида жиноят ишлари бўйича Қашқадарё вилоят суди томонидан Жиноят кодексининг саккизта моддаси бўйича айбланиб, 10 йилга озодликдан маҳрум қилинган.

У Жиноят кодексининг 137-моддаси (Одам ўғирлаш), 138-моддаси (Зўрлик ишлатиб ғайриқонуний равишда озодликдан маҳрум қилиш), 159-моддаси (Ўзбекистон Республикаси конституциявий тузумига тажовуз қилиш), 168-моддаси (Фирибгарлик), 205-моддаси (Мансаб ваколатини суиистеъмол қилиш), 228-моддаси (Ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш), 238-моддаси (Ёлғон гувоҳлик бериш) ва 244-моддаси 1-қисми (Жамоат хавфсизлиги ва жамоат тартибига таҳдид соладиган материалларни тайёрлаш ёки тарқатиш)да айбдор деб топилган.

ОЗОДЛИК

Today at 2:35 PM

Пресс-релиз №06, 27.03.2016 йил

ҲУҚУҚ ҲИМОЯЧИСИ ЧЎЯН МАМАТҚУЛОВНИНГ ҲАЁТИ ХАВФ ОСТИДА!

Ўзбекистон инсон ҳуқуқлари “Эзгулик” жамиятига мурожаат қилган Қашқадарё вилояти Косон тумани Оброн қишлоғида яшовчи фуқаро Дилором Мамановага кўра, унинг эри Ўзбекистон инсон ҳуқуқлари жамияти фаоли Чўян Маматқуловнинг ҳаёти хавф остида. Ўзбекистон Ички ишлар вазирлиги ЖИЭББнинг Қорақалпоғистондаги 64/71-сонли Жаслиқ қамоқхонасида сақланаётган 46 яшар Чўян Маматқуловга орттирилган иммунитет танқислиги синдроми (ОИТС) юқтирилиши мумкин.

Гап шундаки, ўтган йилнинг ёзида Навоийдаги 29-сонли колонияда Қорақалпоғистондаги Жаслиқ лагерига ўтказилган ҳуқуқ ҳимоячиси дермотологик касаллик билан хасталанган. Ҳуқуқ фаолини тери замбурғли қичима безовта қилмоқда. Икки кишилик камерада жазо муддатини ўтаётган Маматқуловнинг шериги СПИДга чалинган, бу эса ҳар қандай инфекцияни қабул қилишга тайёр қичимага чалинган ҳуқуқ фаоли учун муқаррар хавф деганидир.

Фуқаро Дилором Маманова тақдим қилган ҳужжатлардан кўринишича Ўзбекистон Республикасининг Жиноят ижроия Кодекси талабларига зид равишда қамалганидан бери фуқаролар учун мўлжалланган умумий тартибдаги колонияда жазо муддатини ўтаб келаётган Ўзбекистон Қуролли кучларининг собиқ вакили ўтган йилнинг август ойида Жаслиққа келтирилган. Шу йилнинг 7 февраль санаси билан уйига мактуб ёзган ҳуқуқ фаоли аҳволининг оғирлиги, унга ОИТС хасталиги юқиши эҳтимоли мавжудлигини ёзган.

Ўзбекистон инсон ҳуқуқлари “Эзгулик” жамияти вакиллари томонидан Маматқуловга тегишли жиноят иши ўрганилганида мавжуд қуонунчиликка кўра, у дарҳол Бекободдаги ҳуқуқни муҳофаза қилиш органлари собиқ ходимлари сақланадиган муассасага ўтказилиши лозимлиги маълум бўлди. Ўзбекистон Республикаси Қуролли Кучларининг собиқ сержанти, Қашқадарё вилояти ИИБ Қўриқлаш бўлинмаси собиқ ходими ҳисобланган бу шахснинг Жаслиқ лагерига қамалиши мумкин эмас.

Эслатиб ўтамиз, Чўян Маматқулов 2013 йилнинг 8 февралида жиноят ишлари бўйича Қашқадарё вилоят суди томонидан мамлакат Жиноят Кодексининг 137-моддаси (Одам ўғирлаш) 138-моддаси (Зўрлик ишлатиб ғайриқонуний равишда озодликдан маҳрум қилиш), 159-моддаси (Ўзбекистон Республикаси конституциявий тузумига тажовуз қилиш), 168-моддаси (Фирибгарлик), 205-моддаси (Мансаб ваколатини суиистеъмол қилиш), 228-моддаси (Ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш), 238-моддаси (Ёлғон гувоҳлик бериш) ва 244-моддаси 1-қисми (Жамоат хавфсизлиги ва жамоат тартибига таҳдид соладиган материалларни тайёрлаш ёки тарқатиш)да айбланиб, 10 йилга озодликдан маҳрум қилинган.

Ўзбекистон инсон ҳуқуқлари “Эзгулик” жамияти Ўзбекистон Республикаси Жиноят ижроия Кодекси талабларидан келиб чиқиб, Ўзбекистон ИИВнинг ЖИЭБББ маъмуриятини собиқ милиция ходими Чўян Мамақуловни Бекободдаги махсус колонияга ўтказишга ва унинг соғлиғи юзасидан жамоатчиликка изоҳ беришга чақиради!

Ўзбекистон инсон ҳуқуқлари “Эзгулик” жамияти

—

Vasila Inoyatova
Human Rights Society of Uzbekistan “Ezgulik”
Tashkent-11, Navoi st. 7/403
phone: (+998 93) 5624780
(+998 71) 241-85-88
skype: vasilauz
www.ezgulik.org

МАҚОЛАНИ ДЎСТЛАР БИЛАН БАҲАМЛАШИНГ

Шарҳ қолдириш

Фақат 500 белгигача рухсат этилади. Мақола ёки хабарларни МАҚОЛА ВА ФОТОСУРАТЛАР ЖЎНАТИШ ёки Биз билан алоқа шакли орқали жўнатинг.