Ҳамроқул Асқардан Ҳалима Худойбердиевага байрам табриги

---

Хамроқул Асқар:  —

 

ЗАМОНАМИЗНИНГ АЛЛОМА АЁЛЛАРИГА

БАЙРАМ ҲАЗИЛЛАРИ:

 

 

ҲАЛИМА ХУДОЙБЕРДИЕВА

 

Ҳалима опамиз, энди момодир,

Шогирдлари учун Момо Ҳаводир.

Олис Канадада сиқилсанг Исмат –

Онамизнинг шеъри сенга даводир!

 

Илоҳий китобларда нақл этилганидек, Одам Ато жаннатдан Момо Ҳавога муҳаббати туфайли ҳайдалган бўлса, бу унинг энг буюк гуноҳидир.

Агар, қалбингизда Аёл муқаддас деган Она тасаввур яшамас экан, Сизнинг ҲАЁТ ЭКАНЛИГИНГИЗ ҲАМ шубҳалик.

Чунки фақат, фақат муҳаббатгина инсоннинг тириклиги ҳақидаги энг буюк гувоҳномадир!

Бу серғалва дунёнинг барча шовқинлари ўзаро бахт талашаётган очкўз кимсаларнинг можороларидир.

Улар билмайдиларки, бу оламда чинакам бахт Аёл меҳрини қозонган, лоақал унинг бир лаҳзалик самимий илтифотига сазовор бўлган ошиқнинг илкидадир.

Зеро, Бизнинг аёл зотига буюк эҳтиром ва муҳаббатдан ўзга бойлигимиз йўқ.

Ер юзидаги барча аёлларни ўзлари каби гўзал байрамлари ила чин юракдан қутлайман!

 

 

АЁЛНИ АРДОҚЛА

 

       “Жаннат Оналарнинг оёғи остидадир..,”

                                                                    Ҳадис

 

Аёлни ардоқла, кўзларингга сурт,

Унинг ул покиза бармоқларини.

Аёлни ардоқла, кўз ёшдан арит,

Худо ёрлақаган яноқларини.

 

Аёлни ардоқла, кўнглига қара,

Аяма,  ер юзин гавҳарларини.

Ҳофиздай танти бўл, холига бахш эт,

Дунёнинг энг гўзал шаҳарларини.

 

Аёлни ардоқла, кўкларга кўтар,

Самонинг энг тоза кенгликларига.

Аёл иззатини қилмаса агар –

Ишонма ёлғончи тенгликларига.

 

Оналар пойига поёндоз айла,

Жаҳон салтанатин байроқларини.

Аёлни ардоқла, саждагоҳ деб бил,

Пайғамбар сиғинган оёқларини.

 

Онам де, синглим де, ёрим де., ёлбор,

Эъзгу оятларни шивирлаб лабинг.

Шунда кўкрагингдан тарқалиб ғубор –

Меҳру муҳаббатдан пок бўлар қалбинг.

Ҳамроқул АСҚАР,

«Дунё ўзбеклари» учун махсус

 

 

МАҚОЛАНИ ДЎСТЛАР БИЛАН БАҲАМЛАШИНГ